1 DITIRAFALO 26

₁Fa e le badisa ba dikgoro ba e leng boora Kora e ne e le Meselemia morwa Kore, mongwe wa bomorwa Asafe. ₂Mme Meselemia o ne a na le bomorwa, e bong Sagaria, yo mogolo, le Jediaele, wa bobedi, le Sebatya, wa boraro, le Jatheniele, wa bone, ₃le Elame, wa botlhano, le Johanane wa borataro, le Eleyoenai, wa bosupa.

₄Le Obete-Etomo o ne a na le bomorwa, e bong Semaya, yo mogolo, le Josabate, wa bobedi, le Joa, wa boraro, le Sagare, wa bone, le Nethanele, wa botlhano, ₅le Amiele, wa borataro, le Isašare, wa bosupa, le Pheulethai, wa robedi; gonne Modimo o ne o mo tshegofaditse.

₆Le Semaya morwawe a belegelwa bomorwa ba ba neng ba busa mo kgotleng ya ga rraabo, gonne e ne e le banna ba ba maatlametlo. ₇Bomorwa Semaya e ne e le Otheni le Refaele le Obete le Elesabate le bomorwa-rraagwe ba e leng banna ba ditswerere, Elihu le Semagia.

₈Botlhe bao e ne e le ba ga gabo Obete-Etomo; bone le bomorwaa-bone le bomorwa-rraabo, banna ba ba maatlametlo ba nonofetse tirelo. Ba ne ba le 62.

₉Le Meselemia o ne a na le bomorwa le bomorwa-rraagwe e le banna ba ditswerere ba le 18.

₁₀Le Hosa oora Merari o ne a na le bomorwa, e bong Simeri, yo mogolo, yo rraagwe o neng a mo dira mogolo, le fa e se motsalwapele; ₁₁le Hilekia, wa bobedi, le Tebalea, wa boraro, le Sagaria, wa bone; bomorwa Hosa le bomorwa-rraagwe ba ne ba le 13 mmogo.

₁₂Le ditlhopha tseo tsa badisa ba dikgoro, e bong ditlhogo tsa banna di ne di abetswe ditshwanelo tsa go direla fa Ntlong ya Morena fela jaaka ba ga bone. ₁₃Mme ba tlhama tengwa, yo mmotlana fela jaaka yo mogolo wa dikgotla tsa bone; ba e tlhamela kgoro nngwe le nngwe. ₁₄Tengwa ya kgoro ya botlhabatsatsi ya wela Selemia. Le Sagaria morwawe, mogakolodi yo o botlhale, a tlhamelwa tengwa; tengwa ya gagwe ya wela kgoro ya bokone. ₁₅Ya ga Obete-Etomo ya wela kgoro ya borwa; ya bomorwawe ya wela ntlo ya polokelo. ₁₆Ya ga Suphime le ya ga Hosa tsa wela kgoro ya bophirimatsatsi fa kgorong ya Salegethe fa tseleng e e tlhatlogang, badisa ba lebaganye le badisa. ₁₇Ntlheng ya botlhabatsatsi Balefi ba ne ba le barataro, ntlheng ya bokone ba le bane ka letsatsi le letsatsi, ntlheng ya borwa ba le bane ka letsatsi le letsatsi; fa ntlong ya polokelo go le babedi le babedi. ₁₈Kwa mathuding ntlheng ya bophirimatsatsi go ne go le ba le bane ba ba disang tsela e kgolo le ba le babedi ba mathudi. ₁₉Ke tsona ditlhopha tsa badisa ba dikgoro, e le tsa losika lwa ga Kora le lwa ga Merari.

₂₀Mme ba ga bone Balefi ba ba neng ba okametse mahumo a Ntlo ya Modimo le mahumo a a neetsweng Tempele ke ba: ₂₁Ba ga gabo Laetane, oora Geresone, ditlhogo tsa dikgoro tsa ga Laetane, wa losika lwa ga Geresone e ne e le boora Jehiele. ₂₂Bomorwa Jehiele e ne e le Sethame le Joele morwa-rraagwe, bone ba okametse mahumo a Ntlo ya Morena.

₂₃Fa e le boora Amerame le boora Isehare le boora Heberone le boora Usiele, ₂₄Sebuele, oora Geresome, morwa Moše e ne e le mookamedi yo mogolo wa mahumo. ₂₅Fa e le boora Eliesere, morwawe e ne e le Rehabja, morwawe e le Jesaya, morwawe e le Jorame, morwawe e le Sigeri, morwawe e le Selomothe. ₂₆Selomothe yoo le bomorwa-rraagwe ba ne ba okametse mahumo otlhe a a neng a neetswe Tempele, a itshepisitswe jalo ke kgosi Dafita le ditlhogo tsa dikgoro le balaodi ba dikete le ba makgolo le balaodi ba mephato. ₂₇Ba ne ba a itshepisitse, a tswa mo dintweng le mo thopong go thusa kagong ya Ntlo ya Morena. ₂₈Le tsotlhe tse di neng di itshepisitswe ke Samuele mmoni le Saule morwa Khiše le Abenere morwa Nere le Joabe morwa Seruya le tsotlhe tse di neng di itshepisitswe, di ne di okametswe ke Selomothe le bomorwa-rraagwe.

₂₉Kenanya le bomorwawe, boora Isehare, ba ne ba neetswe tiro ya ka kwa ntle mo go Iseraele, e le bakwaledi le baatlhodi.

₃₀Hasabja le bomorwa-rraagwe, boora Heberone, banna ba dinatla ba le 1 700 e ne e le baokamedi ba makgotla a mmuso a Iseraele ka kwano ga Joretane ntlheng ya bophirimatsatsi ba tiro yotlhe ya Morena le ba tirelo ya kgosi. ₃₁Tlhogo ya boora Heberone e ne e le Jeria. – Go ne go batlwa boora Heberone ka fa ditshikeng tsa bone le malapeng a bone ka ngwaga wa 40 wa puso ya ga Dafita, ga fitlhelwa banna ba dinatla mo go bone kwa Jasere wa Gileate. ₃₂Mme ba losika lwa gagwe e ne e le banna ba dinatla ba le 2 700, e le ditlhogo tsa dikgotla. Mme Dafita a ba dira baokamedi ba Barubene le Bagate le ba bontlhanngwe jwa lotso lwa ga Manase, ba tiro nngwe le nngwe ya Modimo le ba tiro ya kgosi.