1 MAKABISE 9

₁Demeteriuse o ne a utlwa fa Nikanore le batlhabani ba lekoko la gagwe ba ne ba bolailwe mo ntweng. Ke fa a romela Bakitese le Alekimuse lwa bobedi kwa lefatsheng la Juta, ba na le mhama wa letsogo le le siameng wa lekoko la gagwe la ntwa. ₂Ba tsaya tsela e e yang kwa Galelea mme ba feta ba tlhasela Mesalothe kwa Arebela ka thekeletso. Ba o gapa, ba bo ba bolaya batho ba le bantsi teng. ₃Ka kgwedi ya ntlha ya ngwaga wa 152 ba ne ba thibelela fela gaufi le Jerusalema. ₄Ba bo ba fetela pele, ba ya Berea ka batlhabani-batsamai ba le 20 000 le batlhabani-bapalami ba le 2 000.

₅Jaanong Judase o ne a le mo bothibelelong kwa Elasa, a na le banna ba ba tlhopilweng ba le 3 000. ₆E rile ba bona namane e tona ya palo ya batlhabani ba mephato ya baba ba tshoga mo go mašwe. Ba bantsi ba mophato wa gagwe ba nonowela ba tšwa mo bothibelelong, go fitlhelela go bo go itshalela ba ka ne ba tšhwara 800 fela. ₇Ya re Judase a bona gore batlhabani ba lekoko la gagwe ba mo nyeleletse le gore o tlaa tloga a tlhaselwa, a sala a akabetse fela, gonne o ne a se na nako ya go ba kokoanya. ₈Le fa go ntse jalo, le mororo a ne a gamaregile fela jaana o ne a raya ba ba neng ba setse a re, “Emang, banna! A re yeng go thulana le baba. Gongwe re ka kgona go lwa nabo!”

₉Banna ba gagwe ba re ba leka go mo ntsha mo mogopolong oo, ba mo raya ba re, “Gompijeno ga re kake ra bo ra dira sepe fa e se go sia fela, ra boloka botshelo jwa rona. E ka nna ya re morago ra tla le bakaulengwe ba rona go tla go lwa le batho ba. Fa e le rona fela, palo ya rona e potlana thata.”

₁₀Judase a bo a re, “Le goka! Ga re kake ra bo ra sia, re ba tshaba! Fa e le gore nako ya rona e fitlhile, a re šweng jaaka banna ba šwela ba garona, re sa tlogele sepe go kgotlela tlotlo e re itsegeng ka yone!”

₁₁Mephato ya baba ya bo e tšwa mo bothibelelong. Mme bajuta ba dira theko, ba ipaakanyetsa go thulana nabo. Batlhabani-bapalami ba beiwa ka ditlhopa tse pedi. Bakolopi ba diragantšwana le bakolopi ba metsu ba ne ba eteletse lekoko pele ba na le mephato ya go tlhasela pele, botlhe e le dinatla tsa batlhabani. ₁₂Bakitese o ne a le ka fa mohameng wa letsogo la moja. Segopa se ne se tlhasela se tšwa fa gare ga ditlhopa tse pedi, se letsa diphala. Banna ba mophato wa ga Judase le bone ba ne ba letsa diphala. ₁₃Lefatshe la tshikinyega ke modumo wa makoko a a ntwa. Ntwa ya tlhola e tšhwaraganye go tšwa mo mosong go fitlhelela maitsiboa.

₁₄Judase o ne a bona gore Bakitese o ka fa mhameng wa letsogo la moja, le batlhabani ba lekoko la gagwe ba ba nonofileng le bone ba ntlheng eo. Ke fa batlhabani botlhe ba dinatla ba ya nae. ₁₅Ba thuba mhama oo, wa letsogo la moja mme ba ba alola go fitlha kwa mhapheng o o kgakala wa thaba. ₁₆Fela e rile Maasiriaa a a neng a le ka fa mhameng wa molema a bona gore mhama wa letsogo la moja o thubilwe a bo a retologa a šwatama Judase le banna ba gagwe go ba tšwa ka kwa morago. ₁₇Ntwa ya tlhabana tota. Ga utlwa botlhoko ga ba ga bolawa ba le bantsi ka fa matlhakoreng a mabedi a. ₁₈Judase ka boene a bolawa. Ba ba neng ba setse ba inaya naga.

