Lisiase o ya go tlhasela lwa ntlha
1E rile moragonyana ga moo, Lisiase motlhokomedi wa kgosi le ntsalaayone, yo e neng e le ene letsogo la yone, a tlhobaediwa ke ka mo a neng a bonye dilo di tsamaya ka teng. 2Ke fa a phutha batlhabani-batsamai ba le 80 000 le batlhabani-bapalami ba gagwe botlhe, a ya go tlhasela Bajuta, a ikaeletse go dira Motse o o Boitshepo felo fa Magerika a ka nnang teng. 3A ikaeletse gape go kgethisa jaaka go ne go kgethisiwa mafelo a mangwe a a boitshepo a thapelo a ditšhaba tse dingwe, le go bapatsa maemo a moprista yo mogolo ngwaga nngwe le nngwe. 4A tlhokomologa nonofo ya Modimo gotlhelele fela, e le gore o ikantse boidiidi jwa batlhabani-batsamai ba gagwe le matshwititshwiti a batlhabani-bapalami ba gagwe le ditlou tsa gagwe tse di neng di le 80. 5Ya re a tlhasela Juta a atamela Bethesure, o e neng e le felo fa go thatafaditsweng mo go batlang go na le dimaele di le 20 go tswa mo Jerusalema mme a go pitlaganya tota.
6E rile Makabeuse le banna ba gagwe ba utlwa fa Lisiase a tlhasela mafelo a phemelo ka thekeletso, bone le batho botlhe ba kopa Morena ka dilelo le dikeledi go ba romelela moengele yo o molemo go tla go thusa Israela. 7Makabeuse ka boene e ne ya nna ene wa ntlha go tsaya dibolao mme a tlhotlheletsa ba bangwe gore ba se ka ba rekegela botshelo jwa bone mo go thuseng bomorwarraabone. Ke fa ba kgweloga senna, ba le seoposengwe. 8Ya re ba sa ntse ba le gaufi le Jerusalema ga tlhaga mopalami mongwe a apere diaparo tse ditshweu, a ba eteletse pele, a ntse a tsokotsa dibetsa tsa gouta. 9Botlhe ba baka Modimo wa boutlwelo-botlhoko mmogo, mme ba fitlhela e le gore ba tletse bopelokgale mo e leng gore ba ne ba utlwa ba ka nna ba diga le dibatana tse di boitshegang le dipotana tsa tshipi tota, e seng batho fela. 10Ba dira theko go ya go tlhasela, ba thusiwa ke mothusi wa bone yo o neng a tswa legodimong, Morena a ba utlwetse botlhoko. 11Ba tlhasela baba ba bone jaaka ditau mme ba diga batlhabani-batsamai ba le 11 000 le batlhabani-bapalami ba le 1 600, mme ba unyalatsa ba bangwe botlhe. 12Ba le bantsi ba ba neng ba unyalala ba, ba ne ba sia ba kobesitswe e bile ba se na ditlhomelo. Lisiase ka boene o ne a falola ka go sia mo go tlhabisang ditlhong.
Lisiase o agisana le Bajuta. Dikwalo tse nne tse di bua ka Tumalano
13Jaanong Lisiase, yo e neng e le motho yo e seng sematla, o ne a akanya ka phenyo e o neng a fentswe ka yone, mme a lemoga gore Bahebera ga ba kake ba fenngwa ka gonne Modimo o o nonofileng o a ba lwela. Ke fa a romela lentswe kwa go bone, 14a ba umakela gore ba utlwane ka tshiamo mo go sengwe le sengwe, e bile a solofetsa gore o tla tlhotlheletsa le kgosi tota gore e nne tsala ya bone. 15Ka gonne Makabeuse o ne a batla se se siametseng setšhaba ka kakaretso, o ne a dumalana le tsotlhe tse Lisiase a neng a di bua. Mme kgosi e ne e dumalana le sengwe le sengwe se Makabeuse a neng a se baya fa pele ga yone a se kwadile mabapi le Bajuta.
