JUDITHE 1

₁E ne e le ngwago wa bo-12 wa ga Nebukatenesare yo o neng a busa Maasiria mo motseng o mogolo wa Ninefe. Arfakesade o ne a busa Mamede kwa Ekebatana ka nako eo. ₂O ne a agelela motse o ka dipota tse di bopetšweng ka maje a a rethefaditsweng a bokima jwa dikubiki di le 3 le boleele jwa dikubiki di le 6, a dira lorako lwa phemelo lwa bogodimo jwa dikubiki di le 70 le boatlhamo jwa dikubiki di le 50. ₃Fa dikgorong o ne a baya ditlhoa tsa bogodimo jwa dikubiki di le 100 mme mo metheong di le bophara jwa dikubiki di le 60, ₄dikgoro tsone di le bogodimo jwa dikubiki di le 70 le boatlhamo jwa dikubiki di le 40 go direla gore mephato ya gagwe e bo e ka feta e le seoposengwe, le masole a gagwe a a tsamayang ka dinao gore le one a bo a ka gwanta a bapile a sa kgorelediwe ke sepe.

₅Jaanong ka nako e Kgosi Nebukatenesare o ne a ya go tlhabana le Kgosi Arfakesade mo leboeng le legolo le le mo kgaolong ya Ragae. ₆Ba ba neng ba mo thusa e ne e le batho botlhe ba ba neng ba tšwa kwa dithoteng, botlhe ba ba neng ba tšwa kwa Eufaratese le Tikirise le Haedasepese, le ba ba neng ba tšwa kwa dipoeng ba ba neng ba busiwa ke Arioke, kgosi ya Maelima. Ka mokgwa oo ditšhaba di le dintsi di ne di ipopile go tsenya letsogo mo tlhabanong ya barwa ba ga Keleode.

₇Nabukadenesa kgosi ya Maasiria o ne a romela molaetsa kwa baaging botlhe ba Peresia, kwa baaging botlhe ba mafatshe a bophirimatsatsi, Silisia, Damaseko, Lebanone, Anti Lebanone, kwa go botlhe ba ba gaufi le lotshitshi lwa lewatle, ₈ba Galelea-Godimo, ba leboa le legolo la Esederaelone, ₉kwa banneng ba Samaria le ba metse e e mo dikologileng, kwa go ba ba neng ba le ka kwa ga Jorodane, go fitlhelela kwa Jerusalema, Bethani, Chelouse, Kadeše, noka ya Egepeto, Tapanese, Ramesese le kgaolo yotlhe ya Gošene, ₁₀le go feta Tanise, le Memfise, le kwa baaging botlhe ba Egepeto go fitlhelela kwa melelwaneng ya Ethiopia. ₁₁Fela baagi ba mafatshe a ba ne ba tlhokomologa boikuelo jwa ga Nabukadenesa, kgosi ya Maasiria, mme ba se ka ba ipopa go ya kwa go ene go dira ntwa. Ba ne ba sa mo tshabe, gonne ka mo ba neng ba bona ka teng e ne e kete o eme a le esi. Ke gone ka moo, ba neng ba busa baromiwa ba gagwe ba sa dira sepe e bile ba šwabile.

₁₂Nebukatenesare a galefela mafatshe a otlhe. A ikana ka setulo sa gagwe sa bogosi le ka puso ya gagwe gore o tla ipusolosetsa mo dikgaolong tsotlhe tsa Silisia, Damaseko le Siria, tsa Mamoabite le tsa Maammonite, tsa Juta le Egepeto go fitlhelela kwa mafelelong a mawatle a mabedi, le gore o tla di ripitla ka lerumo.

₁₃Mo ngwageng wa bo-17 ene le mephato ya gagwe ba ne ba ya go tlhabana le Arfakesade mme ya re mo tlhabanong e, ba mo fenya. O ne a ripitla setlhopha sotlhe sa batlhabani sa ga Arfakesade le setlhopha sa batlhabani ba ba pagameng dipitse le sa dikara; ₁₄a gapa metse ya gagwe a bo a tlhasela Ekebatana; a phamola ditlhoa tsa one motse o, a bo a nyeletsa mafelo a borekisetso a one, a fetola tlotlomalo ya one ya pele sekgobo fela. ₁₅Ya re morago a tšhwara Arfakesade mo dithabeng tsa Ragae mme a mo phunya ka marumo a gagwe, a mo nyeleletsa ruri. ₁₆Ke fa a boa ka morago, ene le mephato ya gagwe le botlhe ba ba neng ba thusanya nae: ebong lesomo le legolo la batlhabani. Ke fa e re ba thubile kobo segole jaana, ene le mophato wa gagwe wa batlhabani ba itatlhela mo tlhapeding ya moletlo malatsi a le 120.