EKESODU 35

₁Jaanong Moše a kgobokanya phuthego yotlhe ya Baiseraele, a ba raya a re: “Dilo tse Morena o di laotseng gore di dirwe ke tse: ₂A tiro e dirwe ka malatsi a marataro, mme la bosupa e nne letsatsi le le boitshepo mo go lona, e nne la Sabata la boikhutso la Morena. Mongwe le mongwe yo o dirang tiro ka lone a a bolawe. ₃Se gotseng molelo mo lelapeng lepe la lona ka letsatsi la Sabata.”

₄Moše a ba a raya phuthego yotlhe ya Baiseraele a re: “Tse Morena o di laotseng ke tse: ₅Ntshetsang Morena kabelo ya di-tsa-lona. A mongwe le mongwe yo o pelotshweu a e tlise. Kabelo eo ya Morena e ka nna gouta gongwe selefera gongwe kgotlho; ₆gongwe masela a mabududu le a bohibidu jwa bofifadu le a bohibidu jwa madi le a masweu le boboa jwa dipodi; ₇gongwe matlalo a diphelehu a a hubiditsweng le matlalo a dintšwa tsa lewatle gongwe dipati tsa mokgwa; ₈gongwe mafura a setlhomo sa dipone gongwe makga a a monate a lookwane lwa tlotso le a maswalo a a nkgang monate; ₉gongwe majwe a a tlhokegang a šohama le majwe a a tlhokegang a a gokelelwang mo khibeng ya moperesiti le mo kgwatlhaneng ya sehuba.

₁₀“Jaanong a mongwe le mongwe yo o setswerere mo go lona a tle a dire tsotlhe tse Morena o di laotseng, ₁₁e bong Tempelana le tente ya yona le thulelo ya yona le dikgogetso tsa yona le dipati tsa yona le mephakarego ya yona le maotwana a yona le ditlhako tsa yona; ₁₂le Letlole le dithobane tsa lone le sekhurumelo sa thuanyo le lesire la go le sira; ₁₃le lomati lwa dinkgwe tsa tshupo le dithobane tsa lone le didiri tsotlhe tsa lone le dinkgwe tsa tshupo; ₁₄le setlhomo sa dipone se se bonegang le didiri tsa sona le dipone tsa sona le mafura a setlhomo; ₁₅le aletare ya go tshuba maswalo le dithobane tsa yona le lookwane lwa tlotso le maswalo a a nkgang monate le sebipo sa mojako wa Tempelana; ₁₆le aletare ya ditlhabelo tsa phiso le letloa la kgotlho la yona le dithobane tsa yona le didiri tsotlhe tsa yona; le mogopo o o tlhapelang le lekoto la ona; ₁₇le legora lwa masela lwa lelapa le maotwana a lone le ditlhako tsa ona le sebipo sa kgoro ya lelapa; ₁₈le dimapo tsa Tempelana le dimapo tsa lelapa le dithapo tsa tsona; ₁₉le diaparo tsa maatlametlo tsa go direla Modimo mo Felong-ga-Boitshepo, e bong diaparo tse di boitshepo tsa ga Arone moperesiti; le diaparo tsa bomorwawe go dira tiro ya boperesiti.”

₂₀Ke fa phuthego yotlhe ya Baiseraele e phatlalala, e tloga fa pele ga Moše. ₂₁Mme ba boa, mongwe le mongwe yo pelo ya gagwe e ratang, mongwe le mongwe yo mowa wa gagwe o utlwisisang, ba tlisa kabelo ya Morena ya go aga Tempelana ya Boipontsho le ya tirelo yotlhe ya yona le ya diaparo tse di boitshepo. ₂₂Ga tla banna le basadi, botlhe ba ba peloditshweu ba tlisa dikgokelo le manyena le dipalamonwana le dibaga, e le dilo tsa mefutafuta tsa gouta; le botlhe ba ba nayang Morena gouta ka go e kgadikanya, ₂₃le botlhe ba ba nang le masela a mabududu le a bohibidu jwa bofifadu le a bohibidu jwa madi le a masweu le boboa jwa dipodi le matlalo a diphelehu a a hubiditsweng le matlalo a dintšwa tsa lewatle, ba di tlisa. ₂₄Mongwe le mongwe yo o ratang go ntsha kabelo ya selefera le ya kgotlho a tlisa kabelo eo ya Morena; mongwe le mongwe yo o nang le dipati tsa mokgwa tse di batlegang mo tirong yotlhe ya kago a di tlisa. ₂₅Mosadi mongwe le mongwe yo o setswerere a otlha ka diatla, a tlisa tse a di otlhileng, e bong masela a mabududu le a bohibidu jwa bofifadu le a bohibidu jwa madi le a masweu. ₂₆Basadi botlhe ba ba neng ba itse, ba bile ba rata ba otlha boboa jwa dipodi. ₂₇Dikgosana tsone tsa tlisa majwe a a tlhokegang a šohama le majwe a a tlhokegang a a gokelelwang mo khibeng ya moperesiti le mo kgwatlhaneng ya yona ₂₈le makga a a monate le mafura a setlhomo sa dipone le lookwane lwa tlotso le maswalo a a nkgang monate. ₂₉Banna botlhe le basadi botlhe ba Baiseraele ba ba neng ba ikaeletse go tlisa tse di batlegang mo tirong yotlhe e Morena a e laotseng ka Moše gore e dirwe, ba tlisetsa Morena dineo tsa bopelotshweu.

₃₀Mme Moše a raya Baiseraele a re: “Bonang, Morena o biditse Besalele ka leina; ke morwa Uri, morwa Hure, wa lotso lwa Juta. ₃₁O mo tladitse Mowa wa Modimo o o itshupang ka botlhale le ka tlhaloganyo le ka kitso le ka botswerere mo tirong nngwe le nngwe ₃₂gore a loge maano a maatlametlo, le go a dira ka gouta le ka selefera le ka kgotlho ₃₃le ka go seta majwe le go a tlapisa le ka go betla dikgong le go dira tiro nngwe le nngwe e e batlang botswerere. ₃₄Le gona o tsentse neo mo pelong ya gagwe ya go ruta ba bangwe, ene le Oholiabe, morwa Ahisamage, wa lotso lwa Dane. ₃₅Bao o ba tladitse botlhale jwa pelo gore ba itse go dira ditiro tsotlhe tsa go seta le tsa go loga masela a a ditshwantsho le masela a a mebalabala le masela a mabududu le a bohibidu jwa bofifadu le a bohibidu jwa madi le a masweu le tsa go loga masela a mangwe. Ba tla dira ditiro tsotlhe, ba loga maano a maatlametlo.