JEREMIA 26

₁E rile mo tshimologong ya puso ya ga Joyakime, morwa Josia, kgosi ya Juta, ga tswa lefoko le kwa Moreneng, la tla kwa go Jeremia la re: ₂“Morena o bua jaana a re: ‘Yaa o eme mo lapeng la Ntlo ya Morena, o rerele ba metse yotlhe ya Juta ba ba tlang go obamela mo Ntlong ya Morena mafoko aotlhe a ke go laetseng go a ba bolelela; se lobe lefoko lepe! ₃Ka gongwe ba tla utlwa, ba boa, mongwe le mongwe mo tseleng e e bosula ya gagwe; foo ke tla latlha thupa e ke neng ke ikaeletse go ba otla ka yona ka ntlha ya bosula jwa ditiro tsa bone.’

₄“O ba ree o re: ‘Morena o bua jaana a re: Fa lo sa nkutlwe, fa lo sa sepele ka fa molaong wa me, o ke o le neileng, ₅fa lo sa utlwe mafoko a baporofeti, batlhanka ba me, ba ke ntseng ke ba romela kwa go lona ka tlhoafalo – mme kana ga lo a ka lwa nkutlwa ka gope – ₆foo ke tla direla Ntlo e jaaka Silo. Mme motse o ke tla o dira thogako mo ditšhabeng tsotlhe tsa lefatshe.’ ”

₇Mme baperesiti le baporofeti le morafe otlhe ba utlwa Jeremia a bua mafoko a mo Ntlong ya Morena. ₈Jaanong e rile Jeremia a sena go fetsa go bua tsotlhe tse Morena o di mo laetseng gore a di rerele morafe otlhe, baperesiti le baporofeti le batho botlhe ba mo tshwara ba re: “O tshwanetse go swa! ₉Ke ka ntlhaang, fa o rera mo leineng la Morena o re: ‘Ntlo e, e tla direlwa jaaka Silo, le motse o o tla ntshiwa marope fela, go sa tlhole go nna ope mo go ona’?” Ke fa morafe otlhe o kgobokanela Jeremia mo Ntlong ya Morena go mo lwantsha.

₁₀Jaanong ya re dikgosana tsa Juta di utlwa dilo tseo, tsa tloga kwa ntlong ya kgosi tsa ya kwa Ntlong ya Morena, tsa nna fa mojakong wa kgoro e ntšhwa ya Ntlo ya Morena. ₁₁Ke fa baperesiti le baporofeti ba raya dikgosana le morafe otlhe ba re: “Monna yo, o tshwanetse go atlholelwa loso! Gonne o reretse motse o tatlhego jaaka lo utlwile ka ditsebe tsa lona.”

₁₂Mme Jeremia a raya dikgosana tsotlhe le morafe otlhe a re: “Morena o nthomile gore ke rerele Ntlo e le motse o tatlhego ka mafoko otlhe a lo a utlwileng. ₁₃Jaanong siamisang ditsela tsa lona le ditiro tsa lona, lo utlwe lentswe la Morena, Modimo wa lona! Foo Morena o tla boa bogaleng, a sa lo otle jaaka a lo bopetse. ₁₄Fa e le nna, bonang, ke mo diatleng tsa lona. Dirang ka nna jaaka go le molemo le tshiamo mo matlhong a lona! ₁₅Fela lo tshwanetse go itse gore, fa lo mpolaya, lo itirela molato wa madi a a se nang molato, mmogo le motse o le baagi ba ona; gonne ka boammaaruri Morena o nthomile kwa go lona gore ke bue mafoko aotlhe a mo ditsebeng tsa lona.”

₁₆Ke fa dikgosana le morafe otlhe ba raya baperesiti le baporofeti ba re: “Monna yo ga a tshwanelwa ke go atlholelwa loso. Gonne o buile le rona mo leineng la Morena, Modimo wa rona.”

₁₇Le gona banna bagolo ba lefatshe ba ema, ba raya phuthego yotlhe ya morafe ba re: ₁₈“Miga wa Morešethe o ne a rera mo malatsing a ga Hesekia, kgosi ya Juta, a raya morafe otlhe wa Juta a re: ‘Morena wa masomosomo o bua jaana a re:

₁₉“Jaanong a Hesekia, kgosi ya Juta, le Bajuta botlhe ba mmolaile? A ga ke re, o ne a boifa Morena, a kopa bopelothomogi fa pele ga Morena! Ke fa Morena a fetola maikaelelo a gagwe, a sa ba ise mo tatlhegong jaaka a ba bopetse. Jaanong a rona re ka dira bosula jo bo kana, ra ikisa ka rosi mo tatlhegong?”

₂₀Le gona go ne go le monna yo mongwe yo o neng a rera mo leineng la Morena, e bong Uria, morwa Semaya, wa kwa Khiriathe-Jearime; a rerela motse o le lefatshe le tatlhego fela jaaka Jeremia. ₂₁Jaanong e rile kgosi Joyakime le bagale botlhe ba gagwe le dikgosana tsotlhe tsa gagwe ba utlwa mafoko a gagwe, kgosi ya batla go mmolaya. Ya re Uria a utlwa jalo, a boifa, a tshaba, a falolela kwa Egepeto. ₂₂Ke fa kgosi Joyakime a roma banna kwa Egepeto, e leng Elenathane, morwa Agebore, le banna ba bangwe nae kwa Egepeto. ₂₃Bao ba tshwara Uria, ba mo ntsha kwa Egepeto, ba mo tlisa kwano go kgosi Joyakime; ene a mmolaya ka tšhaka, a latlhela setoto sa gagwe kwa mabitleng a ba e leng batho fela.

₂₄Mme seatla sa ga Ahikame, morwa Safane, se ne sa sireletsa Jeremia gore a se ka a neelwa mo diatleng tsa morafe, le e seng go bolawa ke ona.