1E rile banna ba ba neng ba sa ntse ba le mo ditanteng tsa bone ba utlwa dikgang tse, ba tshoga thata. 2Ba ne ba welwa godimo ke poifo le thoromo mo e leng gore e ne ya nna semphete-semphete: ka mokgwa o thipitlo e neng e feleletse ka teng! Ba le botsa phokojwe ka mmila mongwe le mongwe go kgabaganya leboa le go tlola dithaba. 3Banna ba ba neng ba ntse ba thibelela bosigo mo dithabeng mo tikologong ya Bethulia le bone ba ne ba le botsa phokojwe. Jaanong batlhabani ba Baiseraele ba ba kgwelogela, ba ba wela godimo.
4Usia o ne a romela barongwa kwa bathong ba Betomasthaime, Bebai, Tshoba, Kola le gongwe le gongwe mo dithotaneng tsa Iseraele, go ya go ba bolelela ka ga se se neng se diragetse le go ba kgorola gore ba itigele mo godimo ga baba ba, ba bo ba ba nyeletse. 5Ya re fela Baiseraele ba utlwa dikgang tse ba ba wela godimo ba le seoposengwe mme ba ba bolaaka mo tseleng yotlhe e e yang Tshoba. Banna ba Jerusalema le ba lefatshe la makgabana lotlhe le bone ba ne ba ipopa ba ya go ba tlhasela, fela fa ba sena go utlwa gore go ne go diragetse eng mo bothibelelong jwa baba. Banna ba Gileate le Galelea bone ba ba tšwa setlhabetsi mme ba ba thubaka mo go mašwe go fitlhelela ba bo ba atamela Damaseko le kgaolo ya teng.
6Ba bangwe ba ba neng ba setse kwa Bethulia, bone, ba ne ba tsenelela bothibelelo jwa Maasiria mme ba bo thukhutha, ba itseela dilo tse dintsi. 7Baiseraele ya re ba boa kwa polaong ba feta ba iphamolela mo go neng go setse. Metse le metsana ya makgabana le leboa le yone ya ikgapela dithopo tse dintsi, gonne go ne go sa ntse go na le mokoa wa tsone.
Iseraele O A Leboga
8Joakime moprista yo mogolo le lekgotla la Bagolwane, ba ba neng ba le mo Jerusalema, ba ne ba tla go bona dilo tse di molemo tse Morena a neng a di goromeleditse Iseraele le go bona Judithe go tla go mo akgola. 9Ya re ba fitlha fa tlung ya gagwe ba mmaka ba le seoposengwe ba re,
“O tlotlo ya Jerusalema!
O boikgantsho jo bogolo jwa Iseraele!
O tlotla e kgolo ya setshaba sa ga rona!
10Ka go dira dilo tse tsotlhe ka seatla sa gago
O diretse Iseraele molemo o mogolo.
Mme Modimo o dumalanye le se O se dirileng.
A Morena yo o thatayotlhe a go tshegofatse
mo malatsing otlhe a a tlang!”
Mme batho botlhe ba araba ba re, “Amen!”
11Batho ba ne ba thukutha bothibelelo malatsi a le 30. Ba naya Judithe tante ya ga Holofernese, dijana tsotlhe tsa selefera, ditilo tsa gagwe, dikotlele tsa gagwe tse di nwelang le ditsompelo tsotlhe tsa ntlo. A di tsaya, a di pega mo mmoulong wa gagwe, a golega dikolotsana tsa gagwe mme a koega dilo tse mo go tsone. 12Basadi botlhe ba Iseraele ba itlhaganelela go ya go mmona, ba dira ditlhopha tsa babini go mo tlotla. Judithe ene a abela basadi ba ba neng ba mo patile dikala; 13ene le bapati ba gagwe ba rwala dikgare tsa motlhware. Ke fa a etelela popelelo pele, a goga basadi kwa tlhogong ba ntse ba bina. Banna botlhe ba Iseraele, ba tlhometse e bile ba kgabile ka melogo ya dithunya le matlhare a matalana, ba ba sala morago, ba ntse ba korotla dikoma.
14Ya re Iseraele yotlhe e gomile Judithe jaana, a phaologa ka pina e ya tebogo mme batho botlhe ba opelela sefela se godimo ba re:
