Lefoko la Modimo mo komelelong le mo tlalelong ya ntwa
1Lefoko la Morena le le tsileng kwa go Jeremia ka ntlha ya komelelo e kgolo la re:
2“Juta o a hutsafala, ba bolawa
ke lenyora mo metseng ya gagwe,
ba ntse fa fatshe ka bohutsana;
selelo sa Jerusalema
se a tlhatloga.
3Batlotlegi ba bone ba roma
badiredi ba bone kwa metsing;
ba fitlha kwa didibeng,
ba sa bone metsi.
Ba boa ka dinkgo tsa bone
tse di se nang sepe,
ba swabile,
ba tlhajwa ke ditlhong,
ba ikhurumeditse ditlhogo.
4E re ka masimo a senyegile
ka ntlha ya pula e e sa nang
mo lefatsheng,
balemi ba swabile,
ba ikhurumeditse ditlhogo.
5Ee, le tshephe mo nageng
e tlogela ngwana,
e sena go tsala;
gonne ga go na bojang.
6Diesele tsa nageng di eme
mo dithabaneng tse di iphotlhereng,
di hupa mowa jaaka diphokojwe,
di bokaletse matlho,
gonne ga go na mafulo.
7‘Morena, le fa melato ya rona
e supa ka ga rona,
thusa, o dire jalo
ka ntlha ya leina la gago;
ee, boikepo jwa rona bo bogolo,
re go leofetse.
8Wena tsholofelo ya Iseraele,
wena mothusi wa gagwe
mo sebakeng sa tlalelo,
ke ka ntlha ya eng,
fa o tshwana le moeng fela
mo lefatsheng,
le moeti yo o lalang fela,
a ba a feta?
9Ke ka ntlhaang, fa o tshwana
le monna yo o feletsweng
ke maano,
fa o tshwana le seganka
se se sa itseng go thusa?
Kana ò na le rona, Morena!
Re biditswe ka leina la gago.
Se re tlogele!’ ”
10Morena o bua jaana ka ga morafe o a re: “Ba ratile go kgarakgatshega jalo, ba sa thibele maoto a bone; ka moo ga ba a ka ba kgatlha Morena. Jaanong o tla gakologelwa melato ya bone, a ba beletsa maleo a bone.”
11Mme Morena a nthaya a re: “Se rapelele morafe o, go fiwa tse di molemo. 12Le fa ba ka itima dijo, ga nka ke ka utlwa mekokotlelo ya bone; le fa ba ka tlisa setlhabelo se se fisiwang le tshupelo ya dijo, ga nka ke ka ba itumelela; mme ke tla ba feleletsa ka tšhaka le ka tlala le ka leroborobo.”
13Ka araba ka re: “Ao! Morena Modimo, bona, baporofeti ba bone ba ba raya ba re: ‘Ga lo kitla lo bona tšhaka le e seng tlala, gonne ke tla lo naya kagiso e e tlhomameng mo felong fano.’ ”
14Mme Morena a nthaya a re: “Tse baporofeti ba di rerang mo leineng la me ke maaka fela. Ga ke a ba roma le e seng go ba laela sepe le e seng go bua nabo. Ba lo rerela dipono tsa maaka le boitseanape jwa boithamako le tsietso ya dipelo tsa bone.” 15Bakeng leo Morena o bua jaana a re: “Baporofeti ba ba rerang mo leineng la me, le fa ke sa ba roma, ba ba buang ba re: ‘Tšhaka le tlala ga di na go tsena mo lefatsheng le’ – baporofeti bao ba tla nyelela ka tšhaka le ka tlala. 16Mme morafe o ba o rerelang o tla latlhelwa mo mebileng ya Jerusalema o bolailwe ke tlala le tšhaka, go se na ope yo o ba fitlhang, bone basadi ba bone le bomorwaa-bone le bomorwadia-bone. Ke tla goromeletsa bokgopo jwa bone jalo mo go bone. 17Jaanong o ba bolelele lefoko le o re:
“ ‘Matlho a me a ela dikeledi
bosigo le motshegare,
ga a na go khutla!
Gonne lekgarebe,
morwadia morafe wa me
o kgobegile ka tatlhego e kgolo,
a tswa ntho e e sa foleng.
18Fa ke tswela kwa nageng,
ke fitlhela ba ba phololeditsweng
ka tšhaka;
fa ke tsena mo motseng,
ke bona matlhoko a tlala.
Ee, moporofeti le moperesiti
le bone ba kgarakgatshega
mo lefatsheng,
ba sa tlhole ba itse sepe.’ ”
Bajuta ba seka le Modimo
19A ò latlhetse Juta ruri? Gongwe
a Sione o tenne Mowa wa gago?
Ke ka ntlhaang,
fa ò re otlile
mo go se nang kalafo?
Re ne re lebeletse kagiso,
mme ga go na sepe
se se molemo;
le sebaka sa kalafo,
mme re fitlhela letshogo fela.
20Morena, re ipona boikepo
jwa rona le molato wa borraetsho;
ee, re go leofetse.
21A ko ò se ka wa re nyatsa
ka ntlha ya leina la gago!
Se tlotlolole sedulo sa bogosi
sa kgalalelo ya gago!
Gopola kgolagano e ò e dirileng
le rona;
ò se ka wa e senya.
22A go na le medimo ya baheitane
e e nesang pula?
Gongwe a legodimo
le ka nesa pula ka bolone?
A ga se wena Morena,
Modimo wa rona?
Re lebeletse wena,
gonne ò dira dilo
tse tsotlhe tse.
