2 SAMUELE 10

₁Morago ga moo Nahase kgosi ya Baamone a swa, mme Hanune morwaa-yona a nna kgosi mo boemong jwa yona. ₂Ke fa Dafita a re: “Ke tla direla Hanune morwa Nahase ka bopelotlhomogi jaaka rraagwe a ntiretse ka bopelotlhomogi.” Ka moo Dafita a roma batlhanka ba gagwe go mo tshedisa ka ntlha ya ga rraagwe. Mme ya re batlhanka ba ga Dafita ba fitlha kwa nageng ya Baamone, ₃dikgosana tsa Baamone tsa raya Hanune morena wa tsona, tsa re: “A o a re Dafita o tlotla rraago, ka a romile bagomotsi kwa go wena? A ga se gore Dafita o romile batlhanka ba gagwe kwa go wena go sekaseka motse o le go o tlhola le go o senya?”

₄Ke fa Hanune a tshwara batlhanka ba ga Dafita, a ba beola bontlhanngwe jwa ditedu, a ba kgaola diaparo fa gare go fitlha maragong, a be a ba naya tsela. ₅Ya re Dafita a begelwa jalo, a roma go ba kgatlhantsha – gonne banna bao ba ne ba tlhabisitswe ditlhong thata – Kgosi ya re: “Nnang kwa Jerigo go ya ditedu tsa lona di be di gole; morago ga moo lo boe.”

₆E rile Baamone ba bona gore re “itlhoisitse Dafita”, ba roma, ba rapa Basiria ba Bethe-Rehobe le Basiria ba Soba, banna ba dinao ba le 20 000, le kgosi ya Maaga, e na le banna ba le sekete le banna ba Tobe ba le 12 000. ₇Ya re Dafita a utlwa jalo, a roma Joabe le mephato yotlhe ya bagale. ₈Jaanong Baamone ba bolola, ba ikemisa ka thulaganyo ya tlhabano ka fa ntle ga kgoro; mme Basiria ba Soba le ba Rehobe le banna ba Tobe le Maaga ba le go sele kwa nageng.

₉Jaanong ya re Joabe a lemoga gore ntwa e mo potile kwa pele le kwa morago, a tlhopha banna mo mephatong yotlhe ya Iseraele, a ba rulaganya go kgatlhantsha Basiria. ₁₀Mme banna ba ba setseng a ba neela mo taolong ya ga Abisai morwa-rraagwe, a ba rulaganya gore ba kgatlhantshe Baamone, ₁₁a laela a re: “Fa Basiria ba mphekeetsa, o tle o nthuse; mme fa Baamone ba go fekeetsa, ke tla tla go go thusa. ₁₂Nna pelokgale, a re itshupe re le bagale ka ntlha ya morafe wa rona le ka ntlha ya metse ya Modimo wa rona! A Morena a dire tse di siameng mo matlhong a gagwe.”

₁₃Jaanong ya re Joabe a atamela le banna ba ba nang nae go ya go tlhabana le Basiria, ba tshaba fa pele ga gagwe. ₁₄Mme ya re Baamone ba bona Basiria ba tshaba, le bone ba tshaba fa pele ga Abisai, ba tsena mo motseng. Ke fa Joabe a boa a tlogela Baamone, a goroga kwa Jerusalema.

₁₅Ya re Basiria ba bona, fa ba fentswe ke Baiseraele, ba phuthega gape. ₁₆Mme Hatatesere a roma a ntsha Basiria ba ba kwa moseja ga noka, ba tla kwa Helame ba etelelwa pele ke Sobage molaodi wa mephato ya ga Hatatesere. ₁₇Ya re Dafita a bolelelwa jalo, a phutha Baiseraele botlhe, a tshela Joretane, a fitlha kwa Helame. Ke fa Basiria ba ikemisa ka thulaganyo, ba kgatlhantsha Dafita, ba tlhabana nae. ₁₈Mme Basiria ba tshaba fa pele ga Baiseraele, mme Dafita a bolaya banna ba dikoloi di le 700 tsa Basiria le bapalami ba dipitse ba le 40 000; a khutla le Sobage molaodi wa mephato ya bone, mo a bileng a swela teng. ₁₉Jaanong ya re dikgosi tsotlhe tse e neng e le batlhanka ba ga Hatatesere di bona fa di fentswe ke Baiseraele, tsa dira kagiso le Baiseraele, tsa ba direla. Mme Basiria ba boifa go thusa Baamone gape.