2 MAKABISE 14

₁Dingwaga tse tharo morago ga mo, Judase la banna ba gagwe ba ne ba utlwa fa Demeteriuse morwa Seleukuse a ne a gorogile kwa boemeladikepe jwa Teripolise ka namane e tona ya lekoko le dikepe tse dintsi. ₂Ba utlwa le gore o ne a gapile lefatshe e bile a bolaile Antiokuse le Lisiase, motlamedi wa gagwe.

₃Alekimuse mongwe yo o neng a kile a nna moprista yo mogolo, o ne a iteswefaditse ka bomo ka nako ya mokubukubu. Ya re a lemoga gore o dira eng kgotsa eng, o ntse a le mo diphatseng fela, le gone ga a kake a tlhola a fitlhe kwa aletareng e e boitshepo. ₄a ya kwa go kgosi Demeteriuse, e ka ne e le ka ngwaga wa 151, mme a e naya serwalo sa gouta le palema mmogo le dikala tsa matlhware tsa gale tse di neng di tswa mo Tempeleng; letsatsing leo a tlhola a didimetse. ₅Ke fa a bona nako e e neng e siametse maikaelelo a gagwe a a bosula. E ne ya re Demeteriuse a mmiletsa mo phuthegong ya bagakolodi ba gagwe a mmotsa gore maikutlo le maikaelelo a Bajuta a eme jang; a fetola a re, ₆“Bajuta bale ba ba bidiwang Mahasidaea, ba ba eteletsweng pele ke Judase Makabeuse, ke bo-ntwa-dumela e bile ke dirukutlhi, ba ba tlholang ba nnetse go feretlha puso. ₇Ke gone ka moo e reng ke sena go amogiwa tlotlo e e leng boswa jwa me, ke raya go nna moprista yo mogolo, ke bo ke tla kwano. ₈Lwa ntlha, ke ka ntlha ya gore tota ke rata go thusa kgosi, lwa bobedi, ka ntlha ya gore ke rata go thusa bagaetsho, gonne ka ntlha ya boeleele jwa botlhe ba, ke setseng ke ba umakile, setšhaba sa rona sotlhe se tlontlolotswe. ₉A e re wena kgosi O sena go akanya sentle dilo tse tsotlhe, O ko O bone gore O ka thusa lefatshe la rona jang le setšhaba se se gateletsweng, jaaka go tshwanela bomolemo jo O bo direlang batho botlhe. ₁₀Gonne fa fela Judase a sa ntse a tshela, mmuso ga o kitla o bo o nna le kagiso.”

₁₁Ya re Alekimuse a sena go bua jaana, ba bangwe ba Ditsala tsa Kgosi ba ba neng ba tlhoile Judase, ba bona nako e e ba siametseng gore ba oketse bogale jwa ga Demeteriuse, gore a mo galefele go feta. ₁₂Ka bonakonako a tlhopa Nikanore yo o neng a ntse a le molaodi wa ditlou, a mo dira motsamaisi wa batlhabani wa Juta, a bo a mo roma, ₁₃a mo laetse go ya go bolaya Judase, go phatlalatsa balatedi ba gagwe, le go dira Alekimuse moprista yo mogolo wa Tempele e e fetang ditempele tsotlhe. ₁₄Baheitane ba ba neng ba le kwa Juta, ba ba neng ba tshabile Judase, ba ne ba olesegela mo lesomong la ga Nikanore, ba gopola gore bomadimabe le matshwenyego a Bajuta e tla nna letlhogonolo mo go bone.

