ESETERE 4

₁E rile Moretogai a sena go utlwa tsotlhe tse di dirilweng, a ikgagola diaparo, a apara lesela la kgetse, a itshela molora; a ba a tswela kwa gare ga motse, a tlhatlosa lentswe, a lela selelo se segolo se se galakang. ₂A ba a tla a fitlha fa kgorong ya kgosi; gonne go ne go sa letlelelwa ope go tsena kgorong ya kgosi a apere lesela la kgetse. ₃Le kwa lefatsheng lengwe le lengwe, le fa e le kae kwa lefoko la kgosi le molao wa yona di fitlhang teng ga nna bohutsana jo bogolo mo Bajuteng le go itima dijo le selelo le khutsafalo; ba bantsi ba ikalela lesela la kgetse le molora.

₄Ke fa basetsana ba ga Esetere le badiredi ba gagwe ba tla ba mmolelela, mme mohumagadi a utlwa botlhoko thata; a ba a romela diaparo go apesa Moretogai le go mo apola lesela la kgetse, mme a di gana. ₅Jaanong Esetere a bitsa Hathage mongwe wa badiredi ba kgosi yo e neng e mo laetse go direla mohumagadi, a mo laela go ya kwa go Moretogai go ya go utlwa gore ke eng le gore ke ka ntlha ya eng. ₆Hathage a tswela kwa go Moretogai kwa patlelong ya motse e e fa pele ga kgoro ya kgosi. ₇Ke fa Moretogai a mmegela tsotlhe tse di mo dirafaletseng le palo ya madi a Hamane o neng a solofeditse go a lekanyetsa mo dikhumong tsa kgosi gore a tle a nyeletse Bajuta. ₈A ba a mo neela lokwalo lwa molao o o beilweng mo Susane go ba nyeletsa go lo bontsha Esetere le go mo itsise dilo tseo le go mo laela gore a tsene kwa kgosing go kopa bopelotlhomogi mo go yona le go e rapelela morafe wa gagwe. ₉Hathage a tla, a bolelela Esetere mafoko a ga Moretogai. ₁₀Mme Esetere a raya Hathage a mo laela go ya kwa go Moretogai go mo raya a re: ₁₁“Batlhanka botlhe ba kgosi le batho ba mafatshe a kgosi ba itse gore mongwe le mongwe, le fa e le monna gongwe mosadi yo o tsenang kwa kgosing kwa lapeng la ka fa teng a sa bidiwa, o atlholwa ka molao o le mongwe gore a bolawe, fela fa e se yo kgosi e mo otlololelang thobane ya yona ya bogosi ya gouta gore a phele. Mme nna ga ke ise ke bidiwe go tsena kwa kgosing e setse e le malatsi a le 30.”

₁₂Ya re Moretogai a begelwa mafoko a ga Esetere, ₁₃a busetsa karabo go Esetere e e reng: “O se itlhome, o tla falola o le wesi mo Bajuteng botlhe ka o le mo ntlong ya kgosi. ₁₄Gonne fa o ka didimala tota ka sebaka se se ntseng jalo, kgololesego le pholoso di tla dirafalela Bajuta di tswa go sele, mme wena le ba lapa la ga rraago lo tla latlhega. Go itse mang? Motlhamongwe o filwe bohumagadi ka ntlha ya sebaka se se tshwanang le seno.”

₁₅Esetere a laela go ya go araba Moretogai go re: ₁₆“Yaa o phuthe Bajuta botlhe ba ba mono Susane, lo itime dijo ka ntlha ya me, lo se ka lwa ja, lo se ka lwa nwa malatsi a le mararo bosigo le motshegare; le nna le basetsana ba me re tla itima dijo jalo; morago ga moo ke tla tsena kwa kgosing, le fa e se ka fa molaong. Fa ke bolawa, ke tla bolawa.”

₁₇Moretogai a ya a dira fela jaaka Esetere a mo laetse.