2 MAKABISE 3

₁E rile go ntse go nniwa mo Motseng o o Boitshepo ka kagiso mme batho ba ntse ba tshegetsa melao sentle ka mo ba neng ba kgona ka teng, ka ntlha ya borapedi jwa ga Oniase, moprista yo mogolo le go tlhoa bosula ga gagwe, ₂go ne ga diragala gore magosi ka boone ba tlotle Lefatshe le le Boitshepo mme ba godise kgalalelo ya Tempele ka dineo tse dintle thata, ₃mo e leng gore Selukuse ene o ne a bo a duelela ditshenyegelo tsotlhe tse di tswang mo ditirelong tsa ditshupelo, ka madi a letlole la gagwe.

₄Fela monna mongwe yo o neng a bidiwa Simone, wa morafe wa ga Bilega, e rile a sena go dirwa motsamaisi wa Tempele, a fapaana le moprista yo mogolo kaga tsamaiso ya marekisetso a motse. ₅Mme e ne ya re a sa kgone Oniase, a ya kwa go Apolloniuse wa Taresuse, yo ka nako eo e neng e le motsamaisi wa batlhabani wa Koele-Siria le Fenisia. ₆A feta a mmolelela gore Letlole la Madi kwa Jerusalema le tletse namane e tona ya madi, le gore madi a a ntshiwang ga a na palo, mo e leng gore a feta kgakala a ditshenyegelo tsa ditshupelo. A mmolelela gape gore a ne a ka nna a laolwa ke kgosi.

₇Apolloniuse a ya go bona kgosi mme a e bolelela ka ga madi a mantsi a a neng a utlwile ka one. Ke fa kgosi e tlhopa Heliodoruse, yo e neng e le letsogo la gagwe, a mo roma ka taelo ya go ya go tsaya madi a mantsi a go neng go builwe ka one a. ₈Heliodoruse a se ka a bo a diega go tsamaya, e kete o ya go tlhatlhoba metse ya Koele-Siria le Fenisia, mme tota a ya go dira jaaka kgosi e ne e ikaeletse. ₉Ya re a sena go goroga kwa Jerusalema, mme moprista yo mogolo le batho ba motse ba mo amogetse ka pelo e tshweu, a bolelela se se neng se boleletswe; ka mokgwa oo a senola gore o tletseng. A bo a botsa gore a ka nnete go ntse jalo. ₁₀Moprista yo mogolo a tlhalosa gore go na le madi a a beetsweng batlholagadi le masiela, ₁₁mmogo le a mangwe a e leng a ga Hirekanuse morwa Tobiase, motho wa maemo a a kwa godimo. A bo a tlhalosa gore madi otlhe a kana ka ditalenta tsa selefera di le 400 le tsa gouta di le 100, e seng jaaka Simone yo o bosula a ne a boletse. ₁₂O ne a bo a tlatseletsa ka go bolela gore go ne go ka se ka ga bo ga direga gore go siamololelwe botlhe ba ba neng ba ikantse boitshepo jwa felo fa le botlotlegi jo bo ka se kang jwa kgotlelwa jwa Tempele e batho ba lefatshe lotlhe ba e tlotlang thata.

₁₃Fela Heliodoruse, ka ntlha ya gore o ne a laetswe ke kgosi, a nna a gatelela gore madi a tshwanetse gore a bo a nne a gapiwe, a isiwe kwa letloleng la kgosi. ₁₄Ya re a sena go tlhomela maikaelelo a letsatsi, a ya go tlhatlhoba madi a, go bona gore a kana kang. Batho mo motseng otlhe ba sala ba akabetse. ₁₅Baprista ka diaparo tsa bone tse di boitshepo ba itigela fa pele ga aletare mme ba rapela One wa legodimo, motlhomi wa molao o o laolang madi a a ipeetsweng, gore a bolokele baipeedi ba madi a bone, a se angwe ke ope. ₁₆Moprista yo mogolo e ne e a re a tlhaga a tlhomole mongwe le mongwe yo o neng a mo lebile pelo, kutlobotlhoko ya moya wa gagwe e ne e bonala mo sefatlhogong sa gagwe le mo go fetogeng mmala ga gagwe. ₁₇Motho wa batho o ne a tshogile mo go maswe e bile a ntse a roroma mo e leng gore mongwe le mongwe yo o neng a mmona o ne a ka se ka a bo a tlhoka go lemoga gore o utlwile botlhoko tota. ₁₈Batho ba ne ba betsega mo matlong a bone, ba itlhaganeletse go ya go rapela mo pontsheng ka ntlha ya tlontlololo e Felo mo go Boitshepo go neng go tloga go tlontlololwa ka yone. ₁₉Basadi ba sukagana mo mebileng, ba ikgatlhile ka letsela la kgetsi fa tlase ga mabele a bone. Basetsana ba ba neng ba tlhaoletswe mo matlong, ba taboga mmogo, bangwe ba tabogela kwa dikgorong, ba bangwe ba tabogela kwa dipotaneng tsa motse, fa ba bangwe bone ba ne ba okometse ka difensetere. ₂₀Mme botlhe ba tsholeletsa diatla tsa bone kwa go One wa Legodimo, ba o rapela. ₂₁E ne e le selo se se tlhomolang pelo go bona batho ba sukaganye go ya go itigela fa fatshe. Go akanya moprista yo mogolo mo kutlobotlhokong ya gagwe e kgolo le gone go ne go ngomola pelo.

