DIPESALEME 44

₂Modimo, re utlwile ka ditsebe,

borraetsho ba re boleletse ba re,

o dirile tiro mo metlheng ya bona,

malatsing a bogologolo.

₃O lelekile merafe

ka letsogo la gago,

mme bona wa ba tlhoma;

o sentse ditšhaba,

mme bona wa ba anamisa.

₄Gonne ba ruile lefatshe,

e seng ka marumo a bona,

e bile ga se mabogo a bona

a a ba neileng phenyo;

mme ke seatla sa gago se se jang

le letsogo la gago

le lesedi la sefatlhego sa gago;

gonne o ne o natefelwa ke bona.

₅Modimo, ke wena kgosi ya me;

laolela Jakobe diphenyo.

₆Re tla diga baganetsi ba rona

ka wena;

ba ba re tsogelang re tla ba gataka

ka leina la gago.

₇Gonne ga ke ikanye bora jwa me,

le tšhaka ya me

ga e nke e mpha phenyo.

₈Mme ke wena o re namolang baba,

o tlhabisa ba ba re tlhoileng

ditlhong.

₉Re tla ipelafatsa ka gale

ka Modimo;

re baka leina la gago

ka bosenabokhutlo. Sela.

₁₀Le fa go ntse jalo o re latlhile,

wa re tlhabisa ditlhong,

mme ga o a bolola

le mephato ya rona.

₁₁O re katisa ka morago

fa pele ga mmaba,

mme ba ba re tlhoileng

ba thopa di-tsa-rona.

₁₂O re abetse go tlhajwa jaaka dinku;

o re faladitse mo merafeng.

₁₃O rekisitse batho ba gago

ka tlhwatlhwa e e seng ya sepe;

wa se ka wa bapala sepe

ka tlhwatlhwa ya bona.

₁₄O re dira nyatsego

mo go ba re bapileng nabo,

le tshotlo le setshego

mo go ba ba tikologong ya rona.

₁₅O re dira seane mo ditšhabeng,

re ba ba thukhuthelwang ditlhogo

ke merafe.

₁₆Tshotlego ya me

e eme fa pele ga me ka gale;

ditlhong tsa sefatlhego sa me

di nkhurumeditse

₁₇ka ntlha ya go utlwa mosotli

le mokgadi,

le ka ntlha ya go bona mmaba

le moipusolosetsi.

₁₈Tsotlhe tseo di re wetse,

etswe re sa go lebala

le e seng go ikanyologa

kgolagano ya gago.

₁₉Dipelo tsa rona

ga di a ka tsa kata ka morago,

le dinao tsa rona ga di a ka

tsa fapoga tsela ya gago.

₂₀Le fa go ntse jalo o re papetletse

mo mafelong a diphokojwe,

wa re khurumetsa

ka moriti wa loso.

₂₁Fa re ka bo re lebetse

leina la Modimo wa rona,

gongwe ra otlololela

modimo wa seeng mabogo,

₂₂a Modimo o ka bo

o sa go tlhotlhomisa,

ka e le ona o o itseng

se se fitlhegileng mo pelong?

₂₃Mme re tlhola re bolawa

ka ntlha ya gago,

re kaiwa jaaka dinku tsa tlhabo.

₂₄Thanya, Morena! O robaletseng?

Tloga o eme,

o se ka wa re latlhela ruri.

₂₅O fitlhelang sefatlhego sa gago,

o lebalelang pogisego ya rona

le patikego ya rona?

₂₆Gonne mewa ya rona

e obegetse mo loroleng,

mebele ya rona e kgomaretse mmu.

₂₇Nanoga o re thuse, o be o re golole

ka ntlha ya bopelotlhomogi

jwa gago.