1 MAKABISE 15

₁E ne ya re Antiokuse morwa Kgosi a le mo ditlhaketlhakeng tsa lewatle, a kwalela Simone, moprista le moeteledipele wa Bajuta le setšhaba sotlhe.

₂Lo ne lo kwadilwe jaana: “Nna Antiokuse ke kwalela Simone, moprista yo mogolo le moeteledipele, le setšhaba sa Bajuta, ka re, madume. ₃Ka jaana go na le balotsanyana bangwe ba ba laolang puso ya borraarona, mme ke ikaelatse go e tsaya mo go bone go e busetsa mo maemong a e neng e le mo go one pele, gape, ka jaanong ke phuthetse tiro eo namane e tona ya mephato mme ke tlhometse dikepe tsa ntwa, ₄e le fa ke ikaeletse go tsena mo lefatsheng leo, le go itebaganya le batho ba ba le tlotlafaditseng, mme ba senyaka metse e e mentsi mo pusong ya me; ₅ke dumalana le jaaka ba ba neng ba busa pele ga me ba ne ba go golola mo lekgethong, ke dumalana le merepiso mengwe le mengwe e ba neng ba go repisetsa ka yone. ₆Ke lo letlelela go itirela madi a e tlaa nnang tefa-molato ya molao ya lefatshe la lona. ₇Ke golola Jerusalema le Felo ga Boitshepo. Dibetsa tsa ntwa tsotlhe tse lo di dirileng le dikago tsa phemelo tse lo di ikagetseng mme jaanong lo nna mo go tsone, e tla nna e nna tsa lona. ₈Dikoloto tsotlhe tse lo sa ntseng lo kolota letlole la kgosi ka tsone le tse lo sa ntseng lo tlaa kolota ka tsone, di phimoletswe ruri go tloga gompijeno. ₉E tlaa re re sena go tsaya puso ya rona re lo neye tlotla e kgolo, lona le setšhaba sa lona sa Tempele ya lona, mo e leng gore lefatshe lotlhe le tla bona kgalalelo ya lona.”

₁₀Mo ngwageng ya 174 Antiokuse o ne a ya go tlhasela lefatshe la bagologolo ba gagwe, mme mephato yotlhe e ne ya mo kokoanela, mo e leng gore go ne ga sala ba sekaeenyana fela le Terifo. ₁₁Antiokuse o ne a khukhelela momotseedi-maemo, mme ene a tshabela kwa Dore gaufi le lewatle, ₁₂a itse gore matshwenyego a a mo ntsifalela, le gore mephato ya gagwe e mo tlhanogetse. ₁₃Antiokuse o ne a thibelela gaufi le Dore a na le batlhabani ba le 120 000 batlhabani-bapalami ba le 8 000. ₁₄Ya re a dikaganyetsa motse, dikepe mo lewatleng le tsone tsa tla go mo tlhatlhelela, mo e leng gore o ne a pitlaganyeditse motse ka tlhaselo e e neng e tswa mo lefatsheng le e e neng e tswa mo lewatleng, mme a sa dumelele ope go tsena kgotsa go tswa.

₁₅Fa tse di ntse di diragala Numeniuse le ba ba neng ba tsamaile nae ba ne ba goroga ba tswa kwa Roma, ba tshotse dikwalo tse di neng di kwaletswe dikgosi tse di farologanyeng le mebuso e e farologanyeng, di kwadilwe jaana: ₁₆“Nna Lukio, moemedi wa Baroma, ke kwalela kgosi Petolemi, ka re, madume. ₁₇Barongwa ba Bajuta ba tsile mo go rona e le ditsala tsa rona le batshwaragani le rona go tla go ntšhafatsa botsala jwa rona jo bo bo saleng bo ntse bo le teng mo tshimologong le tshwaragano nabo e le yone e e saleng e ntse e le teng mo tshimologong, ba dira jalo ka leina la ga Simone moprista yo mogolo le la Bajuta.

₂₂Moemedi o ne a romelela kgosi Demeteriuse, Attaluse, Ariarathese le Aresakese lokwalo lo lo tshwanang le lo. ₂₃A lo romelela mebuso yotlhe, mmogo le Sampesamese, Maseparta, Delose, Mindose, Sisione, Karia, Samose, Pamfilia, Lisia, Halikarenassuse, Rhodese, Faselis, Kose, Side, Araduse, Goretina, Keniduse, Kiperuse le Kirene. ₂₄Ba ne ba kwalela le Simone, moprista yo mogolo mafoko a lokwalo lo.

