1Mongwe le mongwe yo o boifang Morena o tlaa dira fela jaana. Mme mongwe le mongwe yo o ikakatlelang ka molao o tlaa fiwa botlhale.
2Bo tlaa tla go mo kgatlhantsha jaaka e kete ke mma, bo mo amogele jaaka monyadiwa yo o sa leng kgarebana.
3Bo tlaa mo tsholela dijo tsa tlhaloganyo bo mo siele metsi a botlhale.
4O tlaa ikaega ka jone mme ga a na go wa, a bo ikanye mme a se ka a tlhabiwa ke ditlhong.
5Bo tlaa mmaya kwa godimo ga bakaulengwe ba gagwe, mme mo phuthegong yotlhe ke jone bo tlaa dirang gore a bue.
6O tlaa nna le boitumelo mme a rwale serwalo sa boipelo, a bo a nne le boswa jwa leina le le sa khutleng.
7Dieleele ga di kitla di bo rua, le baleofi ga ba kitla ba bo bona ka matlho.
8Bo emela kgakala le baikgantshi, mme baaki ga ba kake ba bo akanya.
9Leboko le rona molomo wa moleofi, gonne ga le a tsenngwa mo go one ke Morena.
10Ka gore leboko le tšhwanetse go buiwa ka botlhale, mme e nne Morena ka boene a le etleetsang.
Motho ga a patelediwe
11O se ka wa bo wa re, “Morena ke ene a nteofisitseng.” gonne ga a nke a bo a nna modiri wa se a se tlhoileng.
12O se ka wa bo wa re “Ke ene yo o ntimeditseng.” gonne ga a tlhoke moleofi.
13Morena o tlhoile sengwe le sengwe se se bosula, le gone ga go na ope e ka reng a mmoifa le ene a se rata.
14Ke ene yo o dirileng motho mo tshimologong, a bo a mo letla gore a ikakanyetse ka kgololesego.
15Fa O rata O ka tshegetsa melao, go ikanyega go mo thateng ya gago.
16O beile molelo le metsi fa pele ga gago, tsaya se O se bonang se le botoka.
17Motho o na le botshelo le loso fa pele ga gagwe; o tlaa newa se a se ratang go feta se sengwe.
18Gonne botlhale jwa Morena bo bontsi thata, o thatayotlhe e bile o bona sengwe le sengwe.
19Matlho a gagwe a lebile botlhe ba ba mmoifang, o lemoga tiro nngwe le nngwe e motho a e dirang.
20Ga a ise a ke a laolele ope go nna moikepi, ga a ise a ke a letlelele ope go leofa.
