DIPESALEME 96

₁Opelelang Morena

sefela se sešwa;

opelelang Morena,

lona mafatshe otlhe!

₂Opelelang Morena,

lo bake leina la gagwe,

utlwatsang pholoso ya gagwe

ka letsatsi lengwe le lengwe!

₃Bolelang kgalalelo ya gagwe

mo merafeng le dikgakgamatso

tsa gagwe mo bathong botlhe!

₄Gonne Morena o mogolo,

pako e kgolo e mo tshwanetse;

o boitshega

bogolo go medimo yotlhe.

₅Gonne medimo yotlhe ya merafe

ga se ya sepe;

mme Morena o dirile magodimo.

₆Borena le kgalalelo

di fa pele ga gagwe;

thata le bontle di mo Felong

ga gagwe ga Boitshepo.

₇Ntshetsang Morena,

lona ditso tsa merafe,

ntshetsang Morena

kgalalelo le thata!

₈Ntshetsang Morena

kgalalelo ya leina la gagwe,

tlisang ditshupelo,

lo tsene mo malapeng a gagwe!

₉Obamelang Morena

ka mokgabo o o boitshepo;

roromang fa pele

ga sefatlhego sa gagwe,

lona mafatshe aotlhe!

₁₀Buang mo merafeng lo re:

“Morena ke kgosi;

o thaile lefatshe

gore le se tshikinyege;

o tla atlhola batho ka tshiamo.”

₁₁A magodimo a itumele,

a lefatshe le duduetse,

a lewatle le gwase

le tse di tletseng mo go lone.

₁₂A naga e ipele

le tsotlhe tse di mo go yona;

ke gona ditlhare tsotlhe tsa sekgwa

di tla duduetsang

fa pele ga Morena;

₁₃gonne o e tla,

o tsile go atlhola lefatshe;

o tla atlhola lefatshe ka tshiamo

le batho ka boammaaruri

jwa gagwe.