₂₅Fa tse di diragala, Antiokuse, e ne ya re a thibeletse gaufi le motse wa Dore, a nnela go romela ditlhopha go ya go tlhasela motse. A dira dibetsa tsa ntwa tsa go thuba, mme a tswalelela Terifo, a thibela botlhe ba ba tsenang le ba ba tswang. ₂₆Simone a tlhatlhelela Antiokuse ka banna ba le 2 000 ba ba tlhophilweng go tla go mo thusa mo ntweng ya gagwe, ba na le selefera le gouta le namane e tona ya dibetsa tsa ntwa. ₂₇Fela Antiokuse ene o ne a gana go ba amogela le go di amogela. Mme a tlhanogela ditumalano tse a neng a kile a di dira le Simone, a mo fetogela gotlhelele. ₂₈A mo romelela Anthenobiuse, mongwe wa ditsala tsa gagwe, gore a ye go buisana nae a re, “O ntse mo Joppa le mo Gasere le mo Motsaneng wa Phemelo mo Jerusalema, e leng metse e e mo pusong ya me. ₂₉O senyakile kgaolo ya yone mme wa dira tshenyo e ntsi mo lefatshing le. O itseetse mafelo a le mantsi a puso ya me. ₃₀Jaanong busa metse e O e itseetseng eo, le madi a lekgetho, a a tswang mo mafelong a O a itseetseng ka kwa ntle ga melelwane ya Juta, ₃₁kgotsa mo boemong jwa one o nneye ditalenta di le 500 tsa selefera, O duelela tshenyo e O e dirileng, le ditalenta tse dingwe di le 500 e le madi a lekgetho la metse; e seng jalo re tlaa tla go go tlhasela.”

₃₂Ya re Anthenobiuse, mongwe wa Ditsala tsa Kgosi, a fitlha kwa Jerusalema mme a bona maatlametlo a ga Simone, bobeela-dijana jwa gagwe jwa polaite ya gouta le selefera, le batlhanka ba gagwe ba bantsintsi a sala a akabetse fela. A bolela molaetsa wa kgosi; ₃₃fela Simone a mo araba a re, “Lefatshe le re le tsereng le ga se lefatshe le sele, le gone ga re a itseela di-tsa-ga-ope, re tsere boswa jwa bagologolo ba rona, jo bo kileng jwa ba jwa tsewa mo go rona ke baba ba rona ka dikgoka le tshiamololo. ₃₄Mme e re lobaka lo sa ntse lo re dumelela jaana, re mpa re ipusetsa boswa jwa bagologolo ba rona fela. ₃₅Fa e le metse ya Joppa le Gasere, e lo reng ke ya lona, yone ke metse e e kileng ya utlwisa batho ba rona botlhoko ya bo ya senya lefatshe la rona. Yone re ka nna ra e ntshetsa ditalenta di le 100.” Ya re morongwa yo a ise a bo a arabe le go araba, ₃₆a boela kwa kgosing a gaketse mme tsotlhe tse a neng a di bonye le karabo ya ga Simone le maatlametlo a gagwe, a feta a di bolela. Mme ya re kgosi e utlwa se ya galefa thata.

₃₇Terifo jaanong o ne a palama sekepe mme a ngwegela kwa Orethosia. ₃₈Kgosi ya dira Cendebaeuse molaodi yo mogolo wa batlhabani wa kgaolo e e bapileng le lewatle, mme a mo rebolela mophato wa batlhabani-batsamai le batlhabani-bapalami. ₃₉A mo laela go aba ntwa ka banna ba gagwe ba lebaganye le Juta, mme a mmolelela gore a tiise motse wa Kederone a bo a thatafatse dikgoro tsa one. A mo raya a re a tlhasele batho, fa kgosi yone e ne e ya go latela Terifo.

₄₀Cendebaeuse a goroga kwa Jamnia mme a feta a simolola go tshwenya batho ka bonakonako fela, a tlhasela Juta, a tsenya batho mo kgolegelong, a ba bolaaka. ₄₁A tiisa motse wa Kederone mme a baya batlhabani-bapalami le mephato ya ntwa teng gore ba nne ba o femele ka go o tlhabanela, ba bo ba nne ba lebelelele ditsela tsa Juta, fela jaaka kgosi e ne e mo laetse.