16Mafoko a lokwalo lo Lisiase a neng a lo kwalela Bajuta ke a: “Nna, Lisiase, ke kwalela lona Bajuta ka re: madume. 17Bo-Johane le Absalome ba lo neng lo ba romile, ba nneetse lokwalo lo lo kwadilweng fa tlase, ba nkopa gore ke dumalane le se se kwadilweng mo go lone. 18Ke boleletse kgosi sengwe le sengwe se a neng a tlhoka go se itsisiwe. Ke letlile se ke neng ke kgona go se letla, nna. 19Fa lo ka tswelela-pele go nna lo utlwana le mmuso ke tlaa dira bojotlhe jwa me go lo thusa mo nakong e e tlang go tsweledisetsa pele ditiro tsa lona sentle. 20Ke laetse barongwa ba lona le magosana a me go bua ka dilo tse tsotlhe le lona. 21Masego le matlhogonolo go lona! Ngwaga wa 148, letsatsi la bo-24 la kgwedi ya Diosekorose.”
22Lokwalo lwa kgosi lone lo ne lo kwadilwe jaana: “Nna, Kgosi Antiokuse ke kwalela wena morwarre, Lisiase ka re: madume. 23Ka jaana rraarona o iketse badimong, re ne re rata gore batho ba puso ya rona ba nne ba sa tshwenngwe ke sepe gore ba tle ba tlhokomele ditiro tsa bone sentle. 24Re utlwa fa Bajuta ba sa dumalane le mokgwa wa go busa wa rraarona, go tsaya mekgwa ya Segerika. Mme ba bona mekgwa ya bone e le botoka, ba bile ba kopa gore ba dumelelwe go tshegetsa melao ya bone. 25Jalo he, ka gonne re batla gore batho ba jaaka ba bangwe, ba se ka ba nna ba kgopisiwa re laela gore ba busediwe Tempele le gore ba tsamaise ditiro tsa bone ka fa mekgweng ya bagologolo ba bone. 26Jalo he, lo tlaa dira sentle fa lo ka ba romelela lentswe la go dira botsala nabo, gore e tle e re ba itse mokgwa wa lona wa go busa ba tle ba kgothale mme ba tswelele-pele mo ditirong tsa bone ka boitumelo.”
27Lokwalo lo kgosi e neng ya lo kwalela setšhaba sa Bajuta lo ne lo kwadilwe ka mafoko a: “Nna, kgosi Antiokuse, ke kwalela lekgotla la bagolo la Bajuta le Bajuta ba bangwe ka re: madume. 28Fa e le gore lo tsogile sentle, re a itumela, le rona re tsogile sentle. 29Menelause o re bolelela gore lo ne lo eletsa go boela gae jaanong go ya go dira ditiro tsa lona. 30Jalo he, botlhe ba ba tlaa boelang gae pele ga letsatsi la bo-13 la ga Xanthikuse ba se ka ba bo ba boifa sepe. 31Bajuta ba ka nna ba ja mofuta wa dijo tsa bone, mme ba latela melao ya bone jaaka pele. Le gone ga go kitla go tshwenngwa ope ka mokgwa ope ka ntlha ya diphoso tse a sa di dirang ka bomo. 32Tota e bile ke romela Menelause kwa go lona gore lo tle lo wele makgwafo. 33Salang sentle. Mo ngwageng wa 148, ka letsatsi la bo-15 la ga Xanthikuse.”
34Baroma le bone ba ne ba romelela Bajuta lokwalo lo lo neng lo kwadilwe jaana: “Rona bo-Kwinthuse Memmiuse, le Tituse Maniuse, ba re leng baemedi ba Baroma, re kwalela batho ba Bajuta, ra re, madume. 35Re dumalana le sengwe le sengwe se Lisiase, ntsalaa kgosi, a se lo dumeletseng. 36Fa e le dilo tse a bonyeng go le botoka gore a di itsise kgosi, e re fela jaaka lo sena go nna lo di akanya sentle, lo bo lo re romelela mongwe ka bonako, gore re tle re di tlhalose sentle ka mokgwa o o tlaa lo itumedisang, gonne re tloga re ya Antioko. 37Jalo he, itlhaganeleng, lo re romelele bangwe ba ba tlaa re bolelelang gore maikaelelo a lona ke afe. 38Salang sentle. Mo ngwageng wa bo-148, ka letsatsi la bo-15 la ga Xanthikuse.”
