JEREMIA 51

₁Morena o bua jaana a re: “Bonang, ke tla tsosetsa Babele le baagi ba ‘pelo ya baganetsi ba me’ mowa wa mosenyi. ₂Ke tla romela bafeferi kwa motseng wa Babele, ba tla o fefera, ba leafatsa lefatshe la ona, fa ba le dikanyetsa ka ntwa ka letsatsi la tatlhego ya lone. ₃Yo o hulang ka bora a a konope yo o gagamatsang bora le yo o ikgantshang a apere ditshipi tsa phemelo! Lo se ka lwa rekegela makau a ona. Nyeletsang mephato yotlhe ya batlhabani ba ona. ₄Go tla namalala ba ba bolailweng mo lefatsheng la Kalatea le ba ba phololeditsweng mo ditseleng tsa lone. ₅Gonne Iseraele le Juta ga se batlholagadi ba ba tlogetsweng ke Modimo wa bone, Morena wa masomosomo. Kana lefatshe la bone Bakalatea le tletse molato wa go leofela Moitshepi wa Iseraele. ₆Tshabang lo tswe mo motseng wa Babele! A mongwe le mongwe a ipolokele bophelo jwa gagwe! E se re gongwe lwa nyelediwa ka ntlha ya molato wa ona. Gonne ke sona sebaka sa pusoloso ya Morena. O tla o bolaisa tse o di jeleng. ₇Babele e ne e le senwelo sa gouta mo seatleng sa Morena se se tagisitseng lefatshe lotlhe; ditšhaba di nole weine ya sona. Ke ka moo ditšhaba di tlhakanyeng tlhogo. ₈Babele o ole ka tshoganyetso, a thubakanngwa. Mo goeleng! Batlelang botlhoko jwa gagwe setlhare. Mo gongwe o ka fodisiwa. ₉Re ne re re, re alafa Babele, mme o paletswe ke go fola. Mo tlogeleng, mme a re yeng, mongwe le mongwe kwa lefatsheng la ga gabo. Gonne kotlo e e mo lebanyeng e fitlha kwa legodimong, e ama maru.

₁₀“Morena o senotse ditshiamelo tsa rona. Tlayang a re boleleng tiro ya Morena, Modimo wa rona, kwa Sione.

₁₁“Lootsang metsu, lo tsee dithebe! Morena o tlhotlheleditse bogale jwa dikgosi tsa Bamedia; gonne o logetse Babele maano a go mo senya. Gonne ke yona pusoloso ya Morena, ke gona go busolosetsa Tempele ya gagwe. ₁₂Tlhomang sefoka se se lebaganyeng le dipota tsa Babele. Tiisang balebedi. Emisang batlhodi. Laelang balaledi.

“Gonne tse Morena o di ikaeletseng o bile o a di dirafatsa, e leng tse o bopetseng baagi ba Babele ka tsona. ₁₃Wena yo o agileng fa dinokeng tse dikgolo, yo o humileng dikhumo, go tlile bokhutlo jwa gago le khutliso ya kgwebo ya tshiamololo ya gago. ₁₄Morena wa masomosomo o ikanne ka bophelo jwa gagwe a re: ‘Ruri, ke tla go tlatsa batho jaaka tsie; ba tla go tlhabela mokgosi jaaka fa go gatwa maungo a moweine.’ ”

₂₄“Mme jaanong ke tla busetsa Babele le baagi botlhe ba Kalatea bosula jotlhe jwa bone jo ba bo diretseng Sione, lona lo ntse lo lebile.” Morena o buile jalo. ₂₅“Bona, ke lwa nao, wena thaba e e senyang,” go bua Morena. “Wena yo o sentseng lefatshe lotlhe, ke tla go otlololela letsogo, ke go kgokolosa mo mafikeng, ke go dira thaba e e šeleng. ₂₆Ga ba kitla ba tsaya lefika la sekhutlo, le fa e le lefika la motheo mo go wena. Gonne o tla nna sekaka ka bosakhutleng.” Morena a re jalo.

₂₇“Tlhomang sefoka mo lefatsheng, lo letse lonaka mo ditšhabeng! Baakanyang ditšhaba gore di tlhasele ene Babele. Biletsang magosi a Ararate le a Mini le a Asekenase kwa go ene. Laelang molaodi wa batlhabani go lwa nae. Bolotsang dipitse tse di tshwanang le tsie ya molome. ₂₈Baakanyang ditšhaba di lwe nae, e bong dikgosi tsa Media le balaodi ba teng le babusi botlhe ba teng le lefatshe lotlhe la puso ya bone. ₂₉Foo lefatshe le tla roroma, le le mo botlhokong, gonne Babele o dirafalelwa ke maikaelelo a Morena a gore naga ya Babele e fetoge sekaka se se se nang moagi. ₃₀Bagale ba Babele ba khutlile go tlhabana, ba itunna fela mo dikagong tsa phemelo. Ba feletswe ke thata, ba fetogile basadi. Matlo a gagwe a tshubilwe, diphemelo tsa gagwe di thubakantswe. ₃₁Mosiani o tla taboga, a kgatlhantsha mosiani; morongwi a kgatlhantsha morongwi gore ba itsise kgosi ya Babele fa motse wa yona o thopilwe gotlhe; ₃₂fa matsibogo a thibilwe, fa motlhaka o tshubilwe, fa batlhabani ba nyemile moko.” ₃₃Gonne Morena wa masomosomo, Modimo wa Iseraele, o bua jaana a re: “Morwadia Babele o tshwana le seboana, fa se katwa. Fa nakonyana e sena go feta, sebaka sa kotulo se tla mo tlela.”

