NUMERI 33

₁Mesepele ya Baiseraele ba ba hudugileng kwa lefatsheng la Egepeto ka fa mephatong ya bone, ba okametswe ke Moše le Arone, ke e: ₂Moše a kwala mafelo ka fa taelong ya Morena kwa ba simolotseng mesepele ya bone teng; mesepele ya bone ka fa mathibelelong a bone ke e:

₃Ba ne ba tloga kwa Ramasese ka letsatsi la 15 la kgwedi ya ntlha le le tlhomaganang le la Tlolaganyo; Baiseraele ba huduga ka letsogo le le tsholetsegileng la Morena Baegepeto botlhe ba ntse ba lebile; ₄e le fa Baegepeto ba fitlha maitibolo otlhe a Morena o neng a a bolaile mo go bone. Le gona Morena o ne a dirafaditse katlholo le petso mo medimong ya bone.

₅Ba tlogile kwa Ramasese, ba thibelela kwa Sukothe. ₆Ba bothologa kwa Sukothe, ba thibelela kwa Ethame yo o fa thoko ga sekaka. ₇Ba bothologa kwa Ethame, ba thelelela kwa Phihagirothe yo o mo ntlheng ya botlhabatsatsi ya Baale-Sefone, ba thibelela mo ntlheng ya botlhabatsatsi ya Migetole. ₈Ba bothologa kwa Phihagirothe, ba tshela lewatle, ba tsena mo sekakeng, ba sepela mosepele wa malatsi a le mararo mo sekakeng sa Ethame, ba thibelela kwa Mara. ₉Ba bothologa kwa Mara, ba fitlha kwa Elime kwa go neng go le metswedi ya metsi e le 12 le mekolane e le 70, mme ba thibelela teng.

₁₀Ba bothologa kwa Elime, ba thibelela fa Lewatleng la Motlhaka. ₁₁Ba bothologa kwa Lewatleng la Motlhaka, ba thibelela mo sekakeng sa Sine. ₁₂Ba bothologa kwa sekakeng sa Sine, ba thibelela kwa Dofeka. ₁₃Ba bothologa kwa Dofeka, ba thibelela kwa Aluše. ₁₄Ba bothologa kwa Aluše, ba thibelela kwa Rafidime; teng morafe wa tlhoka metsi a a nowang.

₁₅Ba bothologa kwa Rafidime, ba thibelela mo sekakeng sa Sinai. ₁₆Ba bothologa kwa sekakeng sa Sinai, ba thibelela kwa Diphupung-tsa-bohula. ₁₇Ba bothologa kwa Diphupung-tsa-bohula, ba thibelela kwa Haserothe. ₁₈Ba bothologa kwa Haserothe, ba thibelela kwa Rithema. ₁₉Ba bothologa kwa Rithema, ba thibelela kwa Rimone-Pherese. ₂₀Ba bothologa kwa Rimone-Pherese, ba thibelela kwa Lebena. ₂₁Ba bothologa kwa Lebena, ba thibelela kwa Risa. ₂₂Ba bothologa kwa Risa, ba thibelela kwa Kehelatha. ₂₃Ba bothologa kwa Kehelatha, ba thibelela kwa thabeng ya Sefere. ₂₄Ba bothologa kwa thabeng ya Sefere, ba thibelela kwa Harata. ₂₅Ba bothologa kwa Harata, ba thibelela kwa Makhelothe. ₂₆Ba bothologa kwa Makhelothe, ba thibelela kwa Thahathe. ₂₇Ba bothologa kwa Thahathe, ba thibelela kwa Thera. ₂₈Ba bothologa kwa Thera, ba thibelela kwa Mitheka. ₂₉Ba bothologa kwa Mitheka, ba thibelela kwa Hasemona. ₃₀Ba bothologa kwa Hasemona, ba thibelela kwa Moserothe. ₃₁Ba bothologa kwa Moserothe, ba thibelela kwa Bene-Jaakane. ₃₂Ba bothologa kwa Bene-Jaakane, ba thibelela kwa Hore-Kitekate. ₃₃Ba bothologa kwa Hore-Kitekate, ba thibelela kwa Jotebatha. ₃₄Ba bothologa kwa Jotebatha, ba thibelela kwa Aberona. ₃₅Ba bothologa kwa Aberona, ba thibelela kwa Esione-Gebere. ₃₆Ba bothologa kwa Esione-Gebere, ba thibelela kwa sekakeng sa Tsine, ke kwa Kateše. ₃₇Ba bothologa kwa Kateše, ba thibelela kwa thabeng ya Hore fa molelwaneng wa lefatshe la Etomo.

