DIANE 24

₁Se fufegele dilo tsa ba ba bosula; se eletse go tshwana nabo. ₂Gonne dipelo tsa bone di akanya kgatelelo; melomo ya bone e bua tse di isang mo tatlhegong.

₃Ntlo e agiwa ka botlhale; e thewa sentle ka maatlametlo, ₄mme ka kitso matlwana a yona a tlala dithoto tsa mefutafuta tse di tlhwatlhwa e kgolo le tse dintle.

₅Letlhale le thata bogolo go seganka; yo o nang le kitso o thata bogolo go yo o dikgoka. ₆Gonne ò tla itse go lwa ntwa ka dikgakololo tse di botlhale; phenyo e bonwa ka bontsi jwa bagakolodi.

₇Tsa botlhale di palela seeleele; mo lekgotleng se tlhoka puo.

₈Yo o logang maano a go dira bosula o tla bidiwa Rra-bolotsana. ₉Boleo ke maikaelelo a bosilo; mosotli o ilega mo bathong.

₁₀Fa o nyema moko ka letsatsi la tlalelo, thata ya gago e tla bo e se ya sepe.

₁₁Pholosa ba ba gogelwang losong! Thibela ba ba theekelelang go ya go bolawa. ₁₂Fa o ka re: “Ke ne ke sa itse,” ona o o bonang dipelo a ga o kitla o lemoga? Ona o o disang bophelo jwa gago o a itse. O direla motho ka fa tirong ya gagwe.

₁₃Morwaaka, jaa lomepe lwa dinotshe, gonne lo monate; mafura a dinotshe a botshe mo magalapeng a gago. ₁₄Itse gore botlhale bo ntse jalo mo moweng wa gago. Fa o bo bona, tswelelopele e tla nna teng, mme tsholofelo ya gago ga e kitla e nyelela.

₁₅Wena moikepi, se lalele lelapa la mosiami; se senye legae la gagwe. ₁₆Le fa mosiami a ka wa gasupa, o tla nna a tsoga gape; mme baikepi bone ba wela mo tatlhegong.

₁₇Fa mmaba wa gago a wa, se itumele; fa a digwa, a pelo ya gago e se duduetse, ₁₈e se re gongwe Morena a bona, mme ga nna bosula mo matlhong a gagwe, a busa bogale jwa gagwe mo go ene.

₁₉Se tukele basenyi bogale; se fufegele baikepi ₂₀gonne yo o bosula ga a tswelele pele; lesedi la baikepi le tla tima.

₂₁Morwaaka, boifa Morena le kgosi; se tlwaelane le dirukhutlhi. ₂₂Gonne tatlhego ya tsona e tla dirafala ka tshoganyetso, sebaka sa tshenyego ya tsona se itsiwe ke mang?

₂₃Diane tse di latelang fa le tsona ke tsa batlhalefi:

Go gobelelela motho mo tshekong ga go a siama. ₂₄Yo o rayang moikepi a re: “O siame!” ene, batho ba tla mo rogaka, merafe e tla mo hutsa. ₂₅Go ratega ba ba mo atlholang ka tshiamo; lesego le letlhogonolo di tla ba dirafalela.

₂₆Yo o ntshang dikarabo tse di siameng o atla molomo.

₂₇Fetsa tiro ya gago e e kwa ntle, o leme tshimo ya gago; morago ga moo o ka aga ntlo ya gago.

₂₈Se pateletse mongwe-ka-wena ka bomo! A ò tshwanetse go timetsa batho ka molomo wa gago? ₂₉Se re: “Ke tla mo direla se a se ntiretseng; ke busolosetsa monna ka fa tirong ya gagwe.”

₃₀Nkile ka feta kwa tshimong ya motlapa kwa tshimong ya moweine ya motho yo o se nang tlhaloganyo. ₃₁Ka fitlhela e tlhogile mefero gotlhe, e khurumeditswe ke mokolonyane, lorako lwa matlapa lwa yona lo digilwe. ₃₂Ka leba, ka ela tlhoko, ka bona, ka fitlhela e le thuto e e reng: ₃₃Fa o robala go le gonnye, o otsela go le gonnye, o phutha diatla go le gonnye go ikhutsa, ₃₄khumanego ya gago e tla tla jaaka senokwane le lehuma la gago jaaka motlhabani.