1 MAKABISE 6

₁Fa tse di ntse di diragala jaana kgosi Antiokuse ene o ne a kgabaganya dikgaolo tsa ntlheng ya godimo. O ne a utlwile fa kwa Peresia go ne go na le motse mongwe o bidiwa Elimaise, o itsege thata ka ntlha ya khumo ya one ya selefera le gouta. ₂O tumisitšwe gape ke Tempele ya one e e neng e tsentse ditlhomelo, matlatla a sehuba le dibolao tsa gouta, tse di neng di tlogetšwe teng ke Aleksander morwa Filipo, kgosi ya Masedonia, yo e neng e le wa ntlha go busa Magerika. ₃Ke gone ka moo a neng a ya go leka go gapa motse le go o thopa, fela a palelwa, gonne baagi ba one ba ne ba utlwa kaga maikaelelo a gagwe, ₄mme ba kampana nae; a bo a retologa, a boela ntlheng ya Babilonia, a hutsafetse.

₅Fela e rile a sa ntse a le kwa Peresia a utlwa gore makoko a ntwa a a neng a ile go tlhasela lefatshe la Juta a fentšwe, ₆le gore ene Lisiase ka boene o ne a tlhasetse ka natla e kgolo, fela a fekeeditšwe gore a bo a sie, a tshaba Majuta. Majuta a, a ne a kwentshitšwe ke go gapa dibetsa, go itlhatlhelela, le go tsaya dithopo tse dintsi mo makokong a ntwa a a neng a a kgemethetse. ₇Ba ne ba digile aletara e e neng e lešwefaditšwe e agilwe mo godimo ga aletara kwa Jerusalema. Gape ba ne ba thekeleditse Felo ga Boitshepo ka dipotana tse di godileng fela jaaka pele. Ba thatafaditse Bethesure, mongwe wa metse ya gagwe.

₈Ya re kgosi e utlwa dikgang tse ya akabala ya tshoga thata. A itatlhela mo bolaong jwa gagwe, mme a nyema moko ka ntlha ya go šwaba thata jaana, gonne go ne go sa diragala jaaka a ne a rulagantse. ₉A nna foo malatsilatsi, a hupeditšwe ke khutsafalo e ntsi go fitlhelela a bo a lemoga gore o a šwa. ₁₀Ke fa a phutha Ditsala tsa gagwe, a di raya a re, “Matlho a me ga a tlelwe ke boroko, mme pelo ya me e tshosiwa ke tlhobaelo e e boitshegang e. ₁₁Ke ntse ke ipotsa gore tota go tsile jang gore ke bo ke hutsafetse jaana, ke todumetse mo morwaleleng o o kanakana. nna yo ke neng ke le pelo, e bile ke ratega thata ka nako ya me ya letlepu. ₁₂Fela jaanong ke gakologelwa phoso e ke neng ka e dira kwa Jerusalema jaaka ke ne ka tsubula dijana tsotlhe tsa selefera le gouta gone, ka bo ka laela gore baagi ba Juta ba ripitlediwe, go se na lobaka lope. ₁₃Ke tlhomamisa gore selo se ke sone se dirang go re ke welwe ke dipetso tse di kanakana tse, le gore ke be ke bolawa ke kutlobotlhoko jaana, ke swela mo lefatsheng le sele.”

₁₄A bitsa Filipo, mongwe wa ditsala tsa gagwe, mme a mo dira motšhwareledi mo pusong ya gagwe yotlhe. ₁₅A mo neela serwalo sa gagwe sa segosi, kobo ya gagwe ya segosi, le mhitshana wa gagwe wa segosi, e le go re a tle a nne a rute morwawe Antiokuse, a bo a mmaakanyetse go tsaya setilo. ₁₆Jaanong Kgosi Antiokuse a tlhokafala mo ngwageng wa 149.

₁₇Ya re Lisiase a utlwa gore kgosi e tlhokafetse, a baya Antiokuse, morwa kgosi mo setilong, gore a tseye maemo a yone. O ne a mo godisitse go tšwa bonyaneng, a bile a mmiditse Eupatore.

₁₈Banna ba ba neng ba le mo Motsaneng wa Phemelo ba ne ba kgoreletsa batho ba Iseraele gaufi le Felo ga Boitshepo. Ba leka-leka ka mekgwa yotlhe go ba utlwisa botlhoko. Ba bile ba thusa baheitane thata. ₁₉Ke fa Judase a bona gore ba tšhwanetse go bolawa. A bo a phutha batho botlhe go ya go tlhasela banna ba. ₂₀Ba kokoana, mme ba tlhasela Motsana wa Phemelo mo ngwageng ya bo-150. A aga dikago tse di goletseng godimo tsa tlhaselo ya tikaganyetso a bo a dira dibetsa tse dingwe tsa ntwa.

