JUDITHE 11

₁Holofernese a mo raya a re, “O nametshege, mosadi, O se ka wa boifa. Yo o itlhophetseng go direla Nebukatenesare, kgosi ya lefatshe lotlhe, ga ke ise ke ke ke mo utlwise botlhoko, ₂le jaanong jaana tota, fa setšhaba sa ga eno se se agileng mo dithotaneng se ka bo se se ka sa ntlhapatsa, ke ka bo ke se ka ka se tsholeletsa segai. O ke molato wa bone, ga se wa me. ₃Fela a ko O mpolelele, ke ka ntlha yang O siile, O ba tlogetse, O tsile kwa go rona? ... Le gale se se tlaa go boloka. Nametshega! O tlaa lala O tshedile, bosigong jono le mo go a mantsi go tloga jaanong le go tšwelela pele. ₄Ga go na ope yo tlaa bong a go utlwise botlhoko. Nnyaa tlhe, O tlaa tšhwarwa sentle fela jaaka botlhe ba tšhwarwa sentle ba ba direlang morena wa me Kgosi Nebukatenesare.”

₅Judithe a mo fetola a re, “A O ko O reetse sentle se mohula wa gago a batlang go se bua. O dumelele mohula wa gago go bua fa pele ga gago. Ga nkitla ke bua lentšwe lepe la maaka fa pele ga morena wa me bosigong jono. ₆Wena O latele kgakololo ya mohula wa gagwe fela mme Modimo o tlaa feleletsa tiro ya gago sentle; morena wa me ga a kitla a tlholega mo go se a batlang go se dira. ₇A Nebukatenesare, kgosi ya lefatshe lotlhe, ene yo o go rometseng gore O tle go laola ditshedi tsotlhe, a tshele ka boleele, a thata ya gagwe e nnele ruri! Gonne, ka ntlha ya gago, o direlwa e seng ke batho fela, mme ka pateletso ya gago le diphologolo tsa naga tota, dikgomo le dinonyane tsa loapi di tshelela go direla Nebukatenesare le Ntlo yotlhe ya gagwe. ₈Re utlwile tlhe ka botlhale jwa gago le matsetseleko a gago. Go a itsege, gongwe le gongwe mo lefatsheng gore mo pusong e, ga go na ope yo o lekanang nao ka nonofo, ka kitso e ntsi le botlhale mo go abeng ntwa. ₉Le gone re utlwile se Akiore, mo puong ya gagwe, a neng a se bolelela lekgotla la gago. E rile banna ba Bethulia ba sena go mo rekegela, a ba bolelela sengwe le sengwe se a lo se boleletseng. ₁₀Jaanong, morena wa me le mong wa me, lo se ka lwa tlhokomologa se a se buileng, lo nne lo se gakologelwe, gonne ke boammaaruri; setšhaba sa rona ga se kitla se otlhaiwa. lerumo ga le kitla le se fenya, fa e se fela se ka leofela Modimo wa sone. ₁₁Fela, jaaka dilo di eme, morena wa me ga a tlhoke go boifa gore o ka lelekwa kgotsa a kgoreletsega, gonne loso lo tlaa tloga lo se wela godimo, gonne sebe se a bo se se fentse, se galefisa Modimo wa sone fa se se dira. ₁₂Ka se se na dijo, metsi a sone le one a fela, se ikaeletse go bolaya dikgomo tsa sone, se batla go dirisa dilo tsotlhe tse Modimo, ka melao ya one, o di se iditseng go di ja. ₁₃Ga se gore se ikaeletse fela go ja mabutšwa-pele a mabele le kgafela tsa veini le mahura, le mororo se di dirile meila, e bile se di šometse baprista ba ba direlang mo Jerusalema fa pele ga Modimo wa rona, mme, ka molao, di sa tšhwanela go ba di kgomiwa ke batho, ₁₄se bile sa romela banna kwa Jerusalema, kwa batho ba ba nnang teng ba dirang fela jaana, go ya go tla le tetla mo Lekgotleng la Bagolwane, ₁₅jaanong se ke sone se se tlaa diragalang: fa tetla e tla mme se dira jaaka e bolela, mo go lone letsatsi leo lo tlaa se neelwa gore lo se ripitle. ₁₆E rile nna, mohula wa gago, ke tla go itse dilo tse tsotlhe, ka sia ka se tlogela. Modimo o nthometse go tla go dira dilo nao tse lefatshe e tlaa reng le di utlwa le gakgamale thata. ₁₇Mohula wa gago ke mosadi wa borapedi; o tlotla Modimo wa legodimo bosigo le motshegare.

“Jalo he, morena wa me, ke ne ke ikaeletse go nna nao. Nna, mohula wa gago, ke tlaa ne ke tswela kwa kgophung bosigo bongwe le bongwe go ya go rapela Modimo teng, gore o nkitsise fa ba dirile sebe sa bone. ₁₈Ke tlaa bo ke tla go go bolelela, gore O tšwe O gwante ka mophato wa gago otlhe; mme ga go na ope wa bone yo o tlaa ganetsanang nao. ₁₉Ke tlaa go supegetsa tsela e e kgabaganyang Juta go fitlhelela O bo O fitlha kwa Jerusalema; koo ke tlaa feta ke go baya mo setulong sa bogosi mo gare-gare ga motse. Mme O tlaa ba etelela pele jaaka dinku, le gone ga go na ntša epe e e tlaa bong e leke go atlhamolosa molomonyana wa yone go go bogola. Kitsetso-pele ke yone e mpolelelang selo se; selo se ke sa le ke se bolelelwa-pele mme ke rometswe go tla go se go senolela.”

₂₀Mafoko a gagwe a ne a itumedisa Holofernese le masole-bathusi otlhe a gagwe. E rile ba kgatlhilwe thata jaana ke botlhale jwa gagwe, ba buela godimo ba re, ₂₁“Ga go na mosadi ope yo o tšhwanang nae go tšwa kwa ntlheng e nngwe ya lefatshe go ya kwa go e nngwe, yo o mabonomantle jaana le yo o botlhale mo puong jaana!”

₂₂Mme Holofernese a mo raya a re, “Modimo o dirile sentle wa go romela pele ga batho ba ga eno. Thata e tlaa nna ya rona, mme tshenyego e tlaa nna ya bone ba ba tlhapaditseng morena wa me. ₂₃Fa e le wena, bontle jwa gago bo tšhwana le go bua ga gago mo gontle. Fa O ka dira jaaka O solofeditse, modimo wa gago e tlaa nna modimo wa me, mme le wena O tlaa dira legae la gago mo tlung ya segosi ya ga Kgosi Nebukatenesare, O itsege mo lefatsheng lotlhe.”