LEFITIKO 6

₁Morena a ba a raya Moše a re: ₂“Fa Motho a leofa, a direla Morena ka boikanyologo, a latolela mongwe-ka-ene tse o neng a di mmoloketse gongwe tsa peeletso gongwe tse di amogileng, gongwe a patika mongwe-ka-ene; ₃gongwe fa a thwetse sengwe se se latlhegileng, mme a se latola, gongwe a ikana ka maaka ka ntlha ya sengwe le sengwe se batho ba tleng ba leofe ka sona; ₄fa a leofa jalo a nna molato, gona a a buse tse o di amogileng gongwe tse o di bonyeng ka kgatelelo gongwe tse o di neetsweng go di boloka fa go ene, gongwe tse o di thwetseng di latlhegile; ₅le fa e le sengwe le sengwe se o ikanneng ka maaka ka ntlha ya sona: A a se buse ka botlalo, a ba a se oketse ka karolo ya botlhano ya sona; a se nee mong wa sona ka letsatsi la setlhabelo sa molato sa gagwe. ₆A be a tlisetse Morena tefo ya boikwatlhao jwa gagwe, e bong phelehu ya letsomane la gagwe e e se nang bogole e o e bonang e lekanye tshenyo, go nna setlhabelo sa molato, a e ise kwa go moperesiti. ₇Mme a moperesiti a mo ruanye fa pele ga Morena, foo o tla itshwarelwa sengwe le sengwe se motho o ka se dirang, a nna molato ka sona.”

₈Morena a ba a raya Moše a re: ₉“Laela Arone le bomorwawe o re: ‘Molao wa setlhabelo sa phiso ke o: A sona setlhabelo sa phiso se lale mo leisong mo aletareng bosigo jotlhe go ya mosong gore molelo wa aletare o tukele ruri ka sona. ₁₀Jaanong a moperesiti a apare kobo ya gagwe ya letseta, a be a apare borokgwe jwa letseta mo mmeleng wa gagwe, a olele molora fa molelo o fisitseng setlhabelo sa phiso teng mo aletareng, a o tshololele fa thoko ga aletare. ₁₁A be a apole diaparo tseo tsa gagwe, a apare diaparo tse dingwe, a ntshetse molora kwa ntle ga bothibelelo kwa felong fa go phepa. ₁₂Mme a molelo o tukele ruri ka setlhabelo mo aletareng, o se ka wa tima ka gope, mme moperesiti a bese molelo ka dikgong mo go yona mo mosong mongwe le mongwe, a be a rulaganye setlhabelo sa phiso mo go ona, a fise mafura a ditlhabelo tsa tebogo mo godimo ga sona. ₁₃A molelo o tuke ka gale mo aletareng, o se ka wa tima.

₁₄“ ‘Molao wa tshupelo ya dijo ke o: A bomorwa Arone ba e tsise fa pele ga Morena kwa aletareng. ₁₅Moperesiti a be a tabole mo go yona ka seatla se tletse, e bong mo bupeng jo bo boleta jwa tshupelo ya dijo jo bo nang le lookwane le tse di nkgang monate tsotlhe tse di mo godimo ga tshupelo ya dijo, mme tse di fisiwang tseo a di fise mo aletareng e le monko o o monate mo Moreneng. ₁₆Mme se se setseng sa yona a Arone le bomorwawe ba se je; a se jewe mo Felong-fa-go-Boitshepo se sa bedisiwa; a ba se je mo lapeng la Tente ya Boipontsho. ₁₇A se besiwe, se sa bedisiwa. Ke se ba abetse se tswa mo ditshupelong tsa me tsa molelo; ke se se boitshepotshepo jaaka setlhabelo sa boleo le sa molato. ₁₈A ba batonanyana botlhe ba bana ba ga Arone ba se je. Ke tshiamelo ya ditshika tsa lona mo ditshupelong tsa molelo tsa Morena go ya go ileng. Mongwe le mongwe yo o se amang o tla itshepa.’ ”

₁₉Morena a ba a raya Moše a re: ₂₀“Neo ya tshupelo ya ga Arone le bomorwawe e ba tshwanetseng go e tlisetsa Morena ka letsatsi le mongwe wa bone a tlodiwang ka lone ke karolo ya lesome ya efa ya bupe jo bo boleta jwa tshupelo ya dijo ya ka gale, bontlhanngwe jwa yona mo mosong le bontlhanngwe maitsiboa. ₂₁A e gadikwe ka lookwane mo paneng, o e tlise e dubilwe, gongwe o tlise tshupelo ya dijo e le dithathana tse di besitsweng go nna monko o o monate mo Moreneng. ₂₂A moperesiti yo o tloditsweng mo boemong jwa gagwe e le mongwe wa bomorwawe a e baakanye. Ke molao o o sa khutleng wa Morena. A e fisiwe yotlhe. ₂₃A tshupelo ya dijo nngwe le nngwe ya moperesiti e fisiwe yotlhe; e se ka ya jewa.”

₂₄Morena a ba a raya Moše a re: ₂₅“Raya Arone le bomorwawe o re: ‘Molao wa setlhabelo sa boleo ke o: A setlhabelo sa boleo se tlhajwe fa pele ga Morena mo felong fa setlhabelo sa phiso se tlhabelwang teng: ke se se boitshepotshepo. ₂₆Moperesiti yo o dirang setlhabelo sa boleo a a se je; a se jelwe mo Felong-fa-go-Boitshepo mo lapeng la Tente ya Boipontsho. ₂₇Mongwe le mongwe yo o amang nama ya sona o tla itshepa. Mme fa madi mangwe a sona a phatšhegela mo seaparong, seaparo se se phatšhegetsweng o se tlhatswetse mo Felong-fa-go-Boitshepo. ₂₈Mme a pitsa ya letsopa e se apeilweng ka yona e thubiwe; mme fa se apeilwe ka pitsa ya kgotlho a e gotlhiwe, e tsokodiwe ka metsi. ₂₉Ba batonanyana botlhe ba baperesiti ba ka se ja, ke se se boitshepotshepo. ₃₀Mme setlhabelo sengwe le sengwe sa boleo se madi mangwe a sona a isiwang kwa teng ga Tente ya Boipontsho go dira thuanyo mo Felong-fa-go-Boitshepo, sona se se ka sa jewa, mme se fisiwe sotlhe ka molelo.