Setshwantsho ka nyalo
1Kgotsa bagaetsho, a ga lo itse, gonne ke bua le batho ba ba itseng molao, fa molao o na le taolo mo mothong ka lobaka lo o sa ntseng a tshedile ka lone? 2Gonne mosadi yo o nang le monna, o golegeletswe ke molao mo monneng wa gagwe, monna a sa ntse a tshedile; mme fa monna a sule, o golotswe mo molaong wa monna. 3Jalo, fa a nyalwa ke monna o sele, monna wa gagwe a sa ntse a tshedile, o tlaa bidiwa moakafadi; mme fa monna a sule, o golotswe mo molaong; mme le fa a nyalwa ke monna o sele o a ba a se moakafadi. 4Ke gone, bagaetsho, le lona lo kile lwa dirwa baswi ka ga molao, ka mmele wa ga Keresete; e le gore lo tle lo nyalwe ke o sele, e bong ke ene yo o tsositsweng mo losong, gore re tle re ungwele Modimo. 5Gonne e rile re le mo nameng, dithato tsa boleo, tse di neng di ntse ka molao, tsa dira mo ditokololong tsa rona go ungwela loso. 6Jaanong re golotswe mo molaong, ka re sule ka ga se re neng re golegilwe ke sone; jalo re direla Modimo ka boša jwa mowa, e seng ka bogologolo jwa ditlhaka tsa lokwalo.
Molao le boleo
7Jalo re tlaa reng? A molao ke boleo? A go se tualo. Le fa go ntse jalo, nkabo ke se ka ka itse boleo fa e se ka molao; gonne nkabo ke se ka ka itse boiphetlho, fa molao o se ka wa re: “O se ka wa iphetlha.” 8Boleo, e rile ka bo bona kgoro ka taolo, jwa tsosa mo go nna mekgwa yotlhe ya go iphetlha; gonne kwa ntle ga molao boleo bo sule. 9E rile jale ka bo ke tshedile kwa ntle ga molao; mme e rile taolo e tla, boleo jwa rulwa, mme ka swa; 10mme taolo e e neng e isa botshelong, ka fitlhela e bile e le e e isang losong; 11gonne boleo, e rile ka bo bona kgoro ka taolo, jwa mphora, mme jwa mpolaya ka yone.
12Jalo molao o boitshepo, le taolo e boitshepo, e tshiamo, e molemo. 13Mme a ke go re se se molemo se iphetotse loso mo go nna? A go se tualo. Mme boleo jwa mpolaya ka se se molemo, gore bo tle bo bonale fa e le boleo; le gore boleo bo leofale thatathata ka ntlha ya taolo.
14Gonne re a itse fa molao e le wa semowa; mme nna ke wa senama, ke bapaditswe mo thateng ya boleo. 15Gonne se ke se dirang ga ke se itse: ka gobo se ke se ratang, ga se se ke se dirang; mme se ke se ilang, ke sone se ke se dirang. 16Mme fa se ke sa se rateng e le sone se ke se dirang, ke bo ke dumela molao fa o le molemo. 17Jalo e be e sa tlhole e le nna yo ke se dirang, e le boleo jo bo agileng mo go nna. 18Gonne ke a itse fa go sa aga sepe se se molemo mo go nna, ke go re mo nameng ya me; gonne go rata go bo go le mo go nna, mme go dira se se molemo ga go yo. 19Gonne molemo o ke o ratang, ga ke o dire; mme bosula jo ke sa bo rateng, ke jone ke bo dirang. 20Mme fa se ke sa se rateng e le sone se ke se dirang, ga e tlhole e le nna yo ke se dirang, mme ke boleo jo bo agileng mo go nna.
21Jalo, ke fitlhela go le molao wa go re, mo go nna yo ke ratang go dira molemo, bosula boo bo ntse bo le teng. 22Gonne ke natefelwa ke molao wa Modimo ka fa bothong jwa ka fa teng; 23mme ke fitlhela molao o sele mo ditokololong tsa me, o o tlhabanang le molao wa pelo ya me, mme o ntsenya mo kgolegong ya molao wa boleo o o mo ditokololong tsa me. 24A motho wa mogolo nna! E mang yo o tlaa nkgololang mo mmeleng wa loso lo? 25Ke leboga Modimo ka Jesu Keresete Morena wa rona. Jalo yo e leng nna, ke direla molao wa Modimo ka pelo; mme ke direla molao wa boleo ka nama.
