SIRAKA 14

₁Go sego motho yo o iseng a leofe ka puo, mme yo o sa tlhokeng go utlwa botlhoko ka ntlha ya dibe tsa gagwe.

₂Go sego motho yo moya wa gagwe o sa mmoneng molato, le yo o iseng a ke a itlhoboge.

₃Khumo ga e a siamela motho yo o pelotshetlha, mme leruo le na le tiro ya eng mo mothong yo o lefufa?

₄Motho yo o ikokoanyetsang dilo ka go nna a itsutlela fela, o kokoanyetsa ba bangwe, mme ba bangwe ba tlaa tshelela mo letlepung la khumo ya gagwe.

₅Fa motho a itlhoile o ka ratwa ke mang? Le khumo ya gagwe tota ga a e je monate.

₆Ga go na motho ope yo o lesotlo go feta motho yo o itsutlelang, mme moo ke kafa boikepi jwa gagwe bo mo duelang ka teng.

₇Lefa a dira bomolemo, o bo dira a sa ikaelela, mme kgabagare ke ene yo o senolang bosula jwa gagwe.

₈Go bosula motho yo o lebang ba bangwe ka go ba ngalela, yo o itebisang go sele, a itlhokomolosa batho ba bangwe.

₉Leitlho la motho yo o pelotshetlha le dira mong wa lone gore a se ka a itumelela se e leng sa gagwe, bopelotshetlha bo omeletsa moya wa gagwe.

₁₀Motho yo o pelotshetlha o timana dijo. mme ga di yo mo tafoleng ya gagwe.

₁₁Morwaaka, itshedise sentle ka fa O ka kgonang ka teng, mme O tsisetse Morena dineelo tse di mo tšhwanelang.

₁₂O gakologelwe gore loso ga lo na go diega, le gore ga O ise O senolelwe taelo ya bobipo.

₁₃E re O ise O šwe O direle tsala ya gago bomolemo. O e tshole sentle ka mo dithata tsa gago di go dumelelang ka teng.

₁₄O se ka wa ikitsa dilo tse di molemo tsa malatsi ano, O se ka wa tlogela seabe sa gago sa dilo tse di siametseng go elediwa sa iphetela fela.

₁₅A ga O kitla O tlogelela yo mongwe letlotlo la gago? O bo O lesa maungo a mofufutso wa phatla ya gago a kgaoganngwa ka go direlwa tengwa?

₁₆Jalo he, O fe, O amogele, O tlhabe kgobe ka mutlwa. gonne ga O kake wa lebelela go ja monate kwa bobipong.

₁₇Ditshedi tsotlhe di tsofala jaaka seaparo, molao wa bogologolo wa re: “Loso lo tšhwanetse gore lo bo lo nne gone.”

₁₈Dikokomana tsa nama le madi di tšhwana le matlhare a a tlhogang mo setlhareng se se lesothu, matlhare mangwe a a tlhotlhorega, mangwe a tlhoge, fela jaaka motho mongwe a šwa, yo mongwe a tsalwa.

₁₉Sengwe le sengwe se se kgonnweng go dirwa se a fela, se senyege, mme modiri wa sone le ene a tsamaye naso.

₂₀Go sego motho yo o kelekang botlhale ka mogopolo wa gagwe, mme a akanya ka tlhaloganyo e e siameng,

₂₁a ithuta ditsela tsa jone ka pelo ya gagwe yotlhe. Mme a sekaseka diphiri tsa jone ka kakanyo ya gagwe.

₂₂O bo latelela jaaka motsomi, a bo lalela mo bo tsileng go feta teng; ₂₃O okomela ka difensetere tsa jone, a reetsa fa dikgorong tsa jone.

₂₄O thibelela gaufi le ntlo ya jone, a kokothela lomapo mo dipoteng tsa jone.

₂₅O tlhoma tante ya gagwe go bapa najo, a aga mo kagong e ntlentle.

₂₆O baya bana ba gagwe mo moriting wa jone, a bo a thibelela ka fa tlase ga dikala tsa jone.

₂₇Mo mogoteng bo mo direla leobo, mme a aga mo kgalalelong ya jone.