₂₂Fa bone ba ntse ba rapela Morena yo o thatayotlhe gore a bolokele baipeedi madi a bone, a sa kgongwa ke ope, e bile a bolokesegile sentle, ₂₃Heliodoruse ene o ne a nna a tswelelapele ka tiro e a neng a e neetswe.

₂₄E ne ya re fela jaaka a fitlha gaufi le Letlole la Boboloka-Madi, a na le bapati ba gagwe, Morena wa mewa yotlhe le wa dithata tsotlhe a dira ponatsho e kgolo mo e leng gore botlhe ba ba neng ba le pelokgale go pata Heliodoruse ba ne ba gamarega fela fa ba bona nonofo ya Modimo, mme ba tshoga mo go maswe. ₂₅Ba ne ba bona pitse e tlhaga e gomilwe ka makgabisa mme e palangwe ke mopalami yo o tshabegang. Ya tsholetsega ka bonako mme ya betsa Heliodoruse ka maoto a pele. Mopalami a bonala a tlhometse ka dibolao le diaparo tsa gouta fela. ₂₆Ka yone nako eo a bona le makau a mabedi, a a kwenneng sentle, a mantle, a kgabile thata. Lengwe la mo pota ka fa le lengwe ka fa, mme ba mo gotlha ba sa mo iketlele, ba mo tlhatlhaganyetsa dithupa. ₂₇Ka tshoganyetso Heliodoruse pirigana, a bipilwe ke lefifi le lentsho. Banna ba gagwe ba tla go mo thusa, ba mmaya mo setsholong, ₂₈ene mothakanyana yo, yo pelenyana ga moo, a neng a tsena mo Boboloka-Madi, jaaka re setse re boletse, a na le batlhanka ba bantsi le bapati ba gagwe. Mme ya re ba ntse ba mo kamere jaana, a ka se ka a bo a ithusa ka sepe, ba lemoga sentle nonofo e kgolo ya Modimo.

₂₉Ya re Heliodoruse a ntse a kgwaphaletse jaana, a tlobeletswe ke Modimo o o neng o mo etetse, a se na le fa e le puo kgotsa tsholofelo ya gore o tlaa bo a thusege. ₃₀Bajuta bone ba bo ba baka Morena yo o neng a galaleditse Felo fa go Boitshepo ga gagwe ka mokgwa o o gakgamatsang. Mme Tempele e pelenyana ga moo go neng go ntse madubadube mo go yone, jaanong e ne e phophoma ka boitumelo le boipelo, e ipelela go iponatsha ga Morena yo o thatayotlhe. ₃₁Bangwe ba ditsala tsa ga Heliodoruse ba itlhaganelela kwa go Oniase go ya go mo kopa go rapela Mogodimodimo, go naya motho yo, yo o neng a rapaletse fa fatshe a le gaufi le go swa, botshelo. ₃₂Moprista yo mogolo, ka a ne a boifa gore kgosi e ka tloga ya belaela gore Bajuta ba dirile Heliodoruse sengwe se se bosula o ne a bo a mo ntshetsa tshupelo gore a fole. ₃₃Mme ya re moprista yo mogolo a ntse a tshwere tirelo ya tefelo jaana, Heliodoruse a bona one makau ale gape a ntse a apere tsone diaparo tsele, a ema go bapa nae a re, “O leboge Oniase moprista yo mogolo thata, gonne ke ka ntlha ya gagwe fela Morena a go neileng botshelo jwa gago. ₃₄Fa e le wena, yo kotlhao ya gago e dule kwa legodimong, O tsamaye O ntse O bolelela batho botlhe bogolo jwa nonofo ya Modimo.” Ya re ba bua jaana ba nyelela.

₃₅Heliodoruse a ntshetsa Morena tshupelo, mme a direla mmoloki wa botshelo jwa gagwe maikano a magolo, mme ka maitseo a sadisa Oniase pila. A busetsa mephato ya gagwe kwa kgosing. ₃₆A bolelela batho botlhe mo pontsheng ditiro tsa Modimo o o kwa godimodimo ga medimo yotlhe tse a neng a di iponetse ka matlho.

₃₇Ya re kgosi e botsa Heliodoruse gore motho yo o siametseng go romelwa kwa Jerusalema lwa bobedi ke yo o ntseng jang, a mo fetola a re, ₃₈“Fa e le gore O na le mongwe yo o go tlhoileng kgotsa yo o rukhutlhelang mmuso, mo romele teng, mme o tlaa boela kwa go wena a gotlhilwe tota, fa e le gore le go tshela o tlaa tshela, gonne felo fa go tota go na le thata nngwe ya Modimo e e sa tlwaelegang. ₃₉One o o nnang kwa Legodimong o lebeletse felo fa, o a go femela, mme o betsa botlhe ba ba tlang go go senya, o ba bolaya.” ₄₀A ke one mafelelo a tiro ya ga Heliodoruse le tshireletso ya Bobeela-Madi.