2 DIKGOSI 13

₁Joahase morwa Jehu o ne a simolola go busa Iseraele kwa Samaria ka ngwaga wa 23 wa puso ya ga Joase morwa Ahasia kgosi ya Juta; a busa dinyaga di le 17. ₂A dira tse di bosula mo matlhong a Morena, a sepela boleong jwa ga Jerobeame morwa Nebate yo o neng a leofisa Baiseraele; a se ka a bo tlogela. ₃Ke fa Morena a tukela Baiseraele bogale a ba neela mo diatleng tsa ga Hasaele kgosi ya Siria le mo diatleng tsa ga Benehatate morwa Hasaele ka metlha yotlhe ele. ₄Mme Joahase a kopa bopelotlhomogi fa pele ga Morena, mme Morena a mo utlwa. Gonne o ne a bona pitlagano ya Baiseraele, ka kgosi ya Siria e ba pitlaganya. ₅Morena a naya Iseraele mogolodi, mme ene a ba golola mo diatleng tsa Basiria, mme Baiseraele ba iketla gape mo ditenteng tsa bone jaaka gale. ₆Fela ba se ka ba tlogela boleo jwa lelapa la ga Jerobeame yo o neng a leofisa Baiseraele, mme ba sepela mo go jona; le gona modimako wa Ašera wa bo o ntse o eme kwa Samaria.

₇Kana kgosi ya Siria e ne e se ka ya sadisetsa Joahase batlhabani, fa e se bapalami ba le 50 le dikoloi tsa ntwa di le some le batlhabani ba dinao ba le 10 000 fela; gonne e ne e ba nyeleditse, ya ba dira jaaka lerole, fa go phothwa mabele.

₈Ditirafalo tse dingwe tsa ga Joahase le tsotlhe tse o neng a di dira le ditiro tsa bopelokgale tsa gagwe kana di kwadilwe mo lokwalong lwa ditirafalo tsa sebaka sa dikgosi tsa Iseraele. ₉Mme Joahase a robala le borraagwe, a fitlhwa kwa Samaria, mme Joase morwawe a nna kgosi mo boemong jwa gagwe.

₁₀Joase morwa Joahase a simolola go busa Iseraele kwa Samaria ka ngwaga wa 37 wa puso ya ga Joase kgosi ya Juta; a busa dinyaga di le 16. ₁₁Mme a dira tse di bosula mo matlhong a Morena, a se ka a tlogela boleo jotlhe jwa ga Jerobeame morwa Nebate yo o neng a leofisa Baiseraele, a sepela mo go jona. ₁₂Ditirafalo tse dingwe tsa ga Joase le tsotlhe tse o neng a di dira le bopelokgale jwa gagwe, fa a ne a tlhabana le Amasia kgosi ya Juta kana di kwadilwe mo lokwalong lwa ditirafalo tsa sebaka sa dikgosi tsa Iseraele. ₁₃Mme Joase a robala le borraagwe, mme Jerobeame a nna mo sedulong sa bogosi sa gagwe. Joase a fitlhwa kwa Samaria fa dikgosing tsa Iseraele.

₁₄E rile Elisa a lwala bolwetse jo o neng a swa ka jona, Joase kgosi ya Iseraele a tla kwa go ene, a mo lelela a re: “Rra wee! Rra wee! Koloi ya Iseraele le bapalami ba yona.”

₁₅Ke fa Elisa a mo raya a re: “Tsaya bora le metsu.” Ya re a sena go mo tseela bora le metsu, ₁₆a raya kgosi ya Iseraele a re: “Baya letsogo mo boreng.” A baya letsogo mo go jona, mme Elisa a baya diatla mo diatleng tsa kgosi ₁₇a re: “Bula fenstere e e lebileng kwa botlhabatsatsi.” Mme a e bula. Elisa a ba a re: “Hula.” Mme a hula. Ke fa Elisa a re: “Ke motsu wa phenyo wa Morena le motsu wa go fenya Basiria, mme o tla fenya Basiria gotlhe kwa Afeke.”

₁₈Elisa a ba a re: “Tsaya metsu!” A e tsaya. Jaanong a raya kgosi ya Iseraele a re: “Iteela fa fatshe.” A itaya gararo a khutla. ₁₉Ke fa monna wa Modimo a mo galefela a re: “O ka bo o iteile gatlhano gongwe garataro, foo o ne o tla fenya Basiria go ya o ba nyeletsa. Mme jaanong o tla fenya Basiria gararo fela.”

₂₀Jaanong Elisa a swa, mme ba mo fitlha. Mme makoko a dinokwane a Bamoabe a ne a tlhasela lefatshe ka tshimologo ya ngwaga. ₂₁Mme ya re ba fitlha motho, ba bona lekoko le tlhaga. Ke fa ba latlhela moswi mo lebitleng la ga Elisa ba tshaba. Mme ya re moswi a ama marapo a ga Elisa, a tsoga, a ema ka dinao.

₂₂Mme Hasaele kgosi ya Siria o ne a ntse a patika Baiseraele ka malatsi otlhe a ga Joahase. ₂₃Fela Morena a ba tlhomogela pelo, a ba utlwela botlhoko, a ba ngoka ka ntlha ya kgolagano ya gagwe e o e dirileng le Aborahame le Isaka le Jakobe; a se ka a rata go ba senya, a se ka a ba latlha fa pele ga gagwe go fitlha foo.

₂₄Jaanong ya re Hasaele kgosi ya Siria a sena go swa ga busa Benehatate morwawe mo boemong jwa gagwe. ₂₅Ke fa Joase morwa Joahase a thopolola metse mo diatleng tsa ga Benehatate morwa Hasaele e yoo o neng a e thopile mo diatleng tsa go Joahase rraagwe mo ntweng. Joase a mo fenya gararo, a busa metse ya Iseraele jalo.