DIPESALEME 95

₁Tlayang a re dudueletseng

Morena,

re ipeleleng lefika la pholoso

ya rona.

₂A re tleng fa pele ga sefatlhego

sa gagwe ka malebogo,

re mo ipeleleng ka dikopelo

tsa pako.

₃Gonne Morena

ke Modimo o mogolo,

ke kgosi e kgolo,

mmusi wa medimo yotlhe,

₄yo mateng a lefatshe

a leng mo seatleng sa gagwe,

yo ditlhoa tsa dithaba

e leng tsa gagwe;

₅yo lewatle e leng la gagwe,

o le tlhodile;

le lefatshe le le omileng

ke la gagwe,

diatla tsa gagwe di le bopile.

₆Tlayang a re obameleng, re iname,

re khubame fa pele ga Morena,

Mmopi wa rona.

₇Gonne ke ene Modimo wa rona;

rona re batho

ba bofulo jwa gagwe

le dinku tsa seatla sa gagwe.

E kete lo ka bo lo utlwa

lentswe la gagwe kajeno!

₈“Se thatafatseng dipelo tsa lona

jaaka kwa Meriba

le ka letsatsi la Masa mo sekakeng,

₉kwa borraalona ba nthaetseng teng,

ba nteka,

etswe ba bonye ditiro tsa me.

₁₀Ke ne ka tenwa ke morafe

oo dinyaga di le 40,

ka bua ka re: ‘Batho ba,

ke ba ba dipelo di timetseng,

ga ba itse ditsela tsa me.’

₁₁Ke gona ka moo ke ikanneng

mo bogaleng jwa me ka re:

‘Ga ba nke ba tsena

mo boikhutsong jwa me.’ ”