1 DITIRAFALO 12

₁Ba ke ba ba neng ba tla kwa go Dafita kwa Sitlage fa a sa ntse a lelekwa ke Saule morwa Khiše. Le bone e ne e le bagale ba ba thusitseng mo ntweng. ₂Ba ne ba tshotse mara, ba itse go konopa ka seragamajwe le go hula metsu ka bora ka letsogo le le jang le ka la molema. Ba ga gabo Saule ba Babenyamene e ne e le ba: ₃Ahiesere yo e leng tlhogo le Joase morwa Semaa wa kwa Gibea; le Jesiele le Phelete bomorwa Asemawethe le Beraga le Jehu wa kwa Anathothe; ₄le Isemaya wa kwa Gibeone mogale mo go ba ba 30 le molaodi wa ba ba 30; le Jeremia le Jahasiele le Johanane le Josabate wa kwa Ketera ₅le Elusai le Jerimothe le Bealea le Semaria le Sefatya wa kwa Harufe ₆le Elekana le Isia le Asarele le Joesere le Jasobeame ba ga gabo Kora; ₇le Joela le Sebatya bomorwa Jerohame wa kwa Ketore.

₈Le bangwe ba Bagate ba itomololela kwa go Dafita kwa thabeng e e femetsweng sekakeng, e le bagale ba ba pelokgale, banna ba mephato ba ba itseng go tlhabana ba ba tshwereng thebe le lerumo, ba le difatlhego tsa tau, ba le lebelo jaaka mefele kwa dithabeng. ₉Esere e ne e le tlhogo, wa bobedi e le Obatya, wa boraro e le Eliabe, ₁₀wa bone e le Misemana, wa botlhano e le Jeremia, ₁₁wa borataro e le Athai, wa bosupa e le Eliele, ₁₂wa robedi e le Johanane, wa robongwe e le Elesabate, ₁₃wa some e le Jeremia, wa some nngwe e le Magebanai.

₁₄Bao e ne e le Bagate, e le ditlhogo tsa mephato; yo mmotlana wa bona a kgona ba le lekgolo, yo mogolo a kgona ba le sekete. ₁₅Ke bone ba ba neng ba tshela noka ya Joretane e tletse dintshing tsotlhe, e bile e tlhatsa ka kgwedi ya ntlha, ba leleka baagi botlhe ba megorogoro ntlheng ya botlhabatsatsi le ntlheng ya bophirima.

₁₆Le gona ga tla bangwe ba Babenyamene le ba Bajuta kwa thabeng e e femetsweng kwa go Dafita. ₁₇Ke fa Dafita a ba kgatlhantsha, a simolola go bua a ba raya a re: “Fa lo tsile kwano go nna ka kagiso go nthusa, foo ke tla ikopanya le lona ka pelo, mme fa e le go nkoka le go nneela mo diatleng tsa baba ba me, le fa go se na tshiamololo mo diatleng tsa me, gona a Modimo wa borraarona o go bone o lo betse.”

₁₈Ke fa Amasai tlhogo ya ba ba 30 a tsenwa ke Mowa a re: “Re ba gago, Dafita, re na nao, morwa Isai. Kagiso, kagiso a e nne nao; a kagiso e nne le ba ba go thusang; gonne Modimo wa gago o go thusitse.” Jaanong Dafita a ba amogela a ba dira ditlhogo tsa masomo a batlhabani.

₁₉Le bangwe ba Bamanase ba tla ba ineela mo go Dafita, jale fa a tla le Bafelesita, ba tla go tlhabana le Saule, mme a se ka a ba thusa. Ka gonne dikgosana tsa Bafelesita di ne tsa mo naya tsela ka go belaela gore, e ka nna go kgaolwa ditlhogo, fa a ka ineela Saule morena wa gagwe. ₂₀Ba Bamanase ba ba neng ba mo ineela, fa a boela kwa Sitlage, e ne e le Atena le Josabate le Jediaele le Migaele le Josabate le Elihu le Silethai, ditlhogo tsa ditshika tsa Bamanase. ₂₁Bone ba thusa Dafita go tlhabana le lesomo la baba, e bong Baamaleke; gonne e ne e le bagale ba ba pelokgale botlhe, mme ba nna balaodi ba mephato. ₂₂Gonne ka letsatsi lengwe le lengwe go ne go ntse go tla bangwe go mo thusa, ga tsamaya ga nna mephato e e masomosomo jaaka masomosomo a Modimo.

