DIPESALEME 78

Lona batho ba me,

reetsang thuto ya me,

sekegelang mafoko

a molomo wa me ditsebe.

₂Ke tla tswa molomo,

ke bolela seane,

ke ntsha dinyepo tsa bogologolo.

₃Tse re di utlwetseng, ra di itse,

tse borraetsho ba di re boleletseng,

₄ga re ka ke ra di lobela

bana ba bona;

re tla bolelela losika lo lo tlang

ditiro tsa pako tsa Morena,

le thata ya gagwe,

le dikgakgamatso tse a di dirileng.

₅Gonne o tlhomile tshupo

mo go Jakobe,

a baya molao mo go Iseraele

o a o laetseng borraetsho

gore ba o itsise bana ba bona,

₆gore losika lo lo tlang lo o itse,

e bong bana ba ba tla tsalwang,

gore ba tle ba o bolelele

bana ba bona,

₇le gore ba ikanye Modimo,

mme ba se lebale

ditiro tsa Modimo,

mme ba tshegetse ditaolo tsa ona

₈gore ba se nne jaaka borraabo

ba e neng e le losika lo lo

tlhogo-e-thata lwa borukhutlhi,

losika lo lo tlhokang

pelo ya tlhomamo le mowa

o o lebileng Modimo ka boikanyo.

₉Baeferaime ba ba neng

ba ipaakantse go hula ka bora,

ba menoga, ba tshaba ka letsatsi la tlhabano.

₁₀Ga ba a ka ba tlhokomela

kgolagano ya Modimo,

ba bile ba ganne go tsamaya

ka fa molaong wa ona;

₁₁ba lebala ditiro tsa ona

le dikgakgamatso

tse o di ba bontshitseng.

₁₂O dirile dikgakgamatso

fa pele ga borraabo

kwa lefatsheng la Egepeto,

mo nageng ya Soane.

₁₃O kgaogantse lewatle,

wa ba tshedisa;

wa emisa metsi jaaka lobota.

₁₄Motshegare o ne wa ba goga

ka leru,

mme bosigo jotlhe

ka lesedi la molelo.

₁₅O phatlotse mafika mo sekakeng,

wa ba nosa ka botlalo

jaaka ka merwalela.

₁₆O ne wa ntsha dinokana

mo lefikeng,

wa eledisa metsi jaaka dinoka.

₁₇Mme ba fela ba tswelela pele

go o leofela,

ba rukhutlhegela Mogodimodimo

kwa nageng e e omileng.

₁₈Ba leka Modimo

mo dipelong tsa bona

ka go lopa dijo

ka fa kgatlhegong ya bona.

₁₉Ba bua kgatlhanong le Modimo

ba re:

“A Modimo o ka baakanya bojelo

mo sekakeng?

₂₀Ee, o iteile lefika, metsi a ba a ela,

dinokana tsa phothosela.

Mme a senkgwe le sona

o ka se ntsha,

gongwe wa naya batho ba ona

nama?”

₂₁Ke gona e rileng Morena a utlwa,

a tuka bogale;

molelo wa tukela Jakobe, ee,

bogale jwa tsogela Iseraele,

₂₂ka ba se ka ba dumela Modimo,

le e seng go ikanya thuso ya ona.

₂₃Jaanong wa laela maru

kwa godimo,

wa bula mejako ya legodimo.

₂₄Wa ba nesetsa Mmana go o ja,

wa ba naya mabele a legodimo.

₂₅Ba ja sejo sa baengele,

wa ba romela mfago, ba kgora.

₂₆O ne wa fokisa phefo

ya botlhabatsatsi kwa legodimong,

wa phunya phefo ya borwa

ka thata ya ona.

₂₇Wa ba nesetsa nama jaaka lerole

le dinonyane tse di diphuka

jaaka motlhaba wa lewatle.

₂₈Wa di digela mo bothibelelong

jwa bona

tikologong ya maago a bona.

₂₉Foo ba ja, ba kgora thata;

wa ba tsisetsa

tse ba neng ba di eleditse.

₃₀E rile ba ise ba bakele

keletso ya bona,

nama e sa ntse e le mo maganong

a bona,

₃₁bogale jwa Modimo jwa ba tsogela,

mme wa bolaya ba ba nonneng

mo go bona,

wa namalatsa makau a Iseraele.

₃₂Mme ba tlhokomologa tsotlhe tseo,

ba fela ba leofela pele,

ba se ka ba dumela

dikgakgamatso tsa ona.

₃₃Ka moo wa fedisa malatsi a bona

mo bosengsepe,

le dinyaga tsa bona mo theregong.

₃₄Mme e ne ya re fa o ba bolaya,

ba botse ka ga ona, ba tlhabologe,

ba batle Modimo;

₃₅ba gakologelwe,

fa Modimo e le lefika la bona,

mme Modimo Mogodimodimo

e le mogolodi wa bona.

₃₆Mme ba rata go o kgona

ka melomo ya bona,

ba o aketsa ka diteme tsa bona;

₃₇mme dipelo tsa bona

di ne di sa o ineele ka tlhomamo,

ba sa tlhokomele kgolagano ya ona

ka boikanyego.