₁₉Janathane le Simone ba tsaya Judase morwarraabo, ba ya go mo fitlha kwa lebitleng la bagologolo ba gagwe kwa Modeine. ₂₀Batho botlhe ba Iseraele ba mo lelela, ba mo hutsafalela thata. Mme malatsi a le mantsi ba boelela pina e ya khutsafalo ba re,

₂₂Ditiro tse dingwe tsa ga Judase, dintwa tse a neng a di tlhabana, ditiro tsa bonatla tse a neng a di dira, le dilo tsotlhe tse di dirileng gore a nne mogolo jaana, ga di a bolokwa mo dikwalong. Fela di ne di le dintsi thata.

₂₃Morago ga loso lwa ga Judase baitimokanyi ba ne ba betsega mo ba neng ba iphitlhile teng gongwe le gongwe mo Iseraele. Badira-bosula botlhe ba rotoga gape. ₂₄Ka yone nako eo go ne ga nna leuba le le botlhoko. Mme batho ba lefatshe le ba ya ka kwa lotlhakoreng lwa bone baba ba. ₂₅Bakitese a tlhopa baba ba tumelo ka bomo, a ba tlhoma go laola lefatshe. ₂₆Batho ba ne ba latelela ba bo ba senka ditsala tsa ga Judase, ba di tsisa fa pele ga ga Bakitese. Mme ene a ipusolosetsa mo go bone, a ba tlontlolola. ₂₇Ga simologa kgatelelo e kgolo mo Iseraele, e go neng go ise go ko go nne le epe e e neng e tšhwana nayo, fa e sale nako ya go nyelela ga boprofeta mo gare ga Baiseraele.

₂₈Ke fa ditsala tsa ga Judase di ikokoanya mme di ya go raya Jonathane di re, ₂₉“Fa e sale Judase morwarrago a šwa, ga go ise go ko go nne ope yo o tšhwanang nae, go etelela batho pele, go tlhabana le baba ba, ebong Bakitese le botlhe ba ba tlhoileng setšhaba sa rona. ₃₀Ke gone ka moo re go tlhopileng gompijeno gore O tseye maemo a gagwe O le mmusi le moeteledipele wa rona, mme O re tlhabanele.” ₃₁Go simologa ka letsatsi leo Jonathane a nna moeteledipele mme a laola jaaka Judase morwarraagwe a ne a kile a laola.

