BAATLHODI 21

₁Banna ba Iseraele ba ne ba ikanne kwa Mitsepha ba re: “Go se ka ga nna ope mo go rona yo o nayang Mobenyamene morwadie go nna mosadi.” ₂Jaanong ya re batho ba sena go fitlha kwa Bethele, ba nna teng go fitlha mantsiboa fa pele ga Modimo, ba tsholetsa mantswe, ba lela selelo se segolo, ₃ba re: “Morena Modimo wa Iseraele, ke ka ntlha ya eng, fa selo se, se dirafetse mo Iseraeleng; fa kajeno go tlhokafala lotso longwe lwa Iseraele?”

₄Mme ya re kamoso batho ba phakela, ba aga aletare teng, ba dira ditlhabelo tsa phiso le tsa tebogo. ₅Jaanong Baiseraele ba botsa ba re: “Ke mang mo ditsong tsotlhe tsa Iseraele yo o se kang a tla mo pitsong kwa Moreneng?” Gonne go ne go dirilwe maikano a magolo a gore, yo o sa tleng kwa Moreneng kwa Mitsepha, ruri o tla bolawa. ₆Kana Baiseraele ba ne ba tlhomogela Babenyamene bomorwa-rraabo pelo ba re: “Kajeno go kgaotswe lotso longwe mo Iseraeleng. ₇Jaanong ba ba setseng re ka ba direla jang gore ba bone basadi? Gonne rona re ikanne ka Morena ra re: ‘Ga re kitla re ba naya bomorwadia-rona go nna basadi.’ ”

₈Ba botsa ba re: “Ke mang mo ditsong tsa Iseraele yo o se kang a tla kwa Moreneng kwa Mitsepha?” Ba fitlhela gore ba kwa Jabese kwa Gileate ba ne ba sa tla pitsong mo bothibelelong. ₉Ke fa ba bala morafe ka maina, ba fitlhela go se na ope wa baagi ba Jabese kwa Gileate. ₁₀Jaanong phuthego ya roma banna ba le 12 000 ba batlhabani teng, ya ba laela ya re: “Yaang lo bolae baagi ba Jabese kwa Gileate ka bogale jwa tšhaka le basadi le bana. ₁₁Se lo tshwanetseng go se dira ke se: Banna botlhe le basadi botlhe ba ba kileng ba kopana le monna lo ba bolae. Mme makgarebe a a phepa lo a lese go phela.” Ba dira jalo. ₁₂Mo baaging ba Jabese kwa Gileate ba fitlhela basetsana ba makgarebe ba le 400 ba ba iseng ba itse monna; ba ba isa kwa bothibelelong kwa Silo yo o mo lefatsheng la Kanana.

₁₃Jaanong phuthego yotlhe ya roma, ya bua le Babenyamene ba ba neng ba le kwa lefikeng la Rimone, ya ba bolelela gore go kagiso. ₁₄Babenyamene ba ne ba boa jalo ka sebaka seo, ba newa basadi ba ba lesitsweng go phela mo basading ba Jabese kwa Gileate, mme ba se ka ba ba lekana.

₁₅Mme morafe wa tlhomogela Babenyamene pelo, ka Morena a ne a ntshitse ntho mo ditsong tsa Iseraele. ₁₆Bagolo ba phuthego ba botsa gape ba re: “Ba ba setseng re ka ba direla jang gore ba bone basadi? Gonne basadi ba Babenyamene ba fedisitswe.” ₁₇Gape ba re: “Babenyamene ba ba falotseng ba ka thusega jang gore lotso loo lo se ka lwa nyelediwa mo go Iseraele? ₁₈Rona re palelwa ke go ba naya basadi ba e leng bomorwadia-rona; gonne re le Baiseraele re ikanne ra re: ‘Go hutsitswe yo o nayang Mobenyamene morwadie go nna mosadi.’ ”

₁₉Jaanong ba re: “Bonang, ka ngwaga le ngwaga go na le moletlo wa Morena kwa Silo yo o mo ntlheng ya bokone ya Bethele, mo ntlheng ya botlhabatsatsi ya tsela e kgolo e e tswang kwa Bethele e ya kwa Šegeme mo ntlheng ya borwa ya Lebona.” ₂₀Mme ba laela Babenyamene ba re: “Yaang lo lalele mo masimong a meweine. ₂₁Mme e re fa lo bona bomorwadia Silo ba tswela kwa ntle go bina dipina, lo tswe mo masimong a meweine, mme mongwe le mongwe wa lona a ikgapele mosadi mo go bomorwadia Silo, lo ye ka bone kwa nageng ya Benyamene. ₂₂Mme e re fa borraabo gongwe bokgaitsadia-bone ba tla go lwa le lona, lo ba fetole lo re: ‘Re itshwareleng! Gonne ga re a bona basadi rotlhe ka ntwa. Kana ga se lona lo ba re neetseng. Gonne foo lo ka bo lo le molato.’ ”

₂₃Babenyamene ba dira jalo; ba tsaya ka fa palong ya bone, ba ba thopa mo go ba ba neng ba bina; ba tloga ba boela kwa nageng ya bone, ba aga metse, ba nna mo go yona. ₂₄Le Baiseraele ba itsamaela ka sebaka seo; mongwe le mongwe a ya kwa ga gabo kwa kabelong ya gagwe.

₂₅Ka sebaka seo go ne go se na kgosi mo Iseraeleng; mongwe le mongwe a dira tse di kgatlhang matlho a gagwe.