DIANE 29

₁Monna yo o gagamatsang molala, le fa a kgalemetswe gantsi, o tla pšhwetlakanngwa ka tshoganyetso, mme go se na thuso.

₂Fa basiami ba ntsifala, morafe o a itumela; fa baikepi ba busa, morafe o a fegelwa.

₃Monna yo o ratang botlhale o itumedisa rraagwe; mme yo o kopanang le diaka o fetsa dithoto tsa gagwe.

₄Kgosi e phedisa lefatshe sentle ka tshiamo, mme yo o kgethisang batho go feta tekanyo o a le tubaka.

₅Monna yo o buang mafoko a a borethe le mongwe-ka-ene o ngamolela dinao tsa gagwe serai.

₆Go na le mutlwane mo tseleng ya monna yo o bosula, mme mosiami o ka siana a thabile.

₇Mosiami o itse tse di tshwanetseng ba babotlana, mme moikepi ga a di lemoge, ga a di itse.

₈Basotli ba tsosa moferefere mo motseng, mme ba ba botlhale ba tima bogale.

₉Fa motlhalefi a seka le lesilo, le tla tlhodia le tshega, mme go se na boikhutso.

₁₀Banna ba ba tshololang madi ba tlhoa mmoifi-Modimo; ba batla go bolaya ba e leng ba nnete.

₁₁Lesilo le ntsha bogale jotlhe jwa lone, mme letlhale le bo kokobetse morago.

₁₂Mmusi yo o utlwelelang mafoko a maaka, badiredi ba gagwe ke baikepi fela.

₁₃Mohumanegi le mogateledi ba a kgatlhana; Morena o sedimosa matlho a bobedi jwa bone.

₁₄Kgosi e e direlang ba babotlana tse di ba tshwanetseng ka boikanyo, sedulo sa yona sa bogosi se tla tlhomama ka bosakhutleng.

₁₅Thupa le kgalemelo di a tlhalefisa; mme mosimane yo o itaolang o tlhabisa mmaagwe ditlhong.

₁₆Fa baikepi ba ntsifala, go ntsifala maleo, mme basiami ba tla bona tatlhego ya bone, ba itumela.

₁₇Otla ngwana wa gago, mme o tla go ikhutsisa, a go thabisa pelo.

₁₈Fa go se na pono ya moporofeti, batho ba itaola fela, mme go sego yo o tshegetsang molao.

₁₉Motlhanka ga a siamisiwe ka mafoko; le fa a a tlhaloganya, ga a a kgathalale.

₂₀Fa o bona monna yo o bonako mo puong ya gagwe, lesilo le solofelwa go ka tlhabologa bogolo go ene.

₂₁Yo o lêmang motlhanka wa gagwe go tloga bonyaneng, la bofelo o tla mmona a nna matepe.

₂₂Monna yo o bogale o losa batho; yo o pelo-khutshwane o leofa gantsi.

₂₃Boikgodiso jwa motho bo tla mo isa tlase, mme yo o ikokobetsang o tla bona tlotlo.

₂₄Yo o jang le legodu o a itlhoa; o utlwa go rogakwa yo o sa begeng legodu, mme ga a le bege.

₂₅Go boifa batho go tlisa serai, mme yo o ikanyang Morena o tla femelwa.

₂₆Ba bantsi ba batla sefatlhego sa mmusi, mme tshiamelo ya motho e tswa mo Moreneng.

₂₇Yo o dirang ka tshiamololo o ilwa ke basiami; wa tsamao ya nnete o ilwa ke moikepi.