₂₁Fela bangwe ba batho ba ba neng ba dikaganyeditšwe ba ne ba sutlha kganelelo e, mme baitimokanyi ba se kae ba Baiseraele ba tsena mo lesomong la bone. ₂₂Ba ya kwa kgosing ba e raya ba re “O tla diragatsa tshiamo leng, wa lwela bakaulengwe ba rona? ₂₃Re ne re itumelela go direla rrago re dira jaaka a re laola, re ikobela melao ya gagwe. ₂₄Ke ka ntlha ya moo batho ba ga rona ba sa tlholeng ba re kgathalela. Go feta moo, ba bolaile mongwe le mongwe wa rona yo ba neng ba mo tšhwara, ba bo ba thopa bošwa jwa rona. ₂₅Le gone ga se rona fela ba ba re utlwisang botlhoko jaana. Ba utlwisa dikgaolo tsotlhe tsa gago botlhoko. ₂₆Jaaka re bua nao jaana ba tlhasetse Motsana wa Phemelo mo Jerusalema, go o gapa. Ba bile ba thatafaditse felo ga Boitshepo le Bethesure. ₂₇Fa O ka ba wa se ka wa ba thibela ka bonako ba tla fetelela O bo O se ka O itse gore O ka ba reng.”

₂₈Ya re kgosi e utlwa selo se ya gakala thata. Ya bitsa baeteledipele ba mephato ya yone le balaodi ba batlhabani-bapalami ba yone. ₂₉A kokoanya batlhabani ba ba thapilweng mo dikgaolong tsa dipuso tse dingwe le mo ditlhaketlhakeng tsa mawatle. ₃₀Mephato ya gagwe e ne e na le batlhabani-batsamai ba le 100 000 le batlhabani-bapalami ba le 20 000, le ditlou di le 32, tse di neng di tlwaetse gore ntwa e ntse jang. ₃₁Ba ralala Idumaea mme ba dikaganyetsa Bethesure. Malatsi a le mantsi ba lwa ka natla. Ba dira dibetsa tsa tlhaselo. Fela bafemedi ba tswa ba itwela, mme ba tshuba dilo tse. Ba lwa senna.

₃₂Ke fa Judase a emisa go tlhasela Motsana wa Phemelo, a ya go thibelela kwa Bethesekaria go lebagana le bothibelelo jwa kgosing. ₃₃Kgosi ya nanoga phakela, ya itlhaganedisa lekoko la gagwe la ntwa, ba fologa ka tsela e e yang Bethesekaria kwa mephato ya yone e neng ya feta ya dira theko teng mme ya letsa diphala. ₃₄Ba bontsha ditlou matute a moretlwa le a mmurubele, go di tsibosetsa ntwa. ₃₅Ba di aba ka digopa tsa mephato. Tlou nngwe le nngwe ya nna le banna ba le 1 000 ba apere diaparo tsa phemelo, ba bile ba rwele dikokoro tsa kgotlho. Batlhabani-bapalami ba ba tlhophilweng ba le 500 ba ne ba emisiwa le tlou nngwe le nngwe ka ditlhopha-tlhopha. ₃₆Batlhabani-bapalami ba ne ba lepile motsamao mongwe le mongwe o tlou ya bone e neng e o tsamaya. Ba ne ba ya gongwe le gongwe kwa e neng e ya gone, ba sa kgaogane nayo. ₃₇Mo godimo ga tlou nngwe le nngwe go ne go na le namane e tona ya letlole la logong lo lo popota, le bofeletšwe ka dikgole gore le nne le ntse sentle. Nngwe le nngwe e ne e na le setlhopha sa batlhabani ba ba neng ba tlhabana ba le gone kwa godimo kwa. Go bile go na le mokgweetsi wa yone. ₃₈Batlhabani-bapalami ba bangwe bone ba ne ba beilwe ka fa letlhakoreng lengwe le nngwe la lekoko la ntwa, go kgoreletsa baba le go sireletsa digopa tsa batlhabani. ₃₉E re letsatsi le bonesa dithebe tsa kgotlho le gouta, dithaba di lakasele di phatsime jaaka dipone tsa molelo. ₄₀Batlhabani ba bangwe ba lekoko la ntwa la kgosi ba ne ba dirile theko kwa godimo ga dithaba, mme ba bangwe ba e dirile mo leboeng. Ba gwanta ka bopelokgale le manontlhotlho a magolo. ₄₁Mongwe le mongwe a roromiswa ke modumo wa batlhabani ba bantsi ba, metibo ya makoko a, fa a ntse a gwanta le go tsirimana ga ditlhomelo, gonne e ne e le lekoko la ntwa le legolo, le le nonofileng.