₃₈Mme ona

ka o le kutlwelo-botlhoko,

o ne o itshwarela molato,

o sa ba nyeletse; e bile

o ne o busa bogale jwa ona gantsi,

o sa tsose kgakalo yotlhe ya ona.

₃₉O ne o gopola,

fa bona ba le nama fela,

ba le mowa o o fetang,

o o sa tlholeng o ka boa.

₄₀Ba ne ba o rukhutlhegela gantsi

jang ne kwa sekakeng,

ba o hutsafatsa kwa gareganaga.

₄₁Ba leka Modimo gangwe le gape,

ba kgopisa Moitshepi wa Iseraele.

₄₂Ba ne ba se ke ba gakologelwa

letsogo la ona,

le e seng letsatsi le o ba

namoletseng mmaba ka lone,

₄₃jale fa o ne o dira ditshupo tsa ona

kwa lefatsheng la Egepeto,

le dikgakgamatso tsa ona

mo nageng ya Soane.

₄₄O ne wa fetola metsi a dinoka

tsa bona madi,

le a dinokana tsa bona

gore ba retelelwe ke go nwa.

₄₅Wa ba romela diboba, tsa ba loma,

le digwagwa, tsa ba senyetsa.

₄₆Thobo ya bona

wa e naya segongwane,

le leungo la matsapa a bona

wa le naya tsie.

₄₇Wa senya moweine wa bona

ka sefako,

le megokare wa bona ka serame.

₄₈Wa bolaya dikgomo tsa bona

ka sefako,

le matsomane a bona ka ditladi.

₄₉Wa ba romela bogale jo bo tukang

jwa ona,

le kgakalo le kgalefo le pitlagano,

lesomo leo la barongwi ba tlalelo.

₅₀Wa baakanyetsa bogale jwa ona

tsela,

wa se ka wa thibela mewa ya bona

go ya losong,

wa neela leroborobo

maphelo a bona.

₅₁Wa itaya maitibolo a tsotlhe

mo lefatsheng la Egepeto,

le bana ba ntlha ba thata ya bona

mo ditenteng tsa ga Hame.

₅₂Mme batho ba ona

wa ba bolotsa jaaka dinku,

wa ba goga mo sekakeng

jaaka letsomane.

₅₃Wa ba tsamaisa tshireletsong,

mo ba sa boifeng sepe;

mme baba ba bona,

lewatle la ba nwetsa.

₅₄Wa ba fitlhisa kwa lefatsheng

le le boitshepo la ona,

kwa thabeng e letsogo

le le jang la ona le e thopileng.

₅₅Mme wa leleka merafe

fa pele ga bona,

wa ba ruisa lefatshe la yona

jaaka boswa

jo ba bo lekanyeditsweng,

wa agisa ditso tsa Iseraele

mo matlong a bona.

₅₆Mme bona ba ne ba leka Modimo,

Mogodimodimo,

ba o rukhutlhegela,

ba sa tlhokomele ditshupo tsa ona.

₅₇Ba ikepa, ba dira ka boikanyologo

jaaka borraabo;

ba boela kwa morago

jaaka bora jo bo sa ikanngweng.

₅₈Ba o kgopisa ka dithota

tsa tlhabelo tsa bona,

ba tsosa lefufa la ona

ka medimo ya diseto ya bona.

₅₉E rile Modimo o utlwa,

wa galefa, wa latlha Iseraele gotlhe,

₆₀wa ba wa tlogela Taberenakele

ya kwa Silo,

e bong tente e o neng o e tlhomile

mo bathong.

₆₁Mme thata ya ona

wa e neela mo botshwarong

le kgalalelo ya ona ya ona

mo letsogong la mmaba.

₆₂Batho ba ona

wa ba neela mo tšhakeng;

boswa jwa ona wa bo gakalela.

₆₃Molelo o jele makau a bona;

makgarebe a bona ga a ka a

tlhabelwa mogolokwane wa nyalo.

₆₄Baperesiti ba bona

ba ole ka tšhaka,

mme batlholagadi ba bona

ba palelwa ke go ba lelela.

₆₅Foo Morena a thanya

jaaka mongwe yo o ne a robetse,

jaaka mogale yo o neng a fentswe

ke weine.

₆₆A itaya baganetsi ba gagwe,

a ba busetsa kwa morago,

a ba tsisetsa tshotlego

e e sa khutleng.

₆₇Ke go re:

A latlha tente ya ga Josefa,

a se ka a itlhaolela lotso

lwa ga Eferaime,

₆₈mme a itlhaolela lotso lwa ga Juta,

thaba ya Sione e a e ratang.

₆₉A aga Felo-ga-Boitshepo ga gagwe

jaaka bogodimo jwa legodimo,

jaaka lefatshe le o le thaetseng

bosakhutleng.

₇₀A itlhaolela Dafita,

motlhanka wa gagwe,

a mo tsaya a le kwa merakeng

ya dinku.

₇₁A mo tlosa a disitse dinku

tse di amusang

gore a dise Jakobe,

batho ba gagwe,

le Iseraele, boswa jwa gagwe.

₇₂Mme o ne a ba disa ka fa pelong

ya boammaaruri ya gagwe,

a ba tsamaisa ka diatla

tse di maatlametlo.