JOŠUA 18

₁E rile Baiseraele ba sena go thopa lefatshe, ba phuthegela botlhe kwa Silo, ba tlhoma Tempelana ya Boipontsho teng. ₂Mme ga bo go setse ditso tse supa mo Baiseraeleng tse di iseng di amogele dikabelo tsa tsone. ₃Ke fa Jošua a raya Baiseraele a re: “Lo diega sebaka se se kana kang go ya go tsaya lefatshe le Morena, Modimo wa borraeno, o le lo fileng? ₄Ntshang banna ba bararo mo lotsong longwe le longwe; ke tla ba roma gore ba nanoge ba ralale lefatshe, ba le kwale ka fa ba ka le abelwang ka teng, ba be ba boele kwano go nna. ₅Lo fete lo le kgaoganye dikarolo tse supa. Juta o tla nna mo nageng ya gagwe kwa borwa le Bajosefa ba tla nna mo nageng ya bone kwa bokone. ₆Mme lo kwale dikabelo tse supa tsa lefatshe, lo di tlise kwano go nna gore ke lo tlhamele tengwa fano fa pele ga Morena, Modimo wa rona. ₇Gonne Balefi ga ba na kabelo ya naga mo go lona. Kana boswa jwa bone ke boperesiti jwa Morena. Gape Gate le Rubene le ba bontlhanngwe jwa lotso lwa ga Manase ba setse ba amogetse boswa jwa bone kwa botlhabatsatsi kwa moseja ga Joretane; ba bo filwe ke Moše, motlhanka wa Morena.”

₈Ke fa banna bao ba nanoga go tsamaya. Ya re ba bolola go kwala lefatshe, Jošua a ba laela a re: “Yaang lo ralale lefatshe, lo le kwale, lo be lo boele kwano go nna, ke tle ke lo tlhamele tengwa fa pele ga Morena mono Silo.” ₉Banna bao ba ya ba ralala lefatshe, ba le kwala ka fa metseng mo lokwalong, ba dira dikabelo tse supa ba be ba boela kwa go Jošua kwa bothibelelong jwa Silo. ₁₀Ke fa Jošua a ba tlhamela tengwa mo Silo fa pele ga Morena; Jošua a abela Baiseraele lefatshe ka fa ba rulagantsweng ka teng.

₁₁Ga tswa tengwa ya lotso lwa Babenyamene ka fa ditshikeng tsa bone: Naga e ba e amogetseng ka tengwa e ne e le fa gare ga Bajuta le Bajosefa. ₁₂Molelwane wa bone mo ntlheng ya bokone o ne o tloga kwa Joretane; molelwane o be o tlhatlogela kwa mmotong ntlheng ya bokone ya Jerigo, o be o tlhatlogela mo dithabeng, o ya kwa bophirimatsatsi, o khutla mo sekakeng sa Bethawene. ₁₃Go tswa teng molelwane o ne o fetela kwa Luse kwa ntlheng ya borwa ya mmoto wa Luse, e bong Bethele. Jaanong molelwane o fologela kwa Aterothe-Atare, o tlhatlogela kwa thabeng e e mo ntlheng ya borwa ya Bethorone yo o kwa tlase. ₁₄Jaanong molelwane o ne o thelela, o fapogela kwa borwa mo ntlheng ya bophirimatsatsi go tswa kwa thabeng e e lebaganyeng le Bethorone ntlheng ya borwa, o ya o khutla kwa Khiriathe-Baale, e bong Khiriathe-Jearime motse wa Bajuta. Ke lone lotlhakore lwa bophirimatsatsi. ₁₅Mo ntlheng ya borwa go tswa kwa bofelong jwa Khiriathe-Jearime molelwane o ne o tswa kwa bophirimatsatsi, o fetela kwa motsweding wa metsi a Nefethoa. ₁₆Jaanong molelwane o ne o fologela kwa bofelong jwa thaba e e lebaganyeng le mogorogoro wa Morwa Hinome e e mo leboeng la Barefaime ntlheng ya bokone; o be o fologela kwa mogorogorong wa ga Hinome, o ya kwa mfapheng wa thaba ya Bajebusi mo ntlheng ya borwa, o be o fologela kwa motsweding wa Rogele. ₁₇Jaanong o ne o thelela o ya kwa bokone, o fetela kwa Motsweding wa Letsatsi, o be o fetela kwa marakeng a dithako a a lebaganyeng le phata ya Adumime, o be o fologela kwa lefikeng la ga Bohane morwa Rubene. ₁₈O be o fetele kwa bokone kwa dithabeng tse di lebaganyeng le lebala la Joretane o be o fologela kwa lebaleng leo. ₁₉Jaanong molelwane o ne o fetela kwa ntlheng ya bokone ya Bethogola, molelwane o be o felela fa sekhutlong sa Lewatle la Letswai ntlheng ya bokone kwa bofelong jwa Joretane kwa borwa. Ke ona molelwane wa kwa borwa. ₂₀Joretane ke molelwane wa teng mo ntlheng ya botlhabatsatsi. Ke yona naga ya Babenyamene ka fa ditshikeng tsa bone le melelwane ya yona mo tikologong.

₂₁Mme metse ya lotso lwa Babenyamene ka fa ditshikeng tsa bone e ne e le Jerigo le Bethogola le Emeke-Kesise ₂₂le Betharaba le Semaraime le Bethele ₂₃le Awime le Phara le Ofera ₂₄le Kefare-Amoni le Ofeni le Geba. E ne e le metse e le 12 kwa ntle ga metsana ya yona. ₂₅Le Gibeone le Rama le Beerothe ₂₆le Mitsepha le Kefira le Mosa ₂₇le Rekeme le Irefele le Thareala ₂₈le Sela le Elefe le Jebusi, e bong Jerusalema le Gibeathe le Khiriathe. E ne e le metse e le 14 kwa ntle ga metsana ya yona. Ke yona kabelo ya Babenyamene ka fa ditshikeng tsa bone.