₄₂Judase le lekoko la gagwe ba atamela go tla go tlhabana, mme ga bolawa batlhabani ba le 600 ba lekoko la kgosi. ₄₃Mme Eleasare, yo o neng a bidiwa Afarane o ne a lemoga gore nngwe ya ditlou e gomilwe ka ditlhomelo tsa ntwa tse dintle tsa segosi. E ne e bile e le telele go feta tse dingwe. A bo a akanya gore kgosi e e palame. ₄₄Ke fa a šwela go boloka batho ba ga gabo mme a dira gore leina la gagwe le nne le gakologelwe ka bosakhutleng. ₄₅Ka bopelokgale jo bogolo, a kgwelogela tlou e, a raletse segopa sa batlhabani, a tla a ntse a bolaya batho ka fa le ka fa gore ba bo ba thiboge fa a feta. ₄₆A golomela ka fa tlase ga tlou e, a sotlhometsa tšhaka mo go yone mme a e bolaya. Fela ya re e wa ya mo pitla, a bo a šwela gone foo. ₄₇Mme ya re Bajuta ba bona ka mo kgosi e neng e nonofile ka teng, le bogale jwa mephato ya kgosing, ba inaya naga ba e tshaba.

₄₈Lekoko la ntwa la kgosi le ne la ya go thulana nabo fa pele ga Jerusalema. Mme kgosi ya simolola go tšwalela Judaea le Thaba ya Sione. ₄₉A agisana le batho ba Bethesure, mme bone ba huduga mo motseng o gonne ba ne ba se na dijo gone go itshokela tlhaselo ya thekeletso, ka gore e ne e le ngwaga ya boikhutso mo lefatsheng le. ₅₀Ya re kgosi e sena go gapa Bethesure ya baya lekoko la batlhabani-balebeledi teng, go o lebelela. ₅₁A tlhasela Felo ga Boitshepo ka thekeletso nako e telele, a dira difala tsa bohulelo, dibetsa tsa go thuba, dihula-molelo, dihula-maje, dihula-metsu, le dihula-marumo. ₅₂Bajuta le bone ba itirela dibetsa tsa ntwa tse di tšhwanang le tsa batlhasedi ba. Mme ka mokgwa oo ba bo ba itsetsepela nako e telejana. ₅₃Fela ba ne ba se na dijo tse di beilweng, gonne e ne e le ngwaga wa bosupa. Le gone botlhe ba ba neng ba tshabetse baheitane mo Juta ba ne ba jele gotlhe mo Bajuta ba ba neng ba go ipeetse.

₅₄E ne e le batho ba se kaee fela ba ba neng ba setse mo Felong mo go Boitshepo, ka ntlha ya botlhoko jwa leuba. Batho ba bangwe bone ba ne ba phatlaletse, ba iketse gae.

₅₅Fa tse di ntse di diragala, Filipo yo Kgosi Antiokuse yo o neng, e rile a ise a šwe, a mo tlhopa gore e nne ene yo o mo rutelang morwawe, Antiokuse, go nna kgosi, ₅₆o ne a boa kwa Peresia le Media le mephato e e neng e patile Kgosi, mme o ne a leka go busa. ₅₇Ya re fela Lisiase a utlwa se, a bona gore o tšhwanetse go tsamaya, a bo a raya kgosi le batsamaisi ba lekoko la ntwa le batho a re, “Re ntse re koafalela pele letsatsi lengwe le lengwe. Ga re na dijo. Le golo fa re go tlhasetseng ka thekeletso go sireleditšwe tota. Le gone tsamaiso ya puso le yone e batla gore re e tlhokomele.

₅₈“A re direng botsala le batho ba mme re agisaneng nabo le setšhaba sa bone sotlhe. ₅₉A re ba letleleleng go latela mekgwa ya bone jaaka ba ne ba ntse ba e latela pele, gonne go tloga re nyeletsa mekgwa ya bone ke gone go ba gakaditseng gore ba bo ba dire jaaka ba dira jaana.”

₆₀Kgosi le balaodi ba yone ba dumalana le kakanyo, mme a roma motho kwa Bajuteng go ya go kopa kagisano. Ba dumalana. ₆₁Kgosi le batsamaisi ba mephato ba tiisa tumalano ka go ikana. Ke gone he, ba ba neng ba tlhasetšwe ka thekeletso ba neng ba tšwa mo kagong ya phemelo. ₆₂Ke fa Kgosi e tsena mo Thabeng ya Sione. ₆₃Fela e rile e bona gore felo fa go popota jang ya tlhanogela maikano a yone, mme ya laela gore dipota di thubiwe. ₆₄A bo a bothologa ka bonako a boela kwa Antioko. Mme koo a fitlhela Filipo a busa motse. Fela Antiokuse a lwa nae, mme a tsaya motse mo go ene ka dikgoka.