NUMERI 25

₁E rile Baiseraele ba ntse ba le kwa Sitime, batho ba simolola go dira boaka le bomorwadia Moabe; ₂bone ba laletsa batho go tla ditlhabelong tsa medimo ya bone, mme batho ba a ja, ba obamela medimo ya bone. ₃Jaanong ya re Baiseraele ba ineela Baale-Pheore jalo, Morena a ba tukela bogale. ₄Morena a ba a raya Moše a re: “Tsaya bagolo botlhe ba morafe, lo kaleletse Morena ba ba molato mo mogoteng wa letsatsi gore bogale jo bo tukang jwa Morena bo tle bo tloge mo Baiseraeleng.” ₅Jaanong Moše a raya baatlhodi ba Iseraele a re: “A mongwe le mongwe wa lona a bolae banna ba ga gabo ba ba ineetseng Baale-Pheore.”

₆A sa ntse a re jalo, ga tla monna wa Moiseraele, a tlisa mosadi wa Momidiane kwa go ba ga gabo mo matlhong a ga Moše le mo matlhong a phuthego yotlhe ya Baiseraele, ba ba neng ba lela kwa mojakong wa Tente ya Boipontsho. ₇Ya re Phinehase morwa Eleasare, morwa moperesiti Arone, a bona jalo, a nanoga mo phuthegong, a tsaya lerumo ka seatla; ₈a latela monna wa Moiseraele kwa ntlwaneng ya borobalo, a ba phololetsa ka bobedi jwa bone, monna wa Moiseraele le mosadi, mo dimpeng tsa bone. Petso ya thibelwa jalo, ya tlosiwa mo Baiseraeleng. ₉Ba ba neng ba sule ka petso eo ba ne ba le 24 000.

₁₀Morena a ba a raya Moše a re: ₁₁“Phinehase morwa Eleasare morwa moperesiti Arone, o tlositse bogale jwa me mo Baiseraeleng ka go dira petso ya lefufa la me mo gare ga bone gore ke se ka ka fedisa Baiseraele ka lone. ₁₂Ke ka moo ke reng: ‘Bona, ke tla mo naya kgolagano ya me ya kagiso. ₁₃Kgolagano ya boperesiti jwa metlha yotlhe e tla nna ya gagwe le ya losika lwa gagwe sehularong sa gagwe, ka a ne a tlhoafalela Modimo wa gagwe, a direla Baiseraele thuanyo.’ ”

₁₄Leina la monna wa Moiseraele yo o bolailweng le mosadi wa Momidiane e ne e le Simeri morwa Salo, mogogi wa kgotla nngwe ya Basimeone. ₁₅Leina la mosadi wa Momidiane yo o bolailweng e ne e le Khosebi morwadia Sure, tlhogo ya kgoro nngwe mo go Bamidiane.

₁₆Morena a ba a raya Moše a re: ₁₇“Ilang Bamidiane, lo ba bolae! ₁₈Gonne ba lo diretse jaaka baba ka bolotsana jwa bone, fa ba lo obamedisa Baale-Pheore, le ka go lo raela ka Khosebi morwadia kgosana ya Bamidiane, kgaitsadia-bone yo o bolailweng ka letsatsi la petso ka ntlha ya ga Baale-Pheore.”