2 DITIRAFALO 23

₁Mme ka ngwaga wa bosupa Joyata a beta pelo, a tsaya balaodi ba makgolo, e bong Asaria morwa Jerohame le Isemaele morwa Johanane le Asaria morwa Obete le Maaseya morwa Ataya le Elisafate morwa Sigeri, a dira kgolagano nabo. ₂Bona ba tlhatlologanya dinaga tsa Juta, ba phutha Balefi metseng yotlhe ya Juta le ditlhogo tsa dikgoro tsa Iseraele, mme ba tla kwa Jerusalema.

₃Ke fa phuthego yotlhe e dira kgolagano le kgosi mo Ntlong ya Morena, mme Joyata a ba raya a re: “Bonang, morwa kgosi o tla nna kgosi jaaka Morena a buile ka ga bomorwa Dafita. ₄Se lo tshwanetseng go se dira ke se: Lo ditlhopha tse tharo. Ba setlhopha sa ntlha sa lona baperesiti le Balefi ba ba tleng ba ye gae ka Sabata ba dise mejako ya Tempele. ₅Ba setlhopha sa bobedi ba dise ntlo ya kgosi; ba setlhopha sa boraro ba dise Kgoro ya Motheo; mme batho botlhe ba bangwe ba nne kwa malapeng a Ntlo ya Morena. ₆A go se ka ga tsena ope mo Ntlong ya Morena fa e se baperesiti le Balefi ba ba direlang; bone ba ka tsena, gonne ba boitshepo; mme batho botlhe ba tlhokomele thulaganyo ya Morena. ₇Mme Balefi ba eme tikologong ya kgosi, mongwe le mongwe a tshotse dibolai tsa gagwe. Yo o ka reng o a tsena mo Ntlong ya Modimo a bolawe. Lo nne le kgosi, fa e tsena le fa e tswa.”

₈Balefi le Bajuta botlhe ba dira fela jaaka Joyata moperesiti a laetse; mongwe le mongwe a tsaya banna ba gagwe ba ba yang gae ka Sabata le ba ba tlang tirong ka Sabata; gonne Joyata moperesiti a se ka a naya ditlhopha tse di gologileng tsela. ₉Mme Joyata moperesiti a neela balaodi ba makgolo marumo le dithebe le dithejana tsa kgosi Dafita tse di neng di le mo Ntlong ya Modimo. ₁₀A ba a emisa batho botlhe, ba tshwere marumo ka diatla go tloga sekhutlong sa Tempele sa borwa go fitlha sekhutlong sa Tempele sa bokone fa gare ga aletare le Tempele gore ba nne mo tikologong ya kgosi. ₁₁Jaanong ba ntsha morwa kgosi, ba mo rwesa serwalo sa bogosi le tshupo ya molao, ba mo dira kgosi, mme Joyata le bomorwawe ba mo tlotsa ba re: “A kgosi e tshele!”

₁₂Mme e rile Athalea a utlwa modumo wa batho ba ba tabogang le go dudueletsa kgosi, a ya kwa bathong kwa Ntlong ya Morena. ₁₃A leba a bona kgosi e eme mo sefateng sa yona fa mojakong wa Tempele le dikgosana le ba diphala ba le fa kgosing le batho botlhe ba kwa nageng ba thabile, ba letsa diphala, le baopedi ba tshwere diletso, ba letsa tsa go duduetsa. Ke fa Athalea a ikgagola diaparo a re: “A pheretlhego! A pheretlhego!”

₁₄Mme moperesiti Joyata a laela balaodi ba makgolo le baokamedi ba mephato, a ba raya a re: “Mo ntsheng lo mo tsenye fa gare ga batlhabani ba ba bopeletseng. Yo o mo salang morago a a bolawe ka tšhaka.” Gonne moperesiti o ne a laetse a re: “Lo se ka lwa mmolaela fa Ntlong ya Morena.”

₁₅Ba mo tshwara, mme ya re a fitlha kwa kgorong ya dipitse ya lelapa la kgosi, ba mmolaela teng.

₁₆Ke fa Joyata a dira kgolagano fa gare ga gagwe le morafe otlhe le kgosi ya gore, ba tla nna morafe wa Morena. ₁₇Ya ba gona batho botlhe ba tsenang mo tempeleng ya ga Baale ba e diga, ba thubaganya dialetare tsa yona le ditshwantsho tsa yona, ba bolaya Mathane moperesiti wa ga Baale fa pele ga dialetare. ₁₈Joyata a ba a tsenya kokamelo ya Ntlo ya Morena mo diatleng tsa baperesiti le Balefi ba Dafita o neng a ba kgaogantse ditlhopha tse di amoganang tirelong ya Ntlo ya Morena gore ba dire ditlhabelo tsa phiso tsa Morena ka boitumelo le kopelo ka taelo ya ga Dafita jaaka go kwadilwe mo molaong wa ga Moše. ₁₉A ba a tlhoma badisa fa dikgorong tsa Ntlo ya Morena gore go se ka ga tsena ope yo o itshekologileng ka sengwe.

₂₀Jaanong a tsaya balaodi ba makgolo le batlotlegi le dikgosana le batho botlhe ba kwa nageng, a folosa kgosi mo Ntlong ya Morena, ba tsena ka kgoro e e kwa godimo mo ntlong ya kgosi, ba baya kgosi mo sedulong sa bogosi. ₂₁Mme batho botlhe ba kwa nageng ba itumela, motse ona o iketlile. Athalea ba mmolaile ka tšhaka.