DIPESALEME 26

Ntshiamisetsa, Morena,

gonne ke ntse ke tsamaya

ke se na molato,

ke ikantse Morena

ke sa tshikinyege.

₂Ntlhotlhomise, Morena, o nkeleke;

tlhatlhoba diphilo tsa me

le pelo ya me.

₃Gonne bopelotlhomogi jwa gago

bo fa pele ga matlho a me,

mme ke tsamaya

mo boaammaaruring jwa gago.

₄Ga ke nne le batho ba maaka,

ga ke phele le maferefere.

₅Ke ila phuthego ya basulafatsi,

mme ga ke nne le baikepi.

₆Ke tlhapa diatla

mo bosenangmolato,

mme ke tla potologa

aletare ya gago, Morena,

₇gore ke utlwatse lentswe la pako

le go bolela dikgakgamatso tsotlhe

tsa gago.

₈Morena, ke rata boago

jwa Ntlo ya gago,

e bong felo fa kgalalelo ya gago

e agileng teng.

₉Se gogoreletse mowa wa me

le baleofi,

le e seng bophelo jwa me

le batshololamadi;

₁₀ba go leng ditshenyo

mo diatleng tsa bona,

ba mabogo a a jang a bona

a tletseng theko ya phaposo.

₁₁Mme nna ke tsamaya

ke se na molato.

Nkgolola, Morena,

o be o intshwarele.

₁₂Lonao lwa me lo eme

mo patlelong, ke tla tumisa

Morena mo diphuthegong.