2 DITIRAFALO 33

₁Manase o ne a le dinyaga di le 15, fa a nna kgosi; a busa dinyaga di le 55 kwa Jerusalema. ₂A dira tse di bosula mo matlhong a Morena, tse di tshwanang le makgapha a baheitane ba Morena o neng a ba lelekile fa pele ga Baiseraele. ₃A boela a tsosa dithota tsa tlhabelo tse Hesekia rraagwe o neng a di digile, a agela boBaale dialetare, a dira medimako ya Ašera, a ba a obamela lesomo lotlhe la legodimo, a le direla. ₄Le gona a aga dialetare tsa medimo kwa Ntlong ya Morena, e Morena o buileng ka ga yona a re: “Leina la me le tla nna kwa Jerusalema ka bosakhutleng.” ₅O bile a agela lesomo lotlhe la legodimo dialetare mo malapeng a mabedi a Ntlo ya Morena. ₆Ke ene yo o neng a ralatsa bomorwawe molelo kwa mogorogorong wa Morwa-Hinome, a dira tsa mereo ya boloi le tsa botlhodi le tsa neelelo, a tlhoma ba ba buang le baswi le baitseanape; a dira tse dintsi tse di bosula mo matlhong a Morena go mo gakatsa. ₇Le gona a dira modimo wa seseto, a o emisa mo Ntlong ya Modimo, e Modimo o buileng ka ga yona le Dafita le Salomo morwawe wa re: “Ke mo Ntlong e le mo Jerusalema yo ke mo tlhophileng mo ditsong tsotlhe tsa Iseraele fa ke tla bayang leina la me teng ka bosakhutleng. ₈Mme ga nkitla ke tlhola ke tlosa dinao tsa Baiseraele mo nageng e ke e neetseng borraeno. Ke raya fela, fa ba tlhokomela go dira tsotlhe tse ke di ba laetseng ka Moše, e bong molao otlhe le ditaolo le ditshiamelo.” ₉Mme Manase a timetsa Bajuta le baagi ba Jerusalema gore ba dire bosula bogolo go baheitane ba Morena o neng a ba nyeleditse fa pele ga Baiseraele.

₁₀Ke fa Morena a bua le Manase le morafe wa gagwe, mme ba se ka ba ela tlhoko. ₁₁Ka moo Morena a ba bololetsa balaodi ba mephato ya kgosi ya Asiria, ba tshwara Manase ka dikobe, ba mmofa dinao ka dikeetane ba mo isa kwa Babele. ₁₂Mme ya re a le mo tlalelong, a kopa bopelotlhomogi mo Moreneng, Modimo wa gagwe, a ikokobetsa thata fa pele ga Modimo wa borraagwe; ₁₃a o rapela, mme wa mo rapelesegela, wa utlwa mokokotlelo wa gagwe, wa mmusetsa kwa Jerusalema le mo bogosing jwa gagwe. Ke fa Manase a lemoga gore Modimo ke one Morena.

₁₄Morago ga moo a aga lobota lwa ka kwa ntle lwa motse wa ga Dafita go pota nokana ya Kihone ntlheng ya bophirima mo molapong le go fitlha kwa Kgorong ya Ditlhapi; a lo potolosa thota ya Ofele, a lo godisa thata, a ba a baya balaodi ba mephato mo metseng yotlhe e e femetsweng ya Juta. ₁₅A ba a tlosa medimo ya seeng le modimo wa seseto mo Ntlong ya Morena le dialetare tsotlhe tse o neng a di agile mo thabeng ya Ntlo ya Morena le mo Jerusalema, a di latlhela kwa ntle ga motse. ₁₆A ba a baakanya aletare ya Morena, a dira ditlhabelo tsa tebogo le tsa pako mo go yona; a ba a laela Bajuta gore ba direle Morena, Modimo wa Iseraele. ₁₇Le gale batho ba ne ba sa ntse ba dira ditlhabelo mo dithoteng tsa tlhabelo, mme e le tsa Morena, Modimo wa bone, fela.

₁₈Ditirafalo tse dingwe tsa ga Manase le thapelo ya gagwe go Modimo wa gagwe le mafoko a baboni ba ba buileng nae ka taelo ya Morena, Modimo wa Iseraele, kana di kwadilwe mo ditirafalong tsa dikgosi tsa Iseraele. ₁₉Mme thapelo ya gagwe le ka fa a utlwilweng ka teng le boleo jotlhe jwa gagwe le boikanyologo jwa gagwe le mafelo kwa o neng a aga dithota tsa tlhabelo, a tlhoma medimako ya Ašera le medimo ya diseto teng, a ise a ikokobetse, kana tsona di kwadilwe mo ditirafalong tsa baboni. ₂₀Mme Manase a robala le borraagwe, a fitlhwa fa ntlong ya gagwe, mme Amone morwawe a nna kgosi mo boemong jwa gagwe.

₂₁Amone o ne a le dinyaga di le 22, fa a nna kgosi; a busa dinyaga di le pedi kwa Jerusalema. ₂₂A dira tse di bosula mo matlhong a Morena jaaka go ne go dirile Manase rraagwe. Amone a tlhabela medimo ya diseto yotlhe e e neng e dirilwe ke Manase rraagwe a e direla. ₂₃Mme a se ka a ikokobetsa fa pele ga Morena jaaka go ne ga dira Manase rraagwe, mme ene Amone a godisa molato fela.

₂₄Mme batlhanka ba gagwe ba mo tsosetsa moferefere, ba mmolaela mo ntlong ya gagwe. ₂₅Ke fa batho ba kwa nageng ba bolaya botlhe ba ba neng ba tsoseditse kgosi Amone moferefere; batho ba kwa nageng ba dira Josia morwawe kgosi mo boemong jwa gagwe.