ESERA 6

₁Ke fa Dario kgosi a laela gore ba batle mo matlong a dikwalo kwa ba neng ba beela mahumo teng kwa Babele. ₂Mme mo motseng o o femetsweng wa Agemetha o o kwa nageng ya Media ga bonwa lokwalo lo go kwadilweng jaana mo go lone ga twe: “Mafoko a lekgotla: ₃Ka ngwaga wa ntlha wa puso ya ga Korese kgosi Korese a laela gore Ntlo ya Modimo e agiwe kwa Jerusalema, go nna felo fa ba dirang ditlhabelo teng. A metheo ya yona e theiwe. Bogodimo jwa yona e nne mabogo a le 60, le bophara jwa yona e nne mabogo a le 60. ₄A go nne mela ya mafika a magolo e le meraro le mola o le mongwe wa mesipuri. Mme madi a ditshenyegelo tsa teng a ntshiwe mo letloleng la kgosi. ₅Le dilwana tsa gouta le selefera tsa Ntlo ya Modimo tse Nebukatenesare o neng a di ntsha mo Ntlong eo kwa Jerusalema a di isa kwa Babele, a di busiwe, di isiwe gape kwa Ntlong ya Modimo e e kwa Jerusalema felong ga tsona, o fete o di bee mo go yona.”

₆Ka moo kgosi Dario a laela ka lokwalo a re: “Jaanong he, lona Thathenai molaodi wa naga ntlheng ya bophirimatsatsi ya noka ya Ferathe le Sethare-Bosenai le balekane ba lona, e bong Baperesia ba ba ntlheng ya bophirimatsatsi ya noka ya Ferathe, tlogelang tseo. ₇Fa e le kago ya Ntlo ya Modimo eo, lo lese molaodi wa Bajuta le bagolo ba Bajuta gore ba e age mo felong ga yona. ₈Ke bile ke laetse tse lo tshwanetseng go di direla bagolo ba Bajuta bale gore ba itse go aga Ntlo ya Modimo eo: Ditshenyegelo tsa teng di ntshiwe mo dikhumong tsa kgosi tsa lekgetho la ntlheng ya bophirimatsatsi ya noka ya Ferathe ka bonako, di neelwe banna bale kwa ntle ga tiego. ₉Mme tse di batlegang, e bong dipoana le diphelehu le dikwana tsa ditlhabelo tsa phiso tsa Modimo wa legodimo gongwe mabele le letswai le weine le lookwane gongwe eng, a ba di neelwe ka fa taelong ya baperesiti ba ba kwa Jerusalema ka letsatsi lengwe le lengwe go se ka ga tlhaela sepe ₁₀gore ba nne ba isetse Modimo wa legodimo ditshupelo tsa maswalo, ba be ba rapelele botshelo jwa kgosi le jwa bomorwaa-yona. ₁₁Gape ke beile molao wa go re motho mongwe le mongwe yo o nyatsang taelo e, a go somolwe pinagare mo ntlong ya gagwe, e be e tlhongwe mme ene a pegwe mo go yona, mme ntlo ya gagwe e dirwe thotobolo ka ntlha ya gona moo. ₁₂Mme Modimo o o beileng leina la ona teng a o dige kgosi nngwe le nngwe le morafe mongwe le mongwe ba ba ka ntshang mabogo go fetola moo le go senya Ntlo eo ya Modimo e e kwa Jerusalema. Ke nna Dario ke laetseng jalo! A go dirwe jalo ka tlhokomelo, go se fosege sepe.”

₁₃Ke fa Thathenai molaodi wa naga ntlheng ya bophirimatsatsi ya noka ya Ferathe le Sethare-Bosenai le balekane ba bone ba dira jalo ka tlhoafalo, fela jaaka kgosi Dario a ba laetse ka lokwalo. ₁₄Mme bagolo ba Bajuta ba aga, ba tswelela pele sentle mo tirong ka polelelopele ya baporofeti Hakai le Sagaria morwa Ito; ba aga ba fetsa ka taelo ya Modimo wa Iseraele le ka taelo ya ga Korese le Dario le Arethašasetha dikgosi tsa Peresia. ₁₅Mme Ntlo ya Modimo ya fediwa ka letsatsi la boraro la kgwedi ya Atare ka ngwaga wa borataro wa puso ya kgosi Dario.

₁₆Ke fa Baiseraele, e bong baperesiti le Balefi le ba bangwe ba ba tswang kwa botshwarong ba dira moletlo wa kgakolo ya Ntlo ya Modimo ka boitumelo. ₁₇Ka kgakolo ya Ntlo ya Modimo ba dira ditlhabelo tsa dipoo di le 100 le diphelehu di le 200 le dikwana di le 400 le ditlhabelo tsa boleo tsa diphoko di le 12, ka ntlha ya Baiseraele botlhe ka fa palong ya ditso tsa bone. ₁₈Le gona ba tlhoma baperesiti ka fa ditlhopheng tsa bone le Balefi ka fa masomong a bone gore ba direle Modimo kwa Jerusalema ka fa molaong wa lokwalo lwa ga Moše.

₁₉Ba ba tswang kwa botshwarong ba bile ba dira moletlo wa Tlolaganyo ka kgwedi ya ntlha e le 14. ₂₀Gonne baperesiti le Balefi ba ne ba iitshekisitse mmogo, ba le phepa botlhe. Balefi ba tlhabela botlhe ba ba tswang botshwarong dikwana tsa Tlolaganyo, le baperesiti ba ga bone le go di itlhabela. ₂₁Baiseraele ba ba neng ba boile kwa botshwarong ba ja Tlolaganyo mmogo le botlhe ba ba itomologantseng le boitshekologo jwa baheitane ba lefatshe le go tlotla Morena, Modimo wa Iseraele, nabo. ₂₂Ba be ba dira Moletlo wa Dinkgwe tse di sa bedisiwang malatsi a supa ka boitumelo; gonne Morena o ne a ba itumedisitse, a sokololetse pelo ya kgosi ya Asiria kwa go bone go tiisa mabogo a bone mo tirong ya Ntlo ya Modimo, Modimo wa Iseraele.