SEKARIA 6

₁Gape ka tsholetsa matlho a me, ka leba, mme bonang, ga tswa dikara di le nne mo gare ga dithaba di le pedi; dithaba tseo e ne e le tsa kgotlho. ₂Mo kareng ya ntlha go ne go le dipitse tse dikhunou; mo kareng ya bobedi dipitse tse dintsho. ₃Mo kareng ya boraro dipitse tse ditshweu; mme mo kareng ya bone dipitse tse di bowebu jo bohibidu. ₄Foo ka bua, ka raya moengele yo o buang le nna ka re: “Dilo tse ke eng, morena wa me?”

₅Moengele a mphetola a re: “Tse ke diphefo tse nne tsa legodimo, tse di tswang kwa go emeng fa pele ga Jehofa wa lefatshe lotlhe. ₆Kara ya dipitse tse dintsho e tswela kwa lefatsheng la botsheka; mme tse ditshweu tsa di latela; mme tse dikwebu tsa tswela kwa lefatsheng la borwa.”

₇Tse dikhunou tsa tswa tsa leka go tsamaya gore di ye kwa le kwa go ralala lefatshe; mme a re: “Tlogang fa, lo sepelele kwa le kwa lo ralale lefatshe.” Jalo tsa ya kwa le kwa tsa ralala lefatshe. ₈Foo a nkua a bua le nna, a re: “Bona tse di tswelang kwa lefatsheng la botsheka di thethebaditse mowa wa me mo lefatsheng la botsheka.”

₉Mme Lefoko la ga Jehofa la tla mo go nna la re: ₁₀“Amogela mo go ba botshwaro, e bong mo go Heletai, le mo go Tobia, le mo go Jetaia; mme o tle ka tsatsi leno fela, o tsene mo ntlong ya ga Josia morwa Sefania, kwa ba gorogetseng teng ba tswa Babilone. ₁₁Ee, o tseye mo go bone selefera le gouta, mme o dire dirwalo, o di beye mo tlhogong ya ga Jošua morwa Jehosatake, moperesiti yo mogolo. ₁₂O bue nae, o re: ‘Go bua jaana Jehofa wa masomosomo, a re: Bonang, monna yo leina la gagwe go tweng, Letlhogela; o tlaa tlhoga mo felong ga gagwe, mme o tlaa aga tempele ya ga Jehofa. ₁₃E leng ene o tlaa aga tempele ya ga Jehofa; mme o tlaa rwala kgalalelo, o tlaa dula a ba a busa mo setulong sa gagwe sa bogosi; o tlaa nna moperesiti mo setulong sa gagwe; mme kgakololo ya kagiso e tlaa nna mo gare ga tsone tsoo pedi.’ ₁₄Dirwalo e nne tsa boHeleme, le Tobia, le Jetaia, le Hene morwa Sefania, go nna segopodiso mo tempeleng ya ga Jehofa.

₁₅“Le ba ba kwa kgakala ba tlaa tla ba aga tempele ya ga Jehofa, mme lo tlaa itse fa Jehofa wa masomosomo a nthomile kwa go lona. Mme seo, se tlaa dirala fa lo ineela go utlwa lentswe la ga Jehofa Modimo wa lona ka tlhoafalo.”