DANIELE 2

₁Ka ngwaga wa bobedi wa puso ya ga Nebukatenesare, Nebukatenesare a lora ditoro; ke fa mowa wa gagwe o tshoga, o tlhofaela. ₂Kgosi ya laela gore go bidiwe batlhalefi le baitseanape le dingaka le Bakalatea gore ba itsise kgosi ditoro tsa yona. Ba tla, ba ema fa pele ga kgosi. ₃Kgosi ya ba raya ya re: “Ke lorile toro. Jaanong mowa wa me o a tshwenyega. Ke rata go tlhaloganya toro eo.”

₄Bakalatea ba raya kgosi ka Sesiria ba re: “A kgosi e phele ka bosakhutleng! Bolelela batlhanka ba gago toro gore re bolele tlhaloso ya yona.”

₅Kgosi ya fetola Bakalatea ya re: “Lefoko la me ga le fetoge. Fa lo sa nkitsise toro le tlhaloso ya yona, lo tla remaganngwa; matlo a lona e tla fetolwa mekoa ya matlakala. ₆Mme fa lo ka bolela toro le tlhaloso ya yona, lo tla amogela dimpho le dineo le tlotlo e kgolo mo go nna. Ka moo mpoleleleng toro le tlhaloso ya yona.”

₇Ba araba gape ba re: “A kgosi e bolelele batlhanka ba yona toro; foo re tla bolela tlhaloso ya yona.”

₈Kgosi ya fetola ya re: “Jaanong ke lemoga sentle, fa lo batla fela go ikokeletsa sebaka; ka gonne lo lemogile, fa lefoko le tlhomame mo go nna le le reng: ₉Fa lo palelwa ke go mpolelela toro, katlholo e le nngwe e tla lo wela. Kana lo utlwanye go bua mafoko a maaka a a sa siamang fa pele ga me go tsamaya sebaka se fetoge. Ka moo mpoleleleng toro! Foo ke tla itse, fa lo sa ka ke lwa palelwa ke go mpolelela tlhaloso ya yona.”

₁₀Bakalatea ba araba fa pele ga kgosi ba re: “Ga go na motho ope mo lefatsheng yo o ka kgonang go bolela se kgosi e se batlang. Ka gonne ga go na kgosi epe, le fa e le kgolo gongwe e le thata, e e kileng ya batla se se ntseng jalo mo motlhalefing mongwe gongwe mo ngakeng gongwe mo go Mokalatea. ₁₁Se kgosi e se batlang se thata. Ga go na ope yo o ka se bolelang fa pele ga kgosi fa e se medimo e boago jwa yona bo seng mo bathong.”

₁₂Ke fa kgosi e galefa, e gakala thata, e laola gore batlhalefi botlhe ba Babele ba bolawe. ₁₃Ya re taolo e sena go tswa gore batlhalefi ba bolawe, ba batla Daniele le balekane ba gagwe gore ba bolawe.

₁₄Ke fa Daniele a fetola Arioge, molaodi wa bafemedi ba kgosi, yo o bolotseng go bolaya batlhalefi ba Babele, ka botlhale le ka tlhaloganyo. ₁₅A simolola go bua, a botsa Arioge, molaodi wa bafemedi ba kgosi, a re: “Ke ka ntlhaang, fa katlholo ya kgosi e le bogale thata?” Arioge a bolelela Daniele mabaka a teng.

₁₆Foo Daniele a tsena mo ntlong ya borena, a kopa kgosi gore a fiwe sebaka gore a tle a itsise kgosi tlhaloso ya toro. ₁₇Daniele a ba a ya kwa ntlong ya gagwe, a itsise balekane ba gagwe, Hananya le Mišaele le Asaria, mafoko ao, ₁₈gore ba kope kutlwelo-botlhoko mo Modimong wa legodimo ka ntlha ya sephiri seo gore Daniele le balekane ba gagwe ba se ka ba bolawa mmogo le batlhalefi ba bangwe ba Babele. ₁₉Ke fa Daniele a senolelwa sephiri seo ka pono bosigo. Daniele a ba a boka Modimo wa legodimo ₂₀a re:

₂₄Ke fa Daniele a tsena kwa go Arioge yo o laetsweng ke kgosi go bolaya batlhalefi ba Babele; a ya a mo raya jaana a re: “Se bolae batlhalefi ba Babele! Nkise kwa kgosing, ke tla bolelela kgosi tlhaloso ya toro.”

₂₅Arioge a itlhaganela, a isa Daniele fa pele ga kgosi, a e raya jaana a re: “Ke bonye monna wa batshwarwi ba Juta yo o tla itsiseng kgosi tlhaloso ya toro.”

₂₆Kgosi ya simolola go bua, ya botsa Daniele yo leina la gagwe e leng Beletšhatsare ya re: “A o tla kgona go nkitsise toro e ke e bonyeng le tlhaloso ya yona?”