₃₆Ke ka moo Morena a buang jaana a re: “Bonang, ke tla seka kgang ya lona, ke lo lefisetsa. Ke tla tšhesa lewatle la Babele, ke kgadisa metswedi ya gagwe. ₃₇Babele o tla fetoga mekoa ya marope le dikutla tsa diphokojwe le theregiso le tshotlego, fa go sa nneng ope. ₃₈Botlhe ba sa ntse ba bôpa jaaka ditawana, ba duma jaaka madumedi. ₃₉Mme e tla re ba gotetse ka keletso, ke ba baakanyetse moletlo, ke ba tagise gore ba tlhapelwe, ba robale thobalo e e sa khutleng, mme ba se ka ba thanya gape.” Morena o buile jalo. ₄₀“Ke tla ba isa tlhabong jaaka dikwanyana le diphelehu le diphoko.

₄₁“Kana Sesage o fentswe jang! Yo o neng a tumile mo lefatsheng lotlhe o thopilwe jang! Kana Babele o fetogile jang theregiso mo gare ga ditšhaba! ₄₂Lewatle le tlhatlogile, la bipa Babele; o khurumeditswe ke dintelo tsa lone tse di sumang. ₄₃Metse ya gagwe e fetogile marope le naga e e omeletseng le sekaka. Ke e go sa nneng ope mo go yona, e go sa feteng motho ope kwa go yona. ₄₄Ke tla otla modimo Bele wa Babele, ke ntsha tse o di meditseng mo leganong la ona. Ditšhaba ga di nke di tlhola di phuthegela kwa go ona.

“Dipota tsa Babele le tsona di tla wa. ₄₅Lona batho ba me, tswang mo go ene! A mongwe le mongwe a pholose bophelo jwa gagwe, a falole mo bogaleng jo bo tukang jwa Morena!

₄₆“E se re gongwe pelo tsa lona tsa nyema moko, lwa boifa, fa lo utlwa magatwe a a bolelwang mo lefatsheng, e le magatwe mangwe monongwaga, le a mangwe gape isago; fa go le kgatelelo mo lefatsheng, fa babusi ba tsogelana. ₄₇Ka moo itseng gore malatsi a tla tla, a ka ona ke tla otlang medimo ya diseto ya motse wa Babele. Lefatshe lotlhe la ona le tla nyatsega. Ba ba bolailweng botlhe ba ona ba tla namalala mo gare ga ona. ₄₈Legodimo le lefatshe le tsotlhe tse di mo go tsona di tla dudueletsa Babele, fa ba ba o fetolang sekaka ba tla kwa go ona ba tswa kwa bokone.” Morena o buile jalo. ₄₉“Babele le ene o tshwanetse go wa ka ntlha ya Baiseraele ba o ba bolaileng; kana ba ba bolailweng ba lefatshe lotlhe le bona ba ole ka ntlha ya ga Babele.

₅₀“Lona ba lo falotseng mo tšhakeng, tlogang, se diegeng! Gopolang Morena lo le kwa kgakala, lo gakologelwe Jerusalema ka dipelo tsa lona. ₅₁‘Re tlhabilwe ke ditlhong, fa re utlwa dikgobo. Nyatsego e ne e sosobanya difatlhego tsa rona. Gonne baeng ba tsenye mo go tse di boitshepo tsa Ntlo ya Morena.’ ₅₂Ka moo itseng gore malatsi a tla tla,” go bua Morena, “a ke tla otlang medimo ya diseto ya Babele ka ona; mme ba ba khutlegileng lwa go swa ba tla gwetla mo lefatsheng lotlhe la gagwe. ₅₃Le fa Babele a ka tlhatlogela kwa legodimong, le fa a ka godisa diphemelo tsa gagwe thata: Ba ba mo fetolang sekaka ba tla tla kwa go ene, ba romilwe ke nna,” go bua Morena.

₅₉Lefoko le moporofeti Jeremia o le laetseng Seraya, morwa Neria, morwa Mahaseya, jale fa Seraya a ya kwa Babele le Setekia, kgosi ya Juta, ka ngwaga wa bone wa puso ya gagwe. Seraya e ne e le mookamedi wa mathibelelo. ₆₀Jeremia o ne a kwala tatlhego yotlhe e e tla welang Babele mo lokwalong, e bong mafoko otlhe ao a a kwadilweng ka ga Babele. ₆₁Jaanong Jeremia a raya Seraya a re: “E re o fitlha kwa Babele, o bone ka fa o ka buisang mafoko aotlhe ao ka teng ₆₂o re: ‘Morena, wena o bopetse felo fa go go nyeletsa gore go se ka ga nna monni teng, le fa e le motho gongwe kgomo. Mme e tla nna marope fela ka bosakhutleng.’ ₆₃E re o sena go fetsa go buisa lokwalo loo, o lo bofelele mo letlapeng, o be o lo latlhele mo nokeng ya Ferathe, ₆₄o re: ‘Babele o tla nwela jalo, mme a se ke a tsoge gape ka ntlha ya tatlhego e ke e mo tlisetsang. – Mme ba tla lapa.’ ”

Mafoko a ga Jeremia a felela fa.