JOŠUA 1

₁Morago ga loso lwa ga Moše, motlhanka wa Morena, Morena a raya Jošua morwa Nune, modiredi wa ga Moše, a re: ₂“Moše, motlhanka wa me o sule. Jaanong tloga o tshele noka e ya Joretane wena le morafe otlhe o, lo tsene mo lefatsheng le ke le nayang bone Baiseraele. ₃Felo gongwe le gongwe kwa dipato tsa dinao tsa lona di tla gatang teng ke go lo neile jaaka ke boleletse Moše. ₄Go tloga kwa sekakeng le kwa Lebanone go ya go fitlha kwa nokeng e kgolo, e bong ya Ferathe – lefatshe lotlhe la Bahethe – le go fitlha kwa lewatleng le legolo le le kwa bophirimatsatsi, e tla nna naga ya lona. ₅Ga go na ope yo o tla kgonang go emelana nao ka malatsi otlhe a bophelo jwa gago. Ke tla nna nao jaaka ke ne ke na le Moše. Ga nkitla ke go nyemisa moko le e seng go go tlogela. ₆Tia o nne pelokgale; gonne lefatshe le ke le ikanetseng borraabo go le ba naya, wena o tla le abela morafe o go nna boswa jwa ona. ₇Fela o tie, o nne pelokgale thata go ela tlhoko gore o dire ka fa molaong otlhe o Moše, motlhanka wa me, a o go laetseng. Se o fapoge mo ntlheng ya le le jang le e seng mo go ya la molema gore tiro ya gago e tswelele pele sentle gongwe le gongwe kwa o tla yang teng. ₈A lokwalo lo lwa molao lo se tloge mo molomong wa gago, o lo akanye bosigo le motshegare gore o ele tlhoko go dira tsotlhe ka fa di kwadilweng ka teng mo go lone; gonne foo o tla tlhogonolofala mo ditseleng tsa gago; foo o tla tswelela pele sentle. ₉Kana ke go laetse ka re: Tia o nne pelokgale! Ka moo se rerege, o se kgobege marapo. Gonne Morena, Modimo wa gago, o na nao gongwe le gongwe kwa o tla yang teng.”

₁₀Jaanong Jošua a laola baokamedi ba morafe a re: ₁₁“Ralalang bothibelelo, lo laele morafe lo re: ‘Ipaakanyetseng mefago, gonne lo tla tshela Joretane yo morago ga malatsi a le mararo gore lo tsene lo thope lefatshe le Morena, Modimo wa lona, o le lo nayang gore e nne la lona.’ ”

₁₂Gape Jošua a raya Barubene le Bagate le ba bontlhanngwe jwa lotso lwa Manase a re: ₁₃“Gakologelwang lefoko le Moše, motlhanka wa Morena, o le lo laetseng a re: ‘Morena, Modimo wa lona, o lo ikhutsisitse, a lo naya lefatshe le.’ ₁₄A go sale basadi ba lona le bana ba lona le diruiwa tsa lona mo lefatsheng le Moše o le lo neileng ka kwano ga Joretane, mme lona lotlhe ba lo leng bagale ba mephato, tshelang lo etelele ba ga lona pele lo tshotse marumo, lo ba thuse, ₁₅go fitlhelela Morena a be a ikhutsise bomorwa-rraeno jaaka lona, mme le bone ba be ba thopile lefatshe le Morena, Modimo wa lona, o tla le ba nayang. Morago ga moo lo ka boela kwa lefatsheng le e leng la lona, lwa le rua, le Moše, motlhanka wa Morena, o le lo neileng ka kwano ga Joretane ntlheng ya botlhabatsatsi.”

₁₆Ba araba Jošua ba re: “Re tla dira tsotlhe tse o di re laelang; re tla ya gongwe le gongwe kwa o re romang teng. ₁₇Re tla go utlwa mo dilong tsotlhe fela jaaka re utlwile Moše. Fela a Morena, Modimo wa gago, a nne nao jaaka a ne a na le Moše. ₁₈Mongwe le mongwe yo o ganetsang se o se bolelang, a sa utlwe mafoko a gago mo go tsotlhe tse o di re laelang, a a bolawe! Fela tia, o nne pelokgale.”