SEFELA SA DIFELA 7

₁Ana dinao tsa gago di dintle jang

di le mo ditlhakong,

wena morwadia kgosana!

Malokololo a dirope tsa gago

a ntse jaaka majana a a tlhokegang;

e le tiro ya diatla tsa modiri

yo o setswerere.

₂Khubu ya gago e ntse jaaka phafana

e e kgolokwane,

e go sa tlhokafaleng bojalwa

jo bo tlhakantsweng mo go yone;

mpa ya gago

e ntse jaaka mokoa wa mabele

o o dikanyetditsweng

ka dithunya tsa masoma.

₃Mabele a gago a mabedi

a ntse jaaka ditshetshwana di le pedi

tsa mafatlha.

₄Thamo ya gago

e ntse jaaka kago e e godileng

ya naka lwa tlou;

matlho a gago

a ntse jaaka makadiba a Hešebone

fa kgorong ya Bathe-rabime;

nko ya gago e ntse jaaka kago

e e godileng ya Lebanone,

e e lebileng kwa Damaseko.

₅Tlhogo ya gago mo go wena

e ntse jaaka Karemele,

le moriri wa tlhogo ya gago

o ntse jaaka bohibidu

jo bo mokgona;

kgosi e golegilwe ke dikgaro tsa one.

₆O montle,

o kgatlha jang wena moratwa,

ka go natefa!

₇Go gola ga gago

go ntse jaaka mokolane,

le mabele a gago

a ntse jaaka masitlha a mofine.

₈Ka re ke tlaa palama mokolane,

ke tlaa tshwara dikala tsa one;

a mabele a gago

a nne jaaka masitlha a mofine,

le lonko lwa mowa wa gago

lo nne jaaka boapole;

₉le molomo wa gago

o nne jaaka bojalwa jwa mofine

jo bo molemo bogolo,

jo bo fologelang moratweng wa me

sentle,

bo buise dipounama

tsa ba ba robetseng.

₁₀Ke wa gagwe moratwi wa me,

mme keletso ya gagwe e lebile nna.

₁₁Moratwa wa me, ntlo,

a re tswele nageng;

re ye go lala mo metsaneng.

₁₂A re phakelele kwa masimo

a mafine;

re bone go re a mofine o kukuntse,

le go re a dithunya tsa one

di phantse,

le go re a garanate o thuntse;

ke tlaa go naya lorato lwa me teng.

₁₃Ditholwana tsa maithatiso

di ntsha lonko lo lo monate,

le maungo mangwe le mangwe

a a rategang,

a maša le a magologolo,

a fa mejakong ya rona,

ke a ke a go boloketseng,

wena moratwa wa me.