BARUKU 4

₁Ke jone e leng Lokwalo lwa Melao ya Modimo lo lo nnetseng ruri. Botlhe ba ba bo tlamparelang ba tla tshela. Botlhe ba ba bo hularelang ba tla šwa.

₂Boa, Jakobe, O bo phamole, O tsamaye mo phatsimong ya jone go ya kwa leseding.

₃O se ka wa neela ope tlotlo ya gago, O se ka wa neela batho ba sele tlotla ya gago.

₄Kana re sego jang, Iseraele, ka jaanong re itse se se itumedisang Modimo!

₅Nametsegang, lona batho ba ga etsho, lona ba lo neilweng leina je le tlotlegang ja ga Iseraele.

₆Lo ne lwa rekisediwa ditšhaba, fela e se gore lo nyelelele ruri. Lo ne lwa neelwa baba ba lona, ka lo ne lo galefisitse Modimo, ₇gonne lo ne lo galefisitse Mmopi wa lona, ka lo ne lwa isetsa bademone ditlhabelo, e seng Modimo.

₈Lo ne lwa itebatsa Modimo o o nnelang ruri o o neng o lo tlamela, lwa utlwisa Jerusalema botlhoko, one motse o o neng o lo godisitse, ₉gonne e rile o bona bogale bo lo wela godimo bo tšwa kwa Modimong, wa re: “Reetsang, lona bakaulengwe ba Sione, Modimo o nthomeletse khutsafalo e kgolo. ₁₀Ke bonye bomorwaake le bomorwadiake ba tsewa e le magolegwa, selo se e le kwatlhao e ba otlhaiwang ka yone ke o o nnelang ruri. ₁₁Ke ne ke ba godisitse ka boitumelo; mme ka dikeledi le khutsafalo ka ba bona ba tsamaya. ₁₂Go se ka ga nna le ope wa lona yo o nteletsang mogolokwane, nna motlholagadi, yo o tlhokomologilweng ke ba le bantsi go le kana. Ke bolawa ke bodutu ka ntlha ya dibe tsa bana ba me, ba ba neng ba hularela Molao wa Modimo, ₁₃ba ba neng ba sa batle go itse ditaelo tsa one, mme ba sa ikaelela go latela ditsela tsa ditaolo tsa one, kgotsa go gata mo mebileng ya tsamaiso e ntle e tshiamo ya one e neng e e kaya. ₁₄A ba tle kwano, bakaulengwe bao, ba Sione. Mmang ke lo gakolole bogolegwa jwa bomorwaake le bomorwadiake jo ba neng ba otlhaiwa ka jone ke o o nnelang ruri! ₁₅Jaaka o ne wa ba romelela setšhaba se se neng se le kgakala gore se ba tlhasele, batho ba ba setlhogo ba ba buang puo e sele, ba sa tlotle batsofe, le fa e le go tlhomogela ngwana pelo. ₁₆Ba ne ba sia ka bomorwa motlholagadi ba ba rategang, ba mo tlogela a le esiesi, a amogilwe bomorwadie. ₁₇Fa e le nna tota nka lo thusa jang? ₁₈O o lo digetseng bomadimabe jo bontsi joo ke one o o ka lo namolang mo diatleng tsa baba ba lona. ₁₉Tsamayang, bongwanaka, tlogang fa! Ke tšhwanetse go nna mo botlholagading jo le mo bodutung jo. ₂₀Ke apotse diaparo tsa nako ya kagiso, ka apara letsela le le magwata la kopo; ke tlaa ne ke sale ke ntse ke tlhaeletsa o o nnelang ruri. ₂₁Nametsegang, bongwanaka, lo nneng lo bitse Modimo; O tlaa lo namola mo kgatelelong, mo diatleng tsa baba ba lona; ₂₂gonne nna ke lebeletse gore o o nnelang ruri ke one o o tlaa lo namolang, Yo o intumedisitseng ke one o o Boitshepo, ka ntlha ya boutlwelo-botlhoko jo bo tlaa tlogang bo tla mo go lona, bo tšwa mo Mmoloking wa lona, ebong o o nnelang ruri. ₂₃Ka kutlobotlhoko le dikeledi ke ne ka lo bona lo tsamaya, fela Modimo o tlaa lo mpusetsa mme ke tlaa itumela ke ipele ka bosafeleng. ₂₄Jaaka bakaulengwe ba Sione ba bona kgolego ya lona jaana, ba tlaa tloga ba bo ba bona lo gololwa ke Modimo, o o tlaa tsereganyang, ka kgalalelo e kgolo le phatsimo ya o o nnelang ruri. ₂₅Bongwanaka, itshokeleng bogale jo Modimo o lo galefetseng ka jone. Mmaba wa lona o lo bogisitse, fela lo tlaa tloga lo bona tshenyego ya gagwe, lo bo lo mmaya lonao mo molaleng. ₂₆Bongwanake ba ba rategang ba tsamaile ka ditsela tse di makukunopu, ba kgweediwa jaaka letsomane ke segagapa sa mmaba. ₂₇Lo nametsegeng, bongwanaka, lo nneng lo bitse Modimo; One o o lo digetseng bomadimabe o tlaa lo gakologelwa. ₂₈Jaaka lo ne lwa lelerela kgakala le Modimo ka go rata ga lona, jaanong boang, lo o batle ka tlhwaafalo e e menaganyeng gasome; ₂₉gonne jaaka o ne wa lo digela bomadimabe jo bontsi joo, o tlaa boa gape o lo namola o bo o lo naya boitumelo jo bo sa feleng.”

₃₀Nametsega, Jerusalema: One o o go neileng leina o tlaa go gomotsa.

₃₁Matšhwenyego a tlaa wela botlhe ba ba neng ba go tšhwara mašwe, mme ba itumela ka go wa ga gago.

₃₂Matšhwenyego a tlaa wela metse e bana ba gago ba neng ba le magolegwa mo go yone; matšhwenyego a tlaa wela motse o o neng wa amogela bomorwao, ₃₃gonne fela jaaka o ne wa leletsa go wa ga gago mogolokwane, mme wa itumelela go bona O tlotlafadiwa, o tla bo o hutsafalela tshenyego ya one fela jalo.

₃₄Ke tlaa o amoga boitumelo jo metse e e tletseng batho e itumelang ka jone, go ikgantsha ga one go tlaa fetoga khutsafalo, ₃₅molelo o o tšwang kwa go o o nnelang ruri o tlaa tuka mo go one malatsi a mantsi, mme bademone ba tlaa aga mo go one ka bosakhutleng.

₃₆Jerusalema, leba kwa botlhabatsatsi, O bone boitumelo jo bo tlang kwa go wena bo tšwa kwa Modimong.

₃₇Bona, bana ba O neng wa ba lebelela ba tsamaya ke bao ba etla ba boela gae; ba kgobokantšwe go tšwa botlhabatsatsi le bophirimatsatsi, ba boela gae ba laotšwe ke o o Boitshepo, ba itumelela kgalalelo ya Modimo.