LEFITIKO 25

₁Morena o ne a bua le Moše kwa thabeng ya Sinai a re: ₂“Bua le Baiseraele, o ba ree o re: ‘E re lo sena go fitlha kwa lefatsheng le ke tla le lo nayang, lo latse masimo, a nne le Sabata wa Morena. ₃O leme tshimo ya gago dinyaga di le thataro, le tshimo ya gago ya moweine o o pome dikala dinyaga di le thataro, o robe thobo ya teng. ₄Mme ka ngwaga wa bosupa go tla nna Sabata wa boikhutso jo bo tletseng wa masimo, e nne Ngwaga-wa-Sabata wa Morena. Tshimo ya gago o se ka wa e lema le tshimo ya moweine ya gago o se ka wa o poma dikala. ₅Matshwabudu a thobo ya gago o se ka wa a roba; maungo a moweine wa gago o o sa pongwang dikala o se ka wa a fula. A e nne ngwaga wa boikhutso wa masimo. ₆Mme matshwabudu a Sabata wa masimo e tla nna dijo tsa lona, e bong tsa gago le tsa motlhanka wa gago le tsa lelata la gago le tsa modiredi wa gago yo o rapetsweng tuelo le tsa yo o agileng nao le tsa botlhe ba ba nang nao ₇le tsa diruiwa tsa gago le tsa diphologolo tse di mo lefatsheng la ga lona; matshwabudu otlhe a lone e tla nna dijo.

₈“ ‘Jaanong o bale Dinyaga-tsa-Sabata di supa, e bong dinyaga di supa gasupa, mme sebaka sa Dinyaga-tsa-Sabata di supa e tla nna dinyaga di le 49. ₉E be gona o utlwatsang lonaka lwa mokgosi o mogolo ka kgwedi ya bosupa e le some; ka lone letsatsi la thuanyo lo utlwatse lonaka mo lefatsheng lotlhe la lona. ₁₀Mme lo itshepise ngwaga wa 50, lo tlhabe mokgosi mo lefatsheng wa kgololo ya baagi botlhe ba lone. A e nne ngwaga wa tuduetso wa lona wa gore mongwe le mongwe a boelwe ke boswa jwa gagwe, a boele kwa ga gabo. ₁₁Ngwaga wa 50 e tla nna ngwaga wa tuduetso wa lona. Lo se ka lwa lema le e seng go roba matshwabudu a ona le e seng go fula maungo a moweine o o sa pongwang dikala. ₁₂Gonne ke ngwaga wa tuduetso, a o nne boitshepo mo go lona. Thobo ya ona lo e jele kwa masimo. ₁₃Ka ngwaga oo wa tuduetso mongwe le mongwe wa lona a amogele boswa jwa gagwe gape. ₁₄Jaanong fa o rekisa sengwe mo go mongwe-ka-wena, gongwe o reka sengwe mo go ene, lo se ka lwa patikana. ₁₅Mme o reke mo go mongwe-ka-wena ka fa palong ya dinyaga tse di fetileng go tloga ka ngwaga wa tuduetso; le ene a rekise mo go wena ka fa palong ya dinyaga tsa dithobo go fitlha ngwageng wa tuduetso. ₁₆O godise tlhwatlhwa ya teng ka fa bontsing jwa dinyaga tse di setseng; gongwe o e fokotse ka fa bobotlaneng jwa dinyaga; gonne ke palo ya dithobo tse a di rekisang mo go wena. ₁₇Jaanong he, lo se ka lwa patikana, mme o boife Modimo wa gago; gonne ke nna Morena Modimo wa lona.

₁₈“ ‘Ka moo he dirang ka fa melaong ya me, lo tlhokomele ditshiamelo tsa me, lo di dirafatse gore lo nne mo lefatsheng lo iketlile. ₁₉Foo lefatshe le tla ntsha maungo a lone, mme lo tla ja, lo kgora, lo nna mo go lone lo iketlile. ₂₀Mme fa lo ka re: Re tla ja eng ka ngwaga wa bosupa, fa re sa leme, re sa phuthe thobo ya rona? ₂₁Nna ka re: Ke tla lo neela tshegofatso ya me ka ngwaga wa borataro gore lo fole thobo ya dinyaga di le tharo. ₂₂Lo tla lema gape ka ngwaga wa robedi, lo ntse lo ja tsa thobo ya ngwagatlola go ya ngwageng wa robongwe; lo tla ja dijo tse dikgologolo go ya go be go tla thobo ya ona.

₂₃“ ‘A lefatshe le se ka la rekisediwa ruri; gonne ke la me; lona lo baeng le bajaki fela mo go nna.

₂₄“ ‘Mo lefatsheng lotlhe le e leng la lona lo dumelele thekololo ya lone. ₂₅E re fa wa ga eno a humanegile, a ba a rekisa sengwe sa boswa jwa gagwe, a go tle mogolodi wa gagwe yo o gaufi nae losikeng, a rekolole se se rekisitsweng sa wa ga gabo. ₂₆Mme fa motho a se na mogolodi, mme a kgona go bona madi ka esi a a lekanyeng thekololo ya sa gagwe, ₂₇a go balwe dinyaga go tloga jale fa se rekisiwa, a be a busetse monna yo a se rekisitseng mo go ene madi a a lekanyeng dinyaga tse di setseng, a be a amogele boswa jwa gagwe gape. ₂₈Mme fa a sa bone madi a a lekanyeng go a mmusetsa, gona se a se rekisitseng se tla nna mo seatleng sa moreki wa sona go ya ngwageng wa tuduetso. Mme ka ngwaga wa tuduetso se tla gologa, mme o tla amogela boswa jwa gagwe gape.

