1 DITIRAFALO 5

₁Bomorwa Rubene morwa Iseraele wa ntlha – gonne ke ene wa ntlha, mme e re ka a ne a itshekolola bolao jwa ga rraagwe, tshiamelo ya bogolo jwa gagwe ya neelwa bomorwa Josefa morwa Iseraele, mme e se go mo kwalela bogolo mo lokwalong lwa tlhomagano ya ditshika. ₂Gonne Juta o ne a le thata mo go bomorwa-rraagwe, mme moeteledipele e ne e le wa ga gabo Juta, fela tshiamelo ya bogolo e le ya ga Josefa – ₃bomorwa Rubene morwa Iseraele wa ntlha ke Henoge le Phalo le Heserone le Karemi.

₄Morwawe Karemi e ne e le Joele, morwawe e le Semaya, morwawe e le Gogo, morwawe e le Simei, ₅morwawe e le Miga, morwawe e le Reaya, morwawe e le Baale, ₆morwawe e le Bera; ke ene yo o neng a isiwa mo botshwarong ke Thigelathe-Philesere kgosi ya Asiria, e le kgosana ya Barubene.

₇Bomorwa-rraagwe ka fa ditshikeng tsa bone jaaka di ne tsa kwalwa mo lokwalong lwa tlhomagano ya tsona: Tlhogo ke Jehiele, a tlhomaganngwa ke Sagaria ₈le Bela morwa Asase morwa Sema morwa Joele; ene o ne a agile kwa Aroere le go fitlha kwa Nebo le kwa Baale-Meone. ₉Kwa botlhabatsatsi o ne a agile go ya go fitlha kwa sekakeng se se ka kwano ga noka ya Ferathe; gonne diruiwa tsa bone di ne di le dintsi mo lefatsheng la Gileate.

₁₀Mo metlheng ya ga Saule Barubene ba ne ba lwa le Bahagare, ba ba bolaya ba nna mo ditenteng tsa bone ntlheng tsotlhe tsa botlhabatsatsi jwa Gileate.

₁₁Bomorwa Gate ba ne ba agile go bapa nabo kwa lefatsheng la Basane go fitlha kwa Salega. ₁₂Tlhogo ya bone e ne e le Joele, wa bobedi e le Safame le Jaenai le Safate kwa Basane. ₁₃Bomorwa-rraabo ka fa malapeng a bone ke Migaele le Mesulame le Seba le Jorai le Jakane le Sia le Ebere, ba ba supa. ₁₄Ke bone bomorwa Abigaile morwa Huri morwa Jaroa morwa Gileate morwa Migaele morwa Jesisai morwa Jato morwa Buse. ₁₅Ahi, morwa Abadiele morwa Guni, e ne e le tlhogo ya dikgotla tsa bone. ₁₆Ba ne ba agile kwa Gileate mo Basane le mo metsaneng ya teng le mo mafulong aotlhe a Sarone go ya go fitlha kwa a felelelang teng. ₁₇Botlhe ba, ba ne ba kwalwa mo lokwalong lwa tlhomagano ya ditshika mo metlheng ya ga Jothame, kgosi ya Juta, le mo metlheng ya ga Jerobeame, kgosi ya Iseraele.

₁₈Barubene le Bagate le ba bontlhanngwe jwa lotso lwa ga Manase, fa go balwa bagale, banna ba ba tshotseng dithebe le ditšhaka ba ba gagamatsang mara, ba ba rutilweng tlhabano ba ne ba le 44 760 ba ba bololang mephatong. ₁₉Ba dira ntwa le Bahagare le Jeture le Nafise le Notabe, ₂₀mme ba thusega ba ba fenya. Bahagare le botlhe ba ba neng ba na nabo ba neelwa mo diatleng tsa bone; gonne ba ne ba tlhaeleditse Modimo ba le mo tlhabanong, mme wa ba utlwa, ka ba o ikanya. ₂₁Ba thopa diruiwa tsa bone, e bong dikammele di le 50 000 le difutshane di le 250 000 le diesele di le 2 000 le batho ba le 100 000. ₂₂E bile ba bantsi ba ne ba ole ba bolailwe; gonne tlhabano e ne e tswa Modimong, mme ba nna mo mafelong a bone go ya go fitlha botshwarong.

₂₃Le bomorwa bontlhanngwe jwa lotso lwa ga Manase ba ne ba agile mo lefatsheng leo go tloga kwa Basane go fitlha kwa Baale-Heremone le kwa Senire le kwa thabeng ya Heremone. Bone ba ne ba le bantsi. ₂₄Ditlhogo tsa dikgoro tsa bone e ne e le Efere le Isei le Eliele le Aseriele le Jeremia le Hotafia le Jadiele; e le banna ba bagale, banna ba ba tumileng, e le ditlhogo tsa ditshika tsa bone.

₂₅Mme e rile ka ba direla Modimo wa borraabo ka boikanyologo, ba dira boaka ka go latela medimo ya merafe ya lefatshe leo, e Modimo o neng o e nyeleditse fa pele ga bone; ₂₆ka moo Modimo wa Iseraele wa tlhotlheletsa mowa wa ga Phule, e bong wa ga Thigelathe-Philesere kgosi ya Asiria, mme ya isa Barubene le Bagate le ba bontlhanngwe jwa lotso lwa ga Manase mo botshwarong, ya ba isa kwa Hala le Habore le kwa dithabeng tsa Media le kwa nokeng ya Gosane. Ba sa ntse ba nna teng go fitlha letsatsing leno.