₃₂Ya re Bakitese a utlwa dikgang tse a loga maano a go bolaya Jonathane. ₃₃Fela Jonathane, Simone, morwarraagwe, le bathusi ba gagwe botlhe ba utlwa selo se. Ba bo ba siela kwa sekakeng sa Tekoa. Ba feta ba thibelela go bapa le metsi a ledibela kwa Asefare. ₃₄(Bakitese a tla go itse ka ga selo se ka letsatsi la Sabata. Ke fa ene le batlhabani ba lekoko la gagwe lotlhe le bone ba kgabaganya Jorodane.) ₃₅Jonathane a roma morwarraagwe yo o neng a laola setlhopa sa dikoloi go ya go kopa Banabataea ba e neng e le ditsala tsa gagwe go mmeela dithoto tse dintsi tse ba neng ba na natso. ₃₆Fela bomorwa Jamaberi ba ba neng ba tšwa kwa Madeba ba ne ba ba wela godimo, ba gapa Johane le tsothe tse a neng a na natso, ba sia ka tsone. ₃₇Ya re se, se sena go diragala Jonathane le Simone, morwarraagwe ba utlwa gore bomorwa Jamaberi ba ja modiro wa nyalo o mogolo, le gore ba patile monyadiwa, yo e neng e le ngwana wa mongwe wa maemo mo Kanana, go tšwa kwa Nadabatha, ba le bantsinyana. ₃₈Ba bo ba gakologelwa ka mo Johane morwarraabo a neng a bolawa ka teng. Ba ya go iphitlha mo thabeng. ₃₉Ya re ba sa ntse ba laletse jalo ba bona popelelo e e modumo e tla ka namane e tona ya thoto. Monyadi le ene a tla a na le ditsala tsa gagwe le ba losika lwa gagwe, ba tsile go kgatlhantsha popelelo e ka meropa le setlhopa sa baletsi ba diphala go tshotšwe le dibetsa tsa ntwa. ₄₀Bajuta ba kgweloga ba tšwa mo ba neng ba laletse teng, ba ba wela godimo, ba ba bolaya, ba utlwisa ba le bantsi botlhoko. Ba ba neng ba setse ba siela kwa thabeng ba tlogela thoto ya bone yotlhe. Ya sala e gapiwa. ₄₁Modiro wa nyalo wa fetoga khutsafalo. Kopelo e e monate ya setlhopa sa baletsi ya fetoga kopelo ya khutsafalo. ₄₂Ya re ba sena go busolosetsa morwarraabone yo o neng a bolailwe ba boela kwa mekgatšheng ya Jorodane.

₄₃E rile fela jaaka Bakitese a utlwa selo se, a tla ka namane e tona ya mophato fa letshitshing la Jorodane, go le letsatsi la Sabata. ₄₄Jonathane a raya banna ba gagwe a re, “Emang, banna! Re itweleng gonne gompijeno ga go tšhwane le maabane le maloba a maabane. ₄₅Lo ka iponela le lona gore re tlaa tšhwanelwa ke go lwa ka kwa pele le ka kwa morago. Metsi a Jorodane ke a, a ka fa lotlhakoreng lo longwe, mokgatšha le sekgwa ka fa go lo longwe. Ga go na kwa re ka bong ra retologela teng. ₄₆Ke nako jaanong gore lo bitse One wa Legodimo gore O lo golole mo diatleng tsa baba ba rona ba.”

₄₇Tlhaselo e ne ya simololwa ke Jonathane a korola Bakitese. Fela Leasiria le la tila, la gonyela. ₄₈Ke fa Jonathane le banna ba gagwe ba itatlhela mo nokeng ya Jorodane ba kgabaganyetsa ntlheng e nngwe ya noka. Fela baba ba seka ba kgabaganya Jorodane bone, ba ba lateletse. ₄₉Bakitese a latlhegelwa ke banna ba ka ne ba le 1 000 tsatsing leo.

₅₀Bakitese a boela kwa Jerusalema mme a feta a aga metse e e thatafaditšweng mo Juta: kago ya phemelo mo Jeriko, Emmause, Bethohorone, Bethele, Timnathe, Farathone le Tefone, ka dipota tse di kwa godimo le dikgoro tse di pakeletšweng. ₅₁A bo a baya mophato wa batlhabani-balebeledi mo go nngwe le nngwe ya tsone go kgoreletsa Baiseraele. ₅₂A thatafatsa motse wa Bethesure, Gesere le Motsana wa Phemelo, a bo a baya mephato ya batlhabani mo go yone, a ba file dijo. ₅₃A tsaya bana ba basimane ba banna ba maemo a ba dira magolegwa a peelelo. A bo a laela ba lebelelwe mo Motsaneng wa Phemelo wa Jerusalema.