₂₉“ ‘Mme fa motho a rekisa ntlo e e nnwang ya mo motseng o o ageletsweng ka lobota, o ka e rekolola fela, fa ngwaga o ise o fele a sena go e rekisa; ke sona sebaka sa go ka e ithekololela. ₃₀Fa ngwaga o ka fela a ise a e rekolole gona ntlo e e mo motseng o o nang le lobota e tla nna ya moreki wa yona le ya ditshika tsa gagwe ka metlha. Ga e kitla e gologa le e seng ka ngwaga wa tuduetso. ₃₁Mme matlo a metsana e e se nang lobota tikologong a a kaiwe jaaka masimo a naga: A ka rekololwa; le gona a tla gologa ka ngwaga wa tuduetso. ₃₂Fela fa e le metse ya Balefi, e bong matlo a metse ya boswa jwa bone, ona Balefi ba ka a rekolola ka metlha yotlhe. ₃₃Mme fa mongwe wa Balefi a sa rekolole ntlo e a e rekisitseng, gona e tla gologa ka ngwaga wa tuduetso, fa e le mo motseng o e leng boswa jwa gagwe; gonne matlo a metse ya Balefi ke boswa jwa bone mo Baiseraeleng. ₃₄Naga ya mafulo a metse ya bone e se ka ya rekisiwa. Gonne ke boswa jwa bone jo bo sa khutleng.

₃₅“ ‘Fa wa ga eno a humanega, mme letsogo la gagwe le simolola go tlhoka fa go wena, o mo thuse gore a phele nao jaaka moeng le mojaki. ₃₆Fa o mo adima madi, se a tsadise, se re, a boe le kokeletso, mme o boife Modimo wa gago gore wa ga eno a phele nao. ₃₇O se ka wa mo neela madi a gago gore a tsale, le e seng go mo neela dijo tsa gago gore di boe le kokeletso. ₃₈Ke nna Morena Modimo wa lona yo ke lo ntshitseng kwa lefatsheng la Egepeto go lo naya lefatshe la Kanana gore ke nne Modimo wa lona.

₃₉“ ‘E re fa wa ga eno a humanega fa go wena, a ba a ithekisa mo go wena, o se ka wa mo dirisa tiro ya bokgoba. ₄₀A a nne nao jaaka modiri yo o rapetsweng tuelo le jaaka mojaki, a go direle jalo go ya ngwageng wa tuduetso. ₄₁E be gona a gologang mo go wena, ene le bana ba gagwe nae, a boela kwa losikeng lwa gagwe, a amogela boswa jwa gagwe gape. ₄₂Gonne ke batlhanka ba me ba ke ba ntshitseng kwa lefatsheng la Egepeto; ga ba tshwanela go rekisiwa jaaka makgoba. ₄₃Wa ga eno o se ka wa mo laola ka bopeloethata, mme o boife Modimo wa gago. ₄₄Fa e le lekgoba la monna le la mosadi ba o ba batlang, lo ka ba reka mo merafeng e e mo tikologong ya lona. ₄₅Le gona lo ka reka bana ba bajaki ba ba nnang le lona, le fa e le ba bangwe ba losika lwa bone ba ba lo agetseng ba ba ba tsetseng mo lefatsheng la ga lona: Bone e ka nna makgoba a lona. ₄₆Mme lo ka a tlogelela bana ba lona sehularong sa lona gore e nne a bone e le leruo; ona lo ka a dirisa ditiro tsa bokgoba ka metlha; fela mo go ba ga lona ba Baiseraele a go se nne ope yo o laolang wa ga gabo ka bopeloethata.

₄₇“ ‘Mme fa moeng gongwe mojaki a huma fa go wena, mme wa ga eno a humanega fa go ene, a ba a ithekisa mo go moeng gongwe mo go mojaki fa go wena gongwe mo go yo mongwe wa losika lwa moeng, ₄₈gona a a nne le tshiamelo ya go ka rekololwa, le fa a ithekisitse; a mongwe wa ba ga gabo a mo rekolole. ₄₉Gongwe a rrangwanaagwe kampo morwa rrangwanaagwe a mo rekolole, gongwe a yo mongwe wa ba ga gabo ba madi wa losika lwa gagwe a mo rekolole, gongwe fa a ka kgona, a a ithekolole. ₅₀A a bale le moreki wa gagwe go simolola ka ngwaga o a ithekisitseng mo go ene ka ona go ya ngwageng wa tuduetso; madi a go ithekisa a laolwa ke palo ya dinyaga tseo; o tla bo a ne a na nae ka sebaka seo jaaka modiri yo o rapetsweng tuelo. ₅₁Fa go sa ntse go le dinyaga tse dintsi go ya ngwageng wa tuduetso a a buse madi mangwe a o rekilweng ka ona a a di tshwanetseng e le a go ithekolola. ₅₂Mme fa go setse dinyaga di se kae fela go ya ngwageng wa tuduetso, a a di bale, a be a buse madi a a tshwanetseng dinyaga tseo tsa gagwe, e le a go ithekolola. ₅₃Jaanong fa a tlhoka thekololo a a nne nae ka ngwaga le ngwaga jaaka yo o rapetsweng tuelo; moreki ga a tshwanela go bonwa a mo laola ka bopeloethata. ₅₄Fela fa a sa rekololwe jalo, o tla gologa ka ngwaga wa tuduetso le bana ba gagwe. ₅₅Gonne Baiseraele ke batlhanka ba me; ke batlhanka ba me ba ke ba ntshitseng kwa lefatsheng la Egepeto. Ke nna Morena Modimo wa lona.