₁₅E rile Bajuta ba utlwa gore Nikanore o e tla, le gore baheitane ba tloga ba tlhasela, ba ikgasa lerole, mme ba rapela One o o neng o tlhomile batho ba one gore ba nnele ruri, mme o ise o ko o tlhoke go thusa boswa jwa one ka go itlisa kwa go jone. ₁₆Ya re moeteledipele wa bone a ba laela, ba tswa mo ba neng ba le teng mme ba tla go tlhasela baba ba bone kwa motseng wa Dessau. ₁₇Simone, morwarraagwe Judase, o ne a thulanye le Nikanore, fela ka ntlha ya go goroga ga baba ba gagwe ba a neng a sa ba solofela o ne a batla a fekeetsega go le gonnye. ₁₈Le fa go ntse jalo, Nikanore o ne a utlwile ka mo Judase le banna ba gagwe ba neng ba le pelokgale ka teng, le jaaka ba tlhola ba lwela lefatshe la bone ka bonatla. Mme a se ka a bo a rata gore polao e nne yone makgaola-kgang. ₁₉Ke fa a romela Posidoniuse, Theodotuse le Mathatia go ya go dira ditsholofetso tsa botsala le Bajuta le go amogela tsa bone.

₂₀Ya re moeteledipele a sena go nna a akanya sentle mabaka a, a a bolelela mephato, mme ka gonne ba ne ba bonala sentle gore ba moya mongwe fela, ba dumalana le kgolagano e. ₂₁Ga tlhomiwa letsatsi le baeteledipele ba neng ba tlaa kopana ka lone ba le bosi, golo gongwe fa e seng ga ga ope. Ga tswa kara mo lekokong lengwe le lengwe, mme ga rakalatswa ditilo. ₂₂Judase o ne a beile banna bangwe, ba tlhometse, mo mafelong a a siametseng tlhaselo go tlhokomela gore go se ka ga nna le bolotsanyana bongwe jo baba ba neng ba ka re ba a bo dira. Baeteledipele ba tshwara pitso ya bone mme ba dira ditumalano. ₂₃Nikanore a nna mo Jerusalema mme a se ka a dira sepe se se sa siamang teng. A bo a phatlalatsa batho ba bantsi ba ba neng ba olesegetse mo lesomong la gagwe. ₂₄A tlhola a na le Judase, a mo rata thata. ₂₅Mme a mo kgothaletsa go nyala le go nna le bana. Judase a nyala, a ritibala, mme a tshela botshelo jo bo siameng.

₂₆E rile Alekimuse a bona gore banna ba babedi ba ba a utlwana, a ya kwa go Demeteriuse ka lokwalo lwa kgolagano lo ba neng ba kwadile maina a bone mo go lone. A feta a mo raya a re Nikanore o tlhanogetse mmuso, le gone o ntse a baakanyetsa gore Judase, yo e neng e le mmaba yo mogolo wa puso, e nne mongwe wa Ditsala tsa Kgosi a tseye maemo a mongwe yo o tlaa tlhokofalang. ₂₇Kgosi ya gakala mo go maswe. A gakadiwa ke dikakelo tsa namane e tona ya molotsana. Mme a kwalela Nikanore, a mmolelela ka mo a sa itumelelang kgolagano ka teng, a bile a mo laela gore a romele Makabeuse kwa Antioko ka bonako, a golegilwe.

₂₈Ya re lokwalo lo goroga kwa go Nikanore, a tenega mo go maswe, mme ka gonne o ne a utlwa gore go thata go roba tumalano le gore a tlhanogele motho yo o neng a sa dira sepe se se bosula. ₂₉Le fa go ntse jalo, o ne a ka se ka a bo a ganetsana le kgosi. Jalo he, a emela nako e e siameng gore a dire se a neng a se laetswe ka bolotsanyana bongwe. ₃₀Makabeuse a simolola go lemoga gore Nikanore o ne a le bogalenyana mo go ene, le gore o simolotse go mo kgaolela fa a bua nae. Mme a bona gore maikaelelo a bogalenyana jo ga a kake a bo a nna a a siameng. Ke fa a phutha balatedi ba gagwe ba le bantsi a bo a ikgoga mo go Nikanore.

