NUMERI 14

₁Ke fa phuthego yotlhe e tlhatlosa mantswe e goa, mme morafe wa lala o lela bosigo joo. ₂Baiseraele botlhe ba ngongoregela Moše le Arone, phuthego yotlhe ya ba raya ya re: “Bogolo re ka bo re swetse kwa lefatsheng la Egepeto! Kampo ra swela mo sekakeng seno! ₃Morena o re isetsang kwa lefatsheng leo gore re ye go swa ka tšhaka, mme basadi ba rona le bana ba rona e nne thopo? A ga go botoka gore re boele kwa Egepeto?” ₄Ba be ba raana ba re: “A re itlhomeleng moetapele, re boele kwa Egepeto!”

₅Mme Moše le Arone ba wela fa fatshe ka difatlhego fa pele ga phuthego yotlhe ya Baiseraele e e phuthegileng. ₆Mme Jošua morwa Nune le Kalebe morwa Jefune, ba e leng ba lesomo le le tswang go tlhola lefatshe, ba ikgagola diaparo, ₇ba raya phuthego yotlhe ya Iseraele ba re: “Lefatshe le re neng re le raletse go le sekaseka ke lefatshe le le molemo thata thata. ₈Fa Morena a re itumelela, o tla re fitlhisa kwa lefatsheng leo, a le re naya; ke lefatshe le le elang mašwi le dinotshe. ₉Fela lo se rukhutlhegeleng Morena, le gona lo se ka lwa boifa batho ba lefatshe leo; gonne re tla ba metsa. Phemelo ya bone e tlogile mo go bone, mme rona Morena o na le rona. Se ba boifeng!” ₁₀Jaanong ya re phuthego yotlhe e re e ba kgobotletsa ka majwe, kgalalelo ya Morena ya bonalela Baiseraele botlhe kwa Tenteng ya Boipontsho.

₁₁Morena a ba a raya Moše a re: “Batho ba, ba tla nnyatsa goleele go le kae? Ba tla khutla leng go sa dumeleng mo go nna, etswe ba bonye ditshupo tsotlhe tse ke di dirileng mo gare ga bone? ₁₂Ke tla ba bolaya ka leroborobo, ke ba nyeletsa, mme wena ke tla go dira morafe o mogolo, o o thata bogolo go bone.”

₁₃Mme Moše a raya Morena a re: “Baegepeto ba ka tla ba utlwa; gonne o ntshitse morafe o mo gare ga bone ka thata ya gago. ₁₄Le gona go ka bolelelwa baagi ba lefatshe la Kanana. Ba utlwile gore wena Morena o mo gare ga morafe o, le gore wena Morena o iponatsa go lebagantswe difatlhego le gore leru la gago le ba okame le gore o ba etelela pele ka pinagare ya leru motshegare le ya molelo bosigo. ₁₅Jaanong fa o ka bolaya morafe o jaaka monna a le mongwe, foo baheitane ba ba utlwetseng tumo ya gago ba tla bua ba re: ₁₆‘E re ka Morena a paletswe ke go fitlhisa morafe o kwa lefatsheng le a le ba ikanetseng, o ba bolaetse mo sekakeng.’ ₁₇Jaanong he, a thata ya Morena e ke e nne kgolo jaaka o buile wa re: ₁₈‘Morena o pelotelele, o letlotlo la boutlwelo-botlhoko, o itshwarela molato le tlolo, mme ga a lese ope fela a sa mmetse, mme o beletsa bana tshiamololo ya borraabo go ya losikeng lwa boraro le lwa bone.’ ₁₉A ko o itshwarele molato wa morafe o ka fa bogolong jwa bopelotlhomogi jwa gago, jaaka o ne o ntse o itshwarela morafe o go tloga kwa Egepeto go fitlha fano.”

