ESERA 9

₁E rile tseo di sena go fediwa, dikgosana tsa tla go nna tsa re: “Morafe wa Iseraele le baperesiti le Balefi ga ba a ikgaoganya le merafe ya mafatshe le makgapha a yona a Bakanana le Bahethe le Baferesi le Bajebusi le Baamone le Bamoabe le Baegepeto le Baamori. ₂Gonne ba tsere basadi mo go bomorwadia-bone, e bile ba ba tseisa bomorwaa-bone; losika lo lo boitshepo lwa itlhakanya jalo le merafe ya mafatshe. Mme dikgosana le bagolo ba simolotse ka boikanyologo joo.” ₃Ya re ke utlwa mafoko a, ka ikgagola diaparo le kobo, ka ikhumola moriri wa tlhogo le ditedu, ka nna ke reregile. ₄Mme botlhe ba ba boifang mafoko a Modimo wa Iseraele ba phuthegela go nna ka ntlha ya boikanyologo jwa ba ba boileng kwa botshwarong, mme ka nna ke reregile go ya nakong ya tshupelo ya maitsiboa.

₅Ya re ke sena go tlhola ke ikwatlhaya, ka nanoga ka nako ya tshupelo ya maitsiboa, ke ikgagotse diaparo le kobo, ka khubama ka mangole, ka tsholeletsa mabogo kwa Moreneng, Modimo wa me ₆ka re: “Modimo wa me, ke tlhajwa ke ditlhong, ke tshaba go ka tsholeletsa sefatlhego kwa go wena, Modimo wa me; gonne melato ya rona e re ntsifaletse e fitlha kwa godimo ga ditlhogo; maleo a rona a magolo, a fitlha kwa legodimong. ₇Go tloga malatsing a borraetsho go fitlha letsatsing leno re mo molatong o mogolo, mme ke ka ntlha ya ditshiamololo tsa rona, fa rona le dikgosi tsa rona le baperesiti ba rona re neetswe mo diatleng tsa dikgosi tsa mafatshe mo tšhakeng le mo botshwarong le mo thukhuthong le mo go kgobiweng mo pepeneneng jaaka go ntse kajeno. ₈Ka nnete, ka sebakanyana seno re bonye boutlwelo-botlhoko mo Moreneng, Modimo wa rona, a re sadisetsa masalela a a phologileng, a re neela botshabelo mo Felong-fa-go-Boitshepo ga gagwe gore Modimo wa rona o sedifatse matlho a rona le go re naya tapolosonyana mo botlhankeng jwa rona. ₉Mme le fa re le batlhanka, Modimo wa rona ga o a ka wa re tlogela mo botlhankeng jwa rona, mme wa sekamisetsa bopelotlhomogi jwa dikgosi tsa Peresia go rona, wa re naya tapoloso go ka aga Ntlo ya Modimo wa rona le go tsosa marope a yona, wa re naya legae mo Juta le mo Jerusalema.

₁₀“Jaanong he, re ka reng, Modimo wa rona, morago ga tseo? Kana re tlogetse ditaelo tsa gago ₁₁tse o di re laetseng ka baporofeti, batlhanka ba gago, wa re: ‘Lefatshe le lo tla tsenang mo go lone go le rua ke lefatshe la itshekologo ka itshekologo ya merafe ya mafatshe ka makgapha a yona a e a le tladitseng gotlhe ka itshekologo ya yona.’ ₁₂Wa re: ‘Ka moo lo se ka lwa neela bomorwaa-bone bomorwadia-lona; le gona lo se ka lwa tseisa bomorwaa-lona bomorwadia-bone, le e seng go batla kagiso ya bone le molemo wa bone ka bosakhutleng gore lo tle lo tie lo je molemo wa lefatshe, lo le ruise bomorwaa-lona ka bosakhutleng.’ ₁₃Wena Modimo wa rona o fokoditse dipetso tse di tshwanetseng molato wa rona, wa re naya masalela a a phologileng a a kana. Jaanong morago ga tsotlhe tse di re dirafaletseng ka ntlha ya ditiro tse di bosula tsa rona le molato o mogolo wa rona, ₁₄a re ka boela ra tlola ditaolo tsa gago, ra nyalana le merafe ya makgapha ao? A ga o kitla o re galefela go ya re be re fegele ruri go se na masalela le fa e le phologo? ₁₅Morena, Modimo wa Iseraele, o mo tshiamong, fa re le masalela a a phologileng a se kae fela jaaka go ntse kajeno. Bona, re fa pele ga gago re le mo molatong wa rona. Ruri, ga go na ope yo o ka emang fa pele ga gago ka ntlha ya tse di ntseng jalo.”