BAATLHODI 10

₁Sehularong sa ga Abimelege ga tsoga Thola morwa Phua morwa Doto, monna wa lotso lwa ga Isašare, go thusa Iseraele. O ne a agile mo motseng wa Samire kwa dithabeng tsa Eferaime. ₂A siamisa Baiseraele dinyaga di le 23; a ba a swa, a fitlhwa mo Samire. ₃Sehularong sa gagwe ga tsoga Jaire wa kwa Gileate, a siamisa Baiseraele dinyaga di le 22. ₄O ne a na le bomorwa ba le 30 ba ba neng ba palama diesele di le 30, ba na le metse e le 30 e e bidiwang metse ya ditente ya ga Jaire go fitlhelela letsatsing la kajeno, e e kwa nageng ya Gileate. ₅Jaire a ba a swa, a fitlhwa kwa Kamone.

₆Mme Baiseraele ba fela ba dira tse di bosula mo matlhong a Morena, ba direla boBaale le boAšethorethe le medimo ya Siria le ya Sitone le ya Moabe le ya Baamone le ya Bafelesita; ba tlogela Morena, ba se ka ba mo direla. ₇Ke fa bogale jwa Morena bo tukela Baiseraele, mme a ba rekisa mo diatleng tsa Bafelesita le tsa Baamone. ₈Ba bogisa Baiseraele, ba ba gatelela setlhogo dinyaga di le 18 ka sebaka seo, e bong Baiseraele botlhe ba ba kwa moseja ga Joretane mo nageng ya Baamori e e kwa Gileate. ₉Le gona Baamone ba tshela Joretane go tlhabana le Bajuta le Babenyamene le Baeferaime, mo Baiseraele ba bileng ba pitlaganngwa thata.

₁₀Ke fa Baiseraele ba lelela Moreneng ba re: “Re go leofetse; gonne re go tlogetse, Modimo wa rona, ra direla boBaale.”

₁₁Mme Morena a raya Baiseraele a re: “A ga ke re, ke lo golotse mo go Baegepeto le mo go Baamori le mo go Baamone le mo go Bafelesita? ₁₂Mme ya re Basitone le Baamaleke le Bamaone ba lo pitlaganya, lwa lelela go nna, mme ka lo pholosa mo diatleng tsa bone. ₁₃Mme lona lo ntlogetse, lwa direla medimo e sele; ke ka moo ke sa ka keng ka tlhola ke lo thusa. ₁₄Yaang lo lele medimong e lo e itlhophetseng! A yona e lo thuse ka sebaka sa tlalelo ya lona!”

₁₅Mme Baiseraele ba raya Morena ba re: “Re leofile. Wena o re direle tsotlhe tse di siameng mo matlhong a gago, fela a ko o re thuse kajeno.” ₁₆Le gona ba tlosa medimo e sele mo gare ga bona, ba direla Morena. Ke fa a tlhomoga pelo ka ntlha ya pogisego ya Baiseraele.

₁₇Jaanong Baamone ba kuiwa, ba thibelela kwa Gileate. Le Baiseraele ba phuthega, ba thibelela kwa Mitsepha. ₁₈Ke fa batho, e bong dikgosana tsa Gileate, ba raana ba re: “Ke monna ofe yo o tla simololang go tlhabana le Baamone? Ene o tla nna tlhogo ya baagi botlhe ba Gileate.”