₅₄Mo ngwageng wa 153, mo kgweding ya bobedi, Alekimuse o ne a laela gore lobotana lwa lolwapa lo lo mo teng lwa Felo ga Boitshepo lo thubiwe, a senya tiro ya baprofeta. E ne e le gone fela Alekimuse a simololang go thuba, ₅₅fa a welwa ke botlhoko jwa go šwa mehama, tiro ya gagwe e be e kgoreletsega. Molomo wa gagwe wa se ka wa bua, mme go šwa mehama ga gagwe ga dira gore a palelwe ke go bua le fa e le go le gonnye kgotsa go laela mo lwapeng lwa gagwe. ₅₆A bo a tloga a šwa mo botlhokong jo bogolo jwa gagwe. ₅₇Ya re Bakitese a bona gore Alekimuse o sule a boela kwa kgosing. Mme lefatshe le Juta la nna le kagiso dingwaga tse pedi.

₅₈Baitimokanyi ba bo ba loga maano. Ba re, “A e re Jonathane le bathusi ba gagwe ba sa ntse ba le mo kagisong, e bile ba iketlile jaana, re buse Bakitese. O ka lala a ba tšhwere botlhe bosigo bo le bongwe fela.” ₅₉Ke fa ba ya kwa go ene, ba bo ba dumalana. ₆₀Kwa ntle ga go senya nako Bakitese a bo a bolola ka batlhabani ba bantsi. A romela melaetsa ka sephiri kwa batšhwaraganing botlhe ba Juta go phamola Jonathane le bathusi ba gagwe. Fela ba palelwa ke go dira selo se ka gore maanonyana a bone a ne a itsiwe. ₆₁Mme Jonathane le banna ba gagwe ba tšhwara banna ba ka nna 50 ba lefatshe leo ba e neng e le baeteledipele mo tirong e ya bolotsana e. Ba ba bolaya. ₆₂Jonathane le batlatsi ba gagwe ba bo ba ya kwa nageng ya Bethebasi, ba tsosa matlotla a felo foo, mme ba go thatafatsa. ₆₃Ya re Bakitese a utlwa selo se, a kokoanya batlhabani botlhe ba gagwe mme a bolelela bathusi ba gagwe mo Juta. ₆₄A bo a ya go tlhasela Bethebasi ka thekeletso. A o tlhasela malatsi a le mantsi mme a dira dibetsa tsa ntwa tsa go thuba. ₆₅Fela Jonathane a tlogela Simone morwarraagwe mo motseng, a ya kwa nageng a na le setlhotšhwana sa banna. ₆₆A ya go tlhasela Odomera le bomorwarraagwe le bomorwa Fasirone mo ditanteng tsa bone. Fela bone ba ne ba ya ka kwa tlhaselong, mme ba tsena mo lesomong la gagwe. ₆₇Fa tse di ntse di diragala, Simone le batho ba gagwe ba ne ba tswa ka sekgatlha mo motseng, ba bo ba tshuba dibetsa tsa ntwa go thuba tsa baba. ₆₈Ya re ba itwela le Bakitese ba mo alola. A tlhakana tlhogo mo go maswe fa a bona gore maanonyana a gagwe le tlhaselo ya gagwe ga di a dira sepe. ₆₉A bo a itšhesetsa pelo mo baitimokanying ba ba neng ba mo tlhotlheleditse go tsena mo lefatsheng le. A bolaya ba le bantsi ba bone. A bo a bona gore go botoka gore a boele kwa ga gabo.

₇₀Ya re Jonathane a utlwa ka selo se, a romela batho kwa go ene go ya go rerisana nae ka ga kagiso le go ya go mo kopa go golola magolegwa. ₇₁Bakitese a dumalana le selo se, mme a amogela mafoko a gagwe a therisano, a bo a ikana gore ga a kitla a bo a tlhola a mo utlwisa botlhoko malatsi otlhe a botshelo jwa gagwe. ₇₂Ya re a sena go busetsa Jonathane magolegwa a a neng a kile a a tsaya mo lefatsheng la Juta a retologa a boela kwa ga gabo, mme a se ka a bo a tlhola a atamela melelwane ya bone gape. ₇₃Tšhaka ya se ka ya bo ya tlhola e okama Iseraele. Jonathane a thibelela kwa Michemashe mo a neng a simolola go atlhola batho gone a bo a ntsha baikepi mo Iseraele.