BELE LE KGOGELA
Daniele le Baprista ba ga Bele
1E rile Kgosi Asetiagese a ikela kwa go borraagwemogolwagolwane, Seruse wa Peresia a tsaya ditilo tsa gagwe. 2Daniele ya bo e le letsogo la kgosi mme e mo tlotlile thata go feta ditsala tse dingwe tsotlhe tsa yone.
3Jaanong mo Babilone go ne go na le sesetwa sengwe se bidiwa Bele, se malatsi otlhe, se neng se fiwa dikgamelo di le 12 tsa bupi jo bo boletaleta, dinku di le 40 le dilekanyo di le 6 tsa veini. 4Kgosi le yone e ne e tsentse letsogo mo kobamelong e, mme e ne e tle e ye go obamela sesetwa se malatsi otlhe. Fela Daniele ene o ne a obamela Modimo wa gagwe.
5Ke fa kgosi e botsa Daniele e re, “Ke ka ntlha yang O sa obamele Bele?” Daniele ene a fetola a re, “Ga ke obamele disetwa tse di dirilweng ke mabogo a batho, ke obamela Modimo o o tshelang o o dirileng legodimo le lefatshe, o o laolang dibopiwa tsotlhe tse di tshelang.”
6Kgosi e bo e re, “A jaanong O dumela gore Bele ga se modimo o o tshelang? A ga O bone gore o ja a bo a nwa go le kana kang malatsi otlhe?”
7Daniele a tshega. A re, “Kgosi ya me, O se ka wa tsiediwa; gonne ke mmopa mo teng mme ka kwa ntle ke kgotlho fela. Le gone ga a ise a ke a je kgotsa a nwe sepe.”
8Selo se sa galefisa kgosi, mme ya bitsa baprista ba yone, ya ba raya ya re, “A ko lo mpoleleleng gore tota ke mang yo o jang dijo tse tsotlhe; fa lo sa mpolelele lo tlile go šwa. Ntshupetsang gore Bele o tota a di ja, mme ke tlaa laela gore Daniele a bolaelwe go mo tlotlolola.” 9Ke fa Daniele a raya kgosi a re, “A go nne jaaka O buile.”
10Jaanong baprista ba ba ne ba le 70, basadi ba bone le bana ba bone go sa buiwe! Kgosi ya ya le Daniele kwa Tempeleng ya ga Bele. 11Baprista ba ga Bele ba bo ba mo raya ba re, “Jaaka le wena O ka iponela, re a tsamaya jaanong, mme re tla go tlogela fa, kgosi, gore O sale O tshola dijo, O baakanya veini, O bo O di tlogela fa. Fa e ka re O boa ka moso mo mosong, wa se ka wa fitlhela Bele a jele sengwe le sengwe, O bo O laele gore re bolaiwe; fa go sa nna jalo, go bolaiwe Daniele, moakedinyana yo.” 12Ba ne ba sa boife sepe, gonne ba ne ba na le kgoro ya sephiri e ba neng ba e dirile ka fa tlase ga tafole, e ba neng ba tlhola ba tsena ka yone go ya go tsaya dineo tse.
13E rile baprista ba sena go tsamaya mme kgosi e tsholetse Bele dijo, 14Daniele a laela batlhanka ba gagwe gore ba tsise melora mme a e tshela gongwe le gongwe mo bodilong jwa tempele, go sa bone ope, fa e se kgosi fela. Ke fa ba tšwa mo tlung eo, ba tšwala kgoro, ba bo ba e kana ka sekano sa kgosi, ba itsamaela.
15Bosigong joo, jaaka gale, baprista ba tla le basadi ba bone le bana, ba ja ba nwa sengwe le sengwe.
16Ya re ka moso kgosi ya ne e sale e tsoga phakela; Daniele le ene! 17Kgosi ya bo e re, “Daniele, a dikano di sa ntse di itekanetse?” Ene a araba a re, “Ee, kgosi, di sa ntse di itekanetse.”
18Kgosi ya bo e bula kgoro mme ya re e latlhela bofofu mo tafoleng, ya goa ya re, “O mogolo, wena Bele, mme ga go na boferefere bope mo go wena!”
19Fela Daniele ene a tshega. A emisa kgosi gore e se ka ya tsenelela kwa teng, mme a re, “Leba bodilo, O keleke dikgato tse.”
20Ke fa kgosi e re, “Ke bona dikgato tsa dinao tsa banna, basadi le bana.” 21Mme ka kgalefo ya laela gore baprista ba tšhwarwe, mmogo le basadi ba bone le bana. Ba bo ba mmontsha kgoro ya sephiri e ba neng ba tle ba tsene ka yone, ba tseye se se neng se le mo godimo ga tafole. 22Kgosi ya laela gore ba bolawe; Bele ene a neelwe Daniele yo o neng a senya sesetwa se le tempele ya sone.
Daniele O Bolaya Kgogela
23Go ne go na le kgogela nngwe e kgolo kwa Babilone, mme le yone e ne e obamelwa. 24Kgosi e ne ya raya Daniele ya re, “Jaanong ga O kake wa nthaya wa re se ga se fete kgotlho! Bona, se a tshela; se a ja, se a nwa; ga O kake wa ganela wa re ga se modimo o o tshelang; O obamele, he!”
25Daniele a fetola a re, “Ke obamela Morena Modimo wa me; ke one Modimo o o tshelang. Fa O ka ntetlelela fela, ke tla bolaya noga e, ke sa dirise le fa e le lerumo kgotsa molamu.” 26Kgosi e be e re, “Ke a go letlelela.”
27Ke fa Daniele a tsaya tere, mafura le moriri, a di bedisa, a bo a di dira dikgolokwe-kgolokwe, a di jesa kgogela; kgogela ya di metsa mme ya phatlogana ka legare. Daniele a bo a re, “Jaanong a ko O bone selo se O se obamelang!”
28Bababilonia ba galefa thata fa ba utlwa kaga selo se, mme ba simolola go loga maano kgatlhanong le kgosi. Ba re, “Kgosi e dule Mojuta, o dumeletse gore Bele a digwe, kgogela e bolaiwe, baprista le bone a laela gore ba bolaiwe.” 29Jalo he, ba ya kwa kgosing ba re, “Re neele Daniele, e seng jalo re tlaa go bolaya, mmogo le ba ntlo ya gago.”
30Ba gatelela kgosi thata mo e leng gore e ne ya iphitlhela e patelesega go ba neela Daniele.
Daniele o mo Mongobong wa Ditau
31Ba latlhela Daniele mo mongobong wa ditau, mme a nna teng malatsi a le 6. 32Mo mongobong moo ga bo go na le ditau tse di supang, tse di neng di atle di fiwe ditoto tse pedi tsa batho le dinku di le pedi malatsi otlhe; fela ka nako e tsa se ka tsa newa sepe, gore di tle di kometse Daniele.
33Jaanong moprofeta Habakuku o ne a le kwa Juta. O ne a apeile legodu mme a kgabetleletse borotho mo mogopong, a isetsa barobi kwa tshimong. 34Moengele wa Morena a bo a mo raya a re, “Tsaya dijo tse O di tshotseng tseo mme O di ise kwa Babilone, O fete O di fe Daniele mo mongobong wa ditau.”
35Habakuku a fetola a re, “Morena, ga ke ise ke ke ke bone Babilone, le gone ga ke itse sepe ka mongobo o.”
36Moengele wa Morena a bo a mo phamola ka tlhogo, a mo tsholetsa ka moriri a mo isa kwa Babilone. Koo, ka ponyo ya leitlho, a baya Habakuku fela fa godimo ga mongobo. 37Habakuku a goa a re, “Daniele, Daniele, tsaya dijo ke tse O di romeletšwe ke Modimo.”
38Mme Daniele a re, “Oh Modimo, O nnile wa nkgakologelwa, ga O a ka wa hularela ba ba go ratang.” 39A ema a ja dijo, fa moengele wa Modimo ene a ne a se ka a bo a diega go busetsa Habakuku kwa ga gabo.
40Ka letsatsi la bosupa kgosi ya tla, e tsile go lelela Daniele. Fa e fitlha fa mongobong, Daniele a bo a ituletse fa fatshe, a sa tšhwenngwa ke sepe. 41A goa a re, “O mogolo, oh Morena, Modimo wa ga Daniele, ga go na modimo ope fa e se wena!” 42Ke fa a ntsha Daniele mo mongobong wa ditau, a latlhela batho ba ba neng ba lekile go mmolaya. Mme ka bonakonako ba komediwa a ntse a ba lebile.