₂₀Morena a araba a re: “Ke ba itshwaretse jaaka o kopile. ₂₁Fela ruri, ka botshelo jwa me le ka lefatshe lotlhe le tla tlala kgalalelo ya Morena: ₂₂Ruri, banna botlhe ba ba bonyeng kgalalelo ya me le ditshupo tsa me tse ke di dirileng kwa Egepeto le mo sekakeng, mme ba ntekile gasome, ba gana go utlwa lentswe la me, ₂₃ga ba kitla ba bona lefatshe le ke le ikanetseng borraabo; botlhe ba ba nnyaditseng ga ba kitla ba le bona. ₂₄Mme Kalebe motlhanka wa me, e re ka a na le mowa o sele, a ntshetse morago ka botlalo, ke tla mo fitlhisa kwa lefatsheng le o tswang go tsena mo go lone, mme ba losika lwa gagwe ba tla le rua. ₂₅Baamaleke le Bakanana ba agile mo lebaleng. Kamoso lo retologe, lo bolole go ya kwa sekakeng ka tsela e e yang kwa Lewatleng la Motlhaka.”

₂₆Morena a ba a raya Moše le Arone a re: ₂₇“Phuthego e e bosula e, e tla nna e nngongoregela go fitlha leng? Dingongorego tsa Baiseraele tse ba sa bolong go nngongoregela ka tsona ke di utlwile. ₂₈Ka moo o ba ree o re: ‘Ka botshelo jwa me! Go bua Morena. Ruri, ke tla lo direla fela jaaka lo buile mo ditsebeng tsa me: ₂₉Direpa tsa lona di tla namalala mo sekakeng se, e bong botlhe ba ba badilweng ba lona ka fa palong yotlhe ya lona go simolola ka ba ba dinyaga di le 20 le bomogoloa-bone ba lo nngongoregetseng. ₃₀Ruri, ga lo kitla lo tsena mo lefatsheng le ke le tsholeleditseng letsogo la me, ka ikana go lo agisa mo go lone, fa e se Kalebe morwa Jefune le Jošua morwa Nune. ₃₁Mme bana ba lona ba lo rileng ba tla nna thopo, ke bone ke tla ba fitlhisang gore ba rue lefatshe le lo le nyaditseng. ₃₂Mme lona, direpa tsa lona di tla namalala mo sekakeng se. ₃₃Bana ba lona ba tla nna badisa mo sekakeng dinyaga di le 40, ba rwala boikepo jwa lona go tsamaya direpa tsa lona di be di felelela mo sekakeng. ₃₄Ka fa palong ya malatsi a soma mane a lo tswang go tlhola lefatshe ka ona, – lo tla rwala ditshiamololo tsa lona dinyaga di le 40 gore lo tle lo itse ka fa ke emelanang le lona ka teng.’ ₃₅Nna Morena ke buile jalo; ruri, phuthego yotlhe e e bosula e, e e golaganetseng go lwa le nna, ke tla e direla jalo. Ba tla nyelela mo sekakeng seno, ba swela teng.”

₃₆Mme banna ba Moše o neng a ba romile go ya go tlhola lefatshe, ba ba fetileng ba ngongoregisa phuthego yotlhe ka ga gagwe ka go bua dilo tse di bosula ka ga lefatshe, ₃₇banna bao ba ba buileng dilo tse di bosula ka ga lefatshe ba swela fa pele ga Morena ka petso. ₃₈Mme Jošua morwa Nune le Kalebe morwa Jefune, ba ba neng ba na le banna ba ba tswang go tlhola lefatshe, bona ba phela.

₃₉Ya re Moše a bolelela Baiseraele botlhe mafoko ao morafe wa hutsafala thata. ₄₀Mo mosong ba phakela, ba tlhatlogela kwa godimo ga thaba, ba re: “Re fano, a re yeng kwa felong fa Morena a buileng ka ga gona; gonne re leofile.”

₄₁Mme Moše a re: “Lo tlolelang taolo ya Morena? Go tlile go pala. ₄₂Se bololeng, gonne Morena ga a na le lona. Lo tla bolawa ke baba ba lona. ₄₃Gonne Baamaleke le Bakanana ba teng fa pele ga lona, mme lo tla swa ka tšhaka; e re ka lo tlhanogetse Morena, ga a kitla a nna le lona.”

₄₄Mme ba ikgogomosa ba re ba tlhatlogela kwa dithabeng; fela Letlole la Kgolagano la se ka la suta go tswa mo bothibelelong le e seng Moše. ₄₅Ke fa Baamaleke le Bakanana ba ba neng ba agile mo dithabeng tseo ba fologa ba ba bolaya, ba ba phatlalatsa go ya go fitlha kwa Horema. Mme ba boela kwa bothibelelong.