₃₁E rile Nikanore a lemoga gore Judase o mo tsomeditse tota, a ya kwa Tempeleng e kgolo e e boitshepo ka nako e baprista ba neng ba ntsha ditshupelo tsa gale ka yone, mme a ba laela gore ba mo neele Judase. ₃₂Ya re ba ganela, ba ikana, gore ga ba itse kwa motho yo, yo o neng a batliwa a le gone, ₃₃a tsholetsa letsogo la gagwe la moja mme a ikana jaana, “Fa lo sa nneele Judase e le legolegwa, ke tlaa gosomanya felo fa go boitshepo fa ga Modimo. Ke tlaa diga aletara. Mme ke tlaa agela Dionisuse tempele e ntle gone fa.” ₃₄Ya re a sena go bua jaana a ba tlogela. Baprista ba tsholeletsa diatla tsa bone kwa go One wa legodimo. Ba o bitsa One o o tlholang o lwela setšhaba sa rona. Mme ba ne ba rapela jaana: ₃₅“Oh Morena, wena yo O sa tlhokeng lefa e le sepe, O ratile gore mo gare ga rona go nne le Tempele e e leng boago jwa gago. ₃₆Jaanong he, Morena yo o boitshepo jotlhe, a O ko O kgaphele kgakala le ntlo e e leng gone e ne e phepafadiwa e, itshepololo yotlhe.”

₃₇Jaanong Rasise mongwe yo o e neng e le mongwe wa bagolwane ba Jerusalema, o ne a buiwa maswe mo go Nikanore. E ne e le motho yo o ratang ba ga gabo, mme ba mo tlotla thata, a itsege e le ra-Bajuta ka ntlha ya bopelonomi jwa gagwe. ₃₈Mo malatsing a ntlha a mokubukubu o ne a bonwa molato wa gore o kakatletse Bojuta, mme o ne a baya mmele le botshelo jwa gagwe mo kotsing ka ntlha ya Bojuta ka tlhwaafalo e kgolo. ₃₉Nikanore o ne a romela batlhabani ba le 500 go ya go mo tshwara gore a bontshe letlhoo le a neng a tlhoile Bajuta ka lone, ₄₀a ithaya a re fa a ka thibosa monna yo, o tlaa bo a ba utlwisitse botlhoko mo go maswe. ₄₁E rile fela mephato e tloga e gapa kago e e goletseng godimo ya phemelo ba ntse ba henahenana le dikgoro tsa lolwapa, mme ba re go tsisiwe molelo gore ba tle ba tshube ditswalo, Rasise ya re a bona gore o setse a dikaganyeditswe ka ntlha tsotlhe, a itigela mo tšhakeng ya gagwe. ₄₂A bona go le botoka gore a swe go na le go wela mo diatleng tsa balotsana ba, mme a tlontlololwe ka ditlontlololo tse di ronang losika lo lo tlotlegang lo a tsetsweng mme a golela mo go lone.

₄₃Fela mo modubadubeng o wa ntwa, o ne a iphosa, mme ya re mephato e tsena e sukaganye ka dikgoro, a makwela lobota, ka bopelokgale a itatlhela mo gare ga mephato. ₄₄Mme ka gonne batlhabani ba ne ba kata ka sa mmamorago o ne a wela mo go neng go se na ope teng. ₄₅Ya re a ntse a hema, a tšhatšhama ka bogale a leka go ema, madi a pumpunyega mo go ene gongwe le gongwe, mme le mororo a ne a gomilwe ke dintho tse di boitshegang, o ne a ralala batho ba bantsi, a ema mo godimo ga lefika le le mokgokolosa. ₄₆Le mororo a ne a sa tlhole a na le madi ape, o ne a ikgakgamolola mala, a a tsaya a le mo diatleng tsoopedi, mme a a furinyetsa mo gare ga mephato, a ntse a bitsa Morena wa botshelo le moya gore a a mmusetse tsatsi lengwe.

A feta jalo.