Taelo ya gore Bajuta ba Nyelediwe
1Mafoko a lokwalo a ne a tsamaya jaana: “Kgosi e Kgolo Ahasewerose o kwalela balaodi ba dikgaolo tse di 127 tse di ikadileng go tswa India go ya Ethiopia, le magosana a a ka fa tlase ga bone, a re, 2ke beilwe mo pusong ya ditšhaba tse dintsi ke bile ke busa lefatshe lotlhe, ke ikaeletse gore ke se ka ka bo ka gogomosiwa ka motlha ope ke tlhapedi ya thata, ke mpe ke buse ka tlhaloganyo e e sedi, ka makgwafo a a wetseng le ka bopelonolo, gore batho ba me ba tle ba tshele ba ritibetse ka gale, go se na mekubukubu mo gare ga bone. Ke ikaeletse gape go tlhabolola puso ya me, go dira gore gongwe le gongwe go tsamaiwe ka kgololesego, go tlisa kagiso e e elediwang ke batho botlhe. 3E rile le rerisana le bagakolodi ba rona gore maikaelelo a, a ka diragadiwa jang, ra bolelelwa ke mongwe wa bone, yo o fetang botlhe ka botlhale jwa go bona dilo sentle, yo gale a itshupang ka tlhwaafalo ya gagwe e e sa reketleng le ka boikanyego jwa gagwe jo bo popota, yo o fetwang ke rona fela ka botlotlegi, ina la gagwe e le Hamane, 4gore go na le bathonyana bangwe ba ba sa siamang ba ba tlhakatlhakanyeng le merafe yotlhe ya lefatshe, ba ba fapaanang le ditšhaba tse dingwe ka melaonyana ya bone, le gone ba nnetseng go itlhokomolosa ditaolo tsa magosi, mo e leng gore kitlano e e siameng ya puso e rona re reng re ikaeletse go e dira ga e ka ke ya bo ya diragala.
5“Re utlwa fa bathonyana ba, nako yotlhe, ba le kgatlhanong le batho ba bangwe botlhe, fa ba na le mokgwanyana mongwe wa go tshela o o sa tlwaelesegang, le melaonyana e e duleng mo tseleng, le gone ba tlhoile mmuso wa rona, ba dira bosula jotlhe gore puso ya rona e se ka ya bo ya nna le tlhomamo e e tsepameng.
6“Jalo he, re laela gore batho botlhe ba lo ba umaketšweng ke Hamane mo dikwalong tse a di lo kwaletseng, ene yo e leng motlhokomedi wa ditiragalo tsa mmuso, yo e bileng e le rraarona wa bobedi, ba felelediwe ka lerumo la baba, kwa ntle ga go ba tlhomogela pelo kgotsa go ba utlwela botlhoko, mo kgweding ya 12 e e bidiwang Adara, e tlhola malatsi a le 14, ya yone ngwaga e, 7gore dilalomenyana tseo, tse di sa bolong go nna teng le tse di sa ntseng di le teng e re di sena go goromelediwa mo Bobipong ka letsatsi le lengwefela mmuso wa rona o tle o sale o itumelela tidimalo e e sa feleng le kagiso e e nnelang ruri.”
Thapelo ya ga Moredekai
8Ke fa e re Moredekai a gakologelwa ditiro tse di gakgamatsang tsa Morena a mo rapela jaana:
9“Morena, Morena, Kgosi le Mong wa dilo tsotlhe, sengwe le sengwe
se mo thateng ya gago, mme ga go na ope yo o ka go emang pele fa O batla go boloka Iseraele.
10Ee, ke wena O dirileng legodimo le lefatshe, le sengwe le sengwe se se gakgamatsang se se ka fa tlase ga legodimo.
11Ke wena Morena wa dilo tsotlhe,
mme ga go na ope yo o ka go ganang, Morena.
12O itse dilo tsotlhe;
O a itse, Morena, O a itse
fa e se makgakga ape, boikgogomoso bope,
boikgodiso bope jo bo dirileng gore ke gane go obamela
moikgantshinyana yo go tweng Hamane yo.
13Ke ka bo ke ntse ke atlile dinao tsa gagwe
gore ke boloke Iseraele.
14Fela se ke se dirileng, ke se dirile gore ke se ka ka tloga ka baya tlotlo ya motho
kwa godimo ga tlotlo ya Modimo:
le gone ga nkitla ke obamela ope fa e se wena, Morena;
mme e tlaa re ke gana jaana ga nkitla ke gana ka boikgantsho.
15Jaanong, oh, Morena Modimo, Kgosi, Modimo wa ga Abrahama,
a O ko O rekegele batho ba gago!
Gonne batho ba batla go re nyeletsa
mme ba loga maano a go feleletsa bošwa jwa gago jo bo sa bolong go nna teng.
16O se ka wa bo wa tlhokomologa bošwa jwa gago,
jo O neng wa bo intshetsa mo
lefatsheng la Egepeto.
17O ko O utlwe thapelo ya me,
O utlwele bošwa jwa gago botlhoko,
mme O fetole khutsafalo ya rona boitumelo,
gore mo botshelong jwa rona re
nne re opelele leina la gago pako, Morena.”
18Mme batho botlhe ba Iseraele ba goa ka thata ya bone yotlhe, ka ba ne ba lebaganye le loso.
