NUMERI 2

₁Morena a ba a raya Moše le Arone a re: ₂“E re fa Baiseraele ba thibelela, mongwe le mongwe a nne fa sefokeng sa ga gabo le fa ditshupong tsa kgotla ya ga gabo; a ba thibelele mo tikologong ya Tente ya Boipontsho, ba lebagane nayo.

₃“Ba ba tla thibelelang ntlheng ya botlhabatsatsi ke ba sefoka sa bothibelelo jwa ga Juta ka fa mephatong ya bone. Kgosana ya Bajuta ke Nasone morwa Aminatabe. ₄Mophato wa gagwe, e bong ba ba badilweng ba bone, ke ba le 74 600. ₅Ba ba tla thibelelang go bapa nae ke lotso lwa ga Isašare. Kgosana ya Baisašare ke Nethanele morwa Suare. ₆Mophato wa gagwe, e bong ba ba badilweng ba bone ke ba le 54 400. ₇Le lotso lwa ga Sebulone. Kgosana ya Basebulone ke Eliabe morwa Helone. ₈Mophato wa gagwe, e bong ba ba badilweng ba gagwe ke ba le 57 400. ₉Botlhe ba ba badilweng ba bothibelelo jwa ga Juta ke ba le 186 400 ka fa mephatong ya bone. Ba tshwanetse go bolola pele.

₁₀“Ba sefoka sa bothibelelo jwa ga Rubene ba nne ntlheng ya borwa ka fa mephatong ya bone. Kgosana ya Barubene ke Elisure morwa Seteure. ₁₁Mophato wa gagwe, e bong ba ba badilweng ba gagwe ke ba le 46 500. ₁₂Ba ba tla thibelelang go bapa nae ke lotso lwa ga Simeone. Kgosana ya Basimeone ke Sedumiele morwa Surišatai. ₁₃Mophato wa gagwe, e bong ba ba badilweng ba bone ke ba le 59 300. ₁₄Le lotso lwa ga Gate. Kgosana ya Bagate ke Eliasafe morwa Rehuele. ₁₅Mophato wa gagwe, e bong ba ba badilweng ba bone ke ba le 45 650. ₁₆Botlhe ba ba badilweng ba bothibelelo jwa ga Rubene ke ba le 151 450 ka fa mephatong ya bone. Ke bone ba mephato ya bobedi ba ba bololang.

₁₇“Jaanong go tloge Tente ya Boipontsho le bothibelelo jwa Balefi fa gare ga mathibelelo a mangwe. Ba bolole jaaka ba thibelela, mongwe le mongwe a le mo mannong a gagwe ka fa difokeng tsa bone.

₁₈“Ba sefoka sa bothibelelo jwa ga Eferaime ba nne ntlheng ya bophirimatsatsi ka fa mephatong ya bone. Kgosana ya Baeferaime ke Elisama morwa Amihute. ₁₉Mophato wa gagwe, e bong ba ba badilweng ba bone ke ba le 40 500. ₂₀Ba ba tla thibelelang go bapa nae ke lotso lwa ga Manase. Kgosana ya Bamanase ke Gamaliele morwa Phetasure. ₂₁Mophato wa gagwe, e bong ba ba badilweng ba bone ke ba le 32 200. ₂₂Le lotso lwa ga Benyamene. Kgosana ya Babenyamene ke Abitane morwa Giteoni. ₂₃Mophato wa gagwe, e bong ba ba badilweng ba bone ke ba le 35 400. ₂₄Botlhe ba ba badilweng ba bothibelelo jwa ga Eferaime ke ba le 108 100 ka fa mephatong ya bone. Ke bone ba mephato ya boraro ba ba bololang.

₂₅“Ba sefoka sa bothibelelo jwa ga Dane ba nne ntlheng ya bokone ka fa mephatong ya bone. Kgosana ya Badane ke Ahiesere morwa Amisatai. ₂₆Mophato wa gagwe, e bong ba ba badilweng ba bone ke ba le 62 700. ₂₇Ba ba tla thibelelang go bapa nae ke lotso lwa ga Asere. Kgosana ya Baasere ke Phagiele morwa Ogorane. ₂₈Mophato wa gagwe, e bong ba ba badilweng ba bone ke ba le 41 500. ₂₉Le lotso lwa ga Nafetale. Kgosana ya Banafetale ke Ahira morwa Enane. ₃₀Mophato wa gagwe, e bong ba ba badilweng ba bone ke ba le 53 400. ₃₁Botlhe ba ba badilweng ba bothibelelo jwa ga Dane ke ba le 157 600. Ke bone ba bofelo ba ba bololang ka fa difokeng tsa bone. ₃₂Ke bao ba ba badilweng ba Baiseraele ka fa dikgotleng tsa bone. Botlhe ba ba badilweng ba mathibelelo ka fa mephatong ya bone ke ba le 603 550.” ₃₃Mme Balefi ba se ka ba balelwa mo Baiseraeleng jaaka Morena a ne a laetse Moše.

₃₄Baiseraele ba dira fela jaaka Morena a laetse Moše: Ba thibelela jalo ka fa difokeng tsa bone, ba bolola jalo, mongwe le mongwe ka fa losikeng lwa gagwe fa kgotleng ya ga gabo.