₃₈Ke kwa moperesiti Arone o neng a tlhatlogela mo thabeng ya Hore ka fa taelong ya Morena, a swela teng, e le ka ngwaga wa 40 morago ga khudugo ya Baiseraele kwa lefatsheng la Egepeto ka letsatsi la ntlha la kgwedi ya botlhano. ₃₉Ya re Arone a swela kwa thabeng ya Hore a bo a le dinyaga di le 123.

₄₀Metlheng eo kgosi ya Arate wa Mokanana yo o neng a agile mo nageng ya borwa ya lefatshe la Kanana, a utlwela go tla ga Baiseraele.

₄₁Ba bothologa kwa thabeng ya Hore, ba thibelela kwa Salemona. ₄₂Ba bothologa kwa Salemona, ba thibelela kwa Phunone. ₄₃Ba bothologa kwa Phunone, ba thibelela kwa Obothe. ₄₄Ba bothologa kwa Obothe, ba thibelela kwa Iye-Abarime fa molelwaneng wa Moabe. ₄₅Ba bothologa kwa Iyime, ba thibelela kwa Dibone-Gate. ₄₆Ba bothologa kwa Dibone-Gate, ba thibelela kwa Alemone-Dibelathaime. ₄₇Ba bothologa kwa Alemone-Dibelathaime, ba thibelela kwa dithabeng tsa Abarime ntlheng ya botlhabatsatsi ya thaba ya Nebo. ₄₈Ba bothologa kwa dithabeng tsa Abarime, ba thibelela mo mabaleng a Moabe gaufi le Joretane go lebagana le Jerigo. ₄₉Ba thibelela fa Joretane go tloga kwa Bethe-Ješimothe go fitlha kwa Abele-Sitime mo mabaleng a Moabe.

₅₀Ya re ba le kwa mabaleng a Moabe gaufi le Joretane go lebagana le Jerigo, Morena a bua le Moše a re: ₅₁“Bua le Baiseraele o ba ree o re: ‘E re lo sena go tshela Joretane le go tsena mo lefatsheng la Kanana, ₅₂lo leleke baagi botlhe ba lefatshe fa pele ga lona, lo nyeletse majwe otlhe a a gwailweng ditshwantsho a bone, lo nyeletse medimo ya diseto yotlhe ya bone e e bopilweng, lo be lo senye dithota tsa tlhabelo tsotlhe tsa bone ₅₃gore lo tle lo thope lefatshe, lo age mo go lone; ka gonne lefatshe le ke le lo neile gore e nne la lona. ₅₄Lo abelwe lefatshe ka tengwa ka fa ditshikeng tsa lona; tse dikgolo lo di nee naga e kgolo, tse dinnye lo di nee naga e potlana. Kwa tengwa e welang motho gona, a gona e nne boswa jwa gagwe. Lo abelwe boswa ka fa ditsong tsa borraalona. ₅₅Mme fa lo sa leleke baagi ba lefatshe fa pele ga lona, gona ba lo ba sadisang ba bone ba tla lo fetogela mitlwa mo matlhong le dipolela mo ditlhakoreng, e nna baba ba lona mo lefatsheng le lo tla bong lo agile mo go lone. ₅₆Mme ke tla dirafaletsa lona tse ke neng ke ikaeletse go di dirafaletsa bone.’ ”