₂₃Dipalo tsa mephato ya ba ba tlhomeletseng ntwa ba ba neng ba tla kwa go Dafita kwa Heberone go sokololela bogosi jwa ga Saule mo go ene ka fa lefokong la Morena ke tse: ₂₄Bajuta ba ba tshotseng thebe le lerumo ba ne ba le 6 800 ba tlhomeletse ntwa. ₂₅Bagale ba ba pelokgale ntweng ba Basimeone ba ne ba le 7 100. ₂₆Ba Balefi ba ne ba le 4 600; ₂₇ba tla ba na le Joyata moeteledipele wa ba ga Arone a na le 3 700, ₂₈le Satoke, lekau, mogale yo o pelokgale le ba kgotla ya ga rraagwe, e le balaodi ba le 22. ₂₉Ba ga gabo Saule ba Babenyamene ba ne ba le 3 000; kana go fitlha foo bontsi jwa bone bo ntse bo goga le ba kgotla ya ga Saule. ₃₀Batlhabani ba ba pelokgale, banna ba ba tumileng mo dikgorong tsa bone ba Baeferaime, ba ne ba le 20 800. ₃₁Ba bontlhanngwe jwa lotso lwa ga Manase ba ne ba le 18 000, ba tlhaotswe ka maina gore ba ye go dira Dafita kgosi. ₃₂Ba Baisašare ba ba neng ba tlhaloganya dipaka go ka itse se Baiseraele ba tshwanetseng go se dira ka nako le nako ditlhogo tsa bone di ne di le 200, mme ba ga tsona botlhe ba le mo taolong ya tsona. ₃₃Ba ba nonofetseng ntwa ba Basebulone ba ba rulaganyeditsweng tlhabano ba ba tlhomeletseng tlhabano ka dibolai tsa mefutafuta ba ne ba le 50 000, ba tla go thusa ba se pelo-pedi. ₃₄Balaodi ba Banafetale ba ne ba le 1 000, ba na le banna ba le 37 000 ba ba tshotseng thebe le lerumo. ₃₅Ba ba rulaganyeditsweng tlhabano ba Badane ba ne ba le 28 600. ₃₆Ba ba nonofetseng ntwa go ka ikemisetsa tlhabano ba Baasere ba ne ba le 40 000. ₃₇Ba kwa moseja ga Joretane ba Barubene le Bagate le ba bontlhanngwe jwa lotso lwa ga Manase ba ne ba le 120 000, ba tlhomeletse tlhabano ka dibolai tsa mefutafuta.

₃₈Batlhabani botlhe bao ba ba ikemisitseng ka thulaganyo ba tla kwa Heberone ka pelo yotlhe go dira Dafita kgosi ya Baiseraele botlhe; le Baiseraele botlhe ba bangwe ba ne ba ikaeletse go dira Dafita kgosi ka bongwefela jwa pelo. ₃₉Ba ne ba na le Dafita gona malatsi a le mararo, ba a ja, ba a nwa; gonne ba ga bone ba ne ba ba etleeleditse dijo. ₄₀Le gona ba ba gaufi nabo go fitlha kwa go Baisašare le Basebulone le Banafetale ba ne ba tlisa dijo ka diesele le dikammele le meboulwe le dipholo, e le dijo tsa bupe le dinkgwe tsa difeie le tsa maswabi a moweine le weine le lookwane le bontsi jwa dikgomo le difutshane; gonne go ne go le boitumelo mo Baiseraeleng.