₂₇Daniele a simolola go bua fa pele ga kgosi a re: “Sephiri se kgosi e se batlang, batlhalefi le baitseanape le barutegi le balepi ba dinaledi ga ba kgone go se bolelela kgosi. ₂₈Mme go na le Modimo kwa legodimong o o senolang diphiri; o itsisitse kgosi Nebukatenesare se se tla dirafalang ka malatsi a bofelo. Toro ya gago le dipono tsa tlhogo ya gago mo bolaong jwa gago ke tse:

₂₉“Wena kgosi o ne o akanya o le mo bolaong jwa gago gore go tla dirafala eng mo metlheng e e tlang? Jaanong ona o o senolang diphiri o go itsisitse se se tla dirafalang. ₃₀Mme nna ke senoletswe seo, e seng ka ntlha ya botlhale jo ke fetang botlhe ba ba phelang ka jona, mme e le gore kgosi e begelwe tlhaloso ya toro, o tle o itse dikakanyo tsa pelo ya gago.

₃₁“Wena kgosi o bonye setshwantsho sa motho; setshwantsho seo se ne se le segolo thata, phatsimo ya sona e feta tsotlhe; se ne se eme fa pele ga gago, tebego ya sona e le e e boitshegang. ₃₂Setshwantsho seo tlhogo ya sona e ne e le ya gouta e e sa pekwang; sehuba sa sona le mabogo a sona e le tsa selefera; mpa ya sona le dirope tsa sona e le tsa kgotlho. ₃₃Memomo ya sona e le ya tshipi; dinao tsa sona ntlhanngwe e le tshipi, ntlhanngwe e le mmopa. ₃₄Ya re o ntse o se lebile, lefika la kgomoga mo thabeng e se ka diatla tsa motho, la itaya setshwantsho seo mo dinaong tse e leng tshipi le mmopa, la di phatlakanya. ₃₅Tshipi le mmopa le kgotlho le selefera le gouta tsa phatlakanngwa mmogo, tsa nna jaaka moko mo diboaneng tsa mariga; phefo ya di tlosa, ga se ka ga tlhola go bonwa motlhala ope wa tsona, mme lefika le le iteileng setshwantsho seo la fetoga thaba e kgolo, la tlala lefatshe lotlhe.

₃₆“Ke yona toro. Jaanong re tla bolela tlhaloso ya yona fa pele ga kgosi. ₃₇Wena kgosi o kgosi ya dikgosi, yo Modimo wa legodimo o go neileng bogosi le nonofo le thata le tlotlo, ₃₈yo o tsentseng batho le diphologolo tsa naga le dinonyane tsa loapi mo thateng ya gago gotlhe fa go nnwang teng, wa go laodisa tsotlhe: Ke wena tlhogo ya gouta. ₃₉Sehularong sa gago go tla tsoga bogosi jo bongwe jo bo fetwang ke jwa gago; morago ga moo bogosi jwa boraro jo e leng jwa kgotlho, jo bo tla busang lefatshe lotlhe. ₄₀Bogosi jwa bone bo tla nna popota jaaka tshipi; kana tshipi e pšhwetlakanya tsotlhe, e di thubaganye; bo tla pšhwetlakanya otlhe ao jalo, bo a phatlakanya jaaka tshipi e e phatlakanyang. ₄₁Jaanong fa o bonye dinao le menwana ya tsona e le mmopa wa mmopi mo ntlheng nngwe le tshipi mo ntlheng e nngwe ke go re: E tla nna bogosi jo bo kgaogantsweng, mme thata ya tshipi e tla nna teng mo go jona, jaaka o bonye tshipi e tlhakantswe le mmopa. ₄₂Fa menwana ya dinao e le tshipi mo gongwe le mmopa mo gongwe, ke go re: Bogosi joo bo tla nna thata mo gongwe, bo tla foforega mo gongwe. ₄₃Jaanong fa o bonye tshipi e tlhakantswe le mmopa, ke go re: Le fa ba tla tlhakana ka go nyalana ga batho, ga ba nke ba kgomarelana jaaka tshipi e sa tlhakane le mmopa. ₄₄Mme e tla re ka malatsi a dikgosi tseo, Modimo wa legodimo o tlhome bogosi jo bo sa nyeleleng ka bosakhutleng. Bogosi joo ga bo nke bo amogwa ke morafe o mongwe. Bo tla pšhwetlakanya, bo fedisa magosi aotlhe ao, mme jona bo tla tlhomama ka bosakhutleng, ₄₅fela jaaka o bonye lefika le kgomolwa mo thabeng, e se ka diatla, le pšhwetlakanya tshipi le kgotlho le mmopa le selefera le gouta. Modimo o mogolo o itsisitse kgosi jalo se se tla dirafalang mo metlheng e e tlang. Toro ke ya nnete; tlhaloso ya yona e a ikanyega.”

₄₆Ke fa kgosi Nebukatenesare a wela fa fatshe ka sefatlhego, a obamela Daniele; a laola gore a direlwe ditshupelo tsa dijo le maswalo. ₄₇Kgosi ya fetola Daniele ya re: “Ka nnete, Modimo wa lona ke Modimo wa medimo le Morena wa dikgosi yo o senolang diphiri; gonne wena o kgonne go senola sephiri seo.” ₄₈Mme kgosi ya godisa Daniele, ya mo naya dineo tse dintsi tse dikgolo, ya mo laodisa naga yotlhe ya Babele; a nna mookamedi yo mogolo wa batlhalefi botlhe ba Babele. ₄₉Mme ka kopo ya ga Daniele kgosi ya neela Šaterage le Mešage le Abetenego puso ya naga ya Babele; Daniele ene a nna mo ntlong ya kgosi.