1Ya re ba sena go fitlhisa Letlole la Modimo, ba le baya mo teng ga tente e Dafita o neng a e le tlhometse, ba feta ba tlisa ditlhabelo tsa phiso le tsa tebogo fa pele ga Modimo. 2Ya re Dafita a sena go dira ditlhabelo tsa phiso le tsa tebogo, a tshegofatsa morafe ka leina la Morena. 3A ba a abela mongwe le mongwe wa Baiseraele, banna le basadi, senkgwe se le sengwe le nama le senkgwana sa maswabi a moweine.
4Mme bangwe ba Balefi a ba dira badiredi fa pele ga Letlole la Morena gore ba tumise Morena, Modimo wa Iseraele, ba o leboge ba o bake: 5E bong Asafe yo e leng tlhogo le Sagaria yo o tlhomaganang nae le Jehuele le Semiramothe le Jehiele le Mathitya le Eliabe le Benaya le Obete-Etomo le Jegiele ba tshotse diletso tsa diharepa le dikwadi, mme Asafe a letsa matlhao-a-mabogo. 6Mme baperesiti Benaya le Jahasiele ba nna ba letsa diphala ka metlha fa pele ga Letlole la Kgolagano ya Modimo.
Sefela sa tebogo le pako
7E ne e le ga ntlha ka letsatsi leo, fa Dafita a opedisa Asafe le ba ga gabo “Lebogang Morena.”
8Lebogang Morena,
bitsang leina la gagwe,
utlwatsang ditiro tsa gagwe
mo merafeng.
9Mo opeleleng,
mo leletseng,
akanyang dikgakgamatso
tsotlhe tsa gagwe.
10Ikgantsheng ka leina
le le boitshepo la gagwe;
a go itumele dipelo
tsa ba ba batlang Morena.
11Elang Morena tlhoko
le thata ya gagwe,
lo nne lo batle
sefatlhego sa gagwe ka gale.
12Gopolang dikgakgamatso
tsa gagwe tse o di dirileng
ditshupo tsa metlholo
tsa gagwe le dikatlholo
tsa molomo wa gagwe,
13lona bana ba ga Iseraele
motlhanka wa gagwe,
lona bomorwa Jakobe,
baitlhophelwi ba gagwe.
14Morena ke ene
Modimo wa rona;
dikatlholo tsa gagwe
di mo lefatsheng lotlhe.
15Gopolang kgolagano ya gagwe
ka bosakhutleng
le lefoko le o le laetseng
ditshika di le sekete;
16kgolagano e o e dirileng
le Aborahame
le ikano e o e ikanetseng
Isaka.
17A e beela Jakobe molao
le Iseraele kgolagano
e e sa khutleng,
18fa a re:
“Ke tla go naya lefatshe
la Kanana go nna kabelo
ya boswa jwa lona;”
19jale fa ba sa le bannye
mo palong,
ba se kae, ba jaka mo go lone.
20Ba itsamaela,
ba tswa setšhabeng
ba ya setšhabeng,
ba tlogela bogosi bongwe
ba ya kwa morafeng
o mongwe.
21A se ka a letlelela ope
go ba gatelela,
a betsa dikgosi
ka ntlha ya bone a re:
22“Lo se ka lwa ama batlodiwa
ba me
le e seng go direla
baporofeti ba me bosula.”
23Opelelang Morena,
lona ba lefatshe lotlhe;
utlwatsang boitumelo jwa
pholoso ya gagwe
ka letsatsi le letsatsi.
24Bolelang kgalalelo ya gagwe
mo ditšhabeng
le dikgakgamatso tsa gagwe
mo merafeng yotlhe.
25Gonne Morena o mogolo,
o tshwanetse go bakwa segolo;
o bile o a boitshega
bogolo go medimo yotlhe.
26Gonne medimo yotlhe ya
merafe ke ditshwantsho fela,
mme Morena
o dirile legodimo.
27Borena le kgalalelo di fa pele
ga sefatlhego sa gagwe;
nonofo le boitumelo
di mo felong ga gagwe.
28Lona ditshika tsa merafe,
neelang Morena,
lo neele Morena
tlotlo le thata.
29Neelang Morena
tlotlo ya leina la gagwe;
tlisang tshupelo,
lo tle fa pele
ga sefatlhego sa gagwe;
obamelang Morena lo kgabile
ka boitshepo.
30Tlakaselang fa pele ga gagwe,
lona ba lefatshe lotlhe;
kana lefatshe le tlhomame,
ga le reketle.
31A magodimo a itumele,
a lefatshe le ipele!
A go buiwe mo ditšhabeng
go twe:
“Kgosi ke Morena!”
32A lewatle le sume
le tse di tletseng mo go lone!
A naga e duduetse
le tsotlhe tse di mo go yona!
33Foo ditlhare tsa sekgwa
di tla ipela fa pele ga Morena;
gonne o e tla
go atlhola lefatshe.
34Lebogang Morena,
gonne o molemo;
gonne bopelotlhomogi jwa
gagwe ke jo bo sa khutleng.
35E reng: “Re pholose,
Modimo wa pholoso
ya rona;
re phuthe,
re golole mo ditšhabeng
gore re leboge leina
le le boitshepo la gago,
re ipelafatse
ka go baka wena.”
36A go tumisiwe Morena
Modimo wa Iseraele
go tswa bosenang-tshimologo
go ya bosakhutleng!
Ke fa batho botlhe ba re: “Amen! Baka Morena!”
37Mme Dafita a tlogela Asafe le ba ga gabo gona fa pele ga Letlole la Kgolagano ya Morena gore ba nne ba direle fa pele ga Letlole ka gale ka fa go batlegang ka teng ka letsatsi le letsatsi. 38Mme Obete-Etomo morwa Jeduthune le Hosa le ba ga bone, banna ba le 68, a ba dira badisa ba mojako.
39A ba a tlogela Satoke moperesiti le ba ga gabo ba e leng baperesiti fa pele ga Tente ya Boipontsho ya Morena kwa thoteng ya tlhabelo e e neng e le kwa Gibeone 40gore ba nne ba direle Morena ditlhabelo tsa phiso mo aletareng ya tsona ka gale mo mosong le mantsiboa le go dira tsotlhe tse di kwadilweng mo molaong wa Morena o a o laetseng Baiseraele. 41Ba bo ba na le Hemane le Jeduthune le ba bangwe ba ba tlhaotsweng ba ba boletsweng ka maina gore ba leboge Morena ka bopelotlhomogi jwa gagwe e le jo bo sa khutleng. 42Mme Hemane le Jeduthune ba ne ba na le diphala le matlhao-a-mabogo le diletso tsa difela tsa Modimo, e le tsa ba ba di letsang. Mme bomorwa Jeduthune bone ba disa kgoro.
43Jaanong batho botlhe ba ya kwa gae, mongwe le mongwe kwa lapeng la gagwe; le Dafita a boa go dumedisa